ខេត្តស្វាយរៀង ៖ ស្រែបង្ហាញតាមបែបប្រព័ន្ធប្រពលវប្បកម្មដំណាំស្រូវតាមគោលការណ៍ធម្មជាតិ (ប.វ.ស) ក្រោមជំនួយពីអង្គការហ្វាវ (FAO) ផ្តល់ជូនប្រជាកសិករក្រីក្រនៅភូមិព្រិច ឃុំដូង ស្រុករមាសហែក ពេលនេះបានផ្តល់ផលហើយ ហើយប្រជាកសិករបានចុះច្រូតកាត់យ៉ាងសប្បាយរីករាយកាលពីព្រឹកថ្ងៃទី២៤ កញ្ញា កន្លងមក ។ សកម្មភាពច្រូតកាត់ប្រមូលផលស្រូវស្រែបង្ហាញ ប.វ.ស ខាងលើនេះ ក៏មានការអញ្ជើញចូលរួមពីលោកស្រុន សុខុម អគ្គនាយករងនៃអគ្គនាយកដ្ឋានកសិកម្ម លោកពេជ រម្យនា តំណាងអង្គការ FAO លោកថាច់ រតនា ប្រធានមន្ទីរកសិកម្មខេត្ត លោកម៉ៅ វីរៈ អភិបាលស្រុករមាសហែក ព្រមទាំងប្រជាកសិករយ៉ាងច្រើនកុះករ ។
លោកគង់ វឿន ជាកសិករគំរូម្នាក់នៅភូមិព្រិច ឃុំដូង បានប្រាប់កោះ សន្តិភាពថា ពីមុនគាត់ធ្វើស្រែតាមទំលាប់ប្រពៃណី ប្រើពូជចាស់ ដែលរើសរដូវ ហើយប្រើពេលយូរពី៦ទៅ៧ខែ ទើបទទួលបានផល ចំណែកទិន្នផលក៏បានតិច ត្រឹមតែ១,៥តោន ទៅ២តោនប៉ុណ្ណោះ ក្នុងមួយហិកតា ជាហេតុធ្វើឱ្យប៉ះពាល់ដល់ជីវភាពគ្រួសារ ពេលមានរវល់បុណ្យទាន ឬរៀបមង្គលការកូនចៅម្តងៗ ។ ប៉ុន្តែថ្មីៗនេះ ដោយអង្គការ FAO បានជ្រើសរើសយកឃុំដូង ស្រុករមាសហែក ធ្វើជាតំបន់គោលដៅនៃគំរោង បង្កើនសន្តិសុខស្បៀងសំរាប់គ្រួសារកសិករ ដែលរងឥទ្ធិពលដោយសារការឡើងថ្លៃស្បៀងអាហារ ហើយបានចែកពូជស្រូវ ពូជបន្លែ ជីគីមី និងសំភារកសិកម្មមួយចំនួនទៀតដល់គ្រួសារកសិករក្រីក្រផង និងដោយមានការណែនាំបណ្តុះបណ្តាលបច្ចេកទេសកសិកម្មពីមន្ត្រីជំនាញរបស់មន្ទីរកសិកម្មផងនោះ រូបគាត់ក៏បានស្ម័គ្រចិត្តធ្វើជាកសិករគំរូ ធ្វើស្រែបង្ហាញតាមបែបប្រពលវប្បកម្មដំណាំស្រូវតាមគោលការណ៍ធម្មជាតិ ប.វ.ស បង្ហាញដល់កសិករដទៃទៀត ដែលពេលនោះទាំងរូបគាត់ក៏មិនទាន់ដឹងថា លទ្ធផល នឹងទទួលបានប៉ុនណាផង ។ លុះក្រោយពីរូបគាត់ភ្ជួររាស់សាបព្រោះហើយរយៈពេលតែងជាង៣ខែប៉ុណ្ណោះ ស្រែបង្ហាញរបស់គាត់ក៏អាចច្រូតកាត់ប្រមូលផលបាន ហើយថែមទាំងមានទិន្នផលខ្ពស់ថែមទៀត ធ្វើឱ្យគាត់ភ្ញាក់ផ្អើល និងសប្បាយចិត្តជាខ្លាំង ។
លោកថាច់ រតនា ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានឱ្យដឹងថា មន្ត្រីជំនាញរបស់មន្ទីរកសិកម្មបានយកសំណាក៣កន្លែង (កន្លែងល្អ មធ្យម និងខ្សោយ) ក្នុងទំហំ៤ម៉ែត្រការ៉េ ពីស្រែបង្ហាញរបស់កសិករគង់ វឿន មកធ្វើការវិភាគ ។ ជាលទ្ធផលបានរកឃើញថា ផលស្រូវទទួលបានមធ្យម៥តោន៧៥០គីឡូក្រាម នៅសំណើម និង៤តោន៩៤៥គីឡូក្រាម ពេលកាត់សំណើម ក្នុងមួយហិកតា ដែលស្រែបង្ហាញនេះ ប្រើប្រាស់ពូជស្រូវសែនពិដោរ ជាជំនួយរបស់អង្គការ FAO ។ លោកស្រុន សុខុម អគ្គនាយករងនៃអគ្គនាយកដ្ឋានកសិកម្ម បានឱ្យដឹងថា បើកសិករយើងជ្រើសរើសពូជស្រូវសែនពិដោរ គឺចំណាយពេលតែ៣ខែ១០ថ្ងៃប៉ុណ្ណោះ នឹងអាចច្រូតកាត់ប្រមូលផលបាន ហើយទិន្នផលអាចទទួលបានពី៥តោន ទៅ៦តោន ក្នុងហិកតាឯណោះ ។ បើប្រៀបធៀបនឹងការប្រើប្រាស់ពូជស្រូវចាស់វិញ គឺចំណាយពេលពី៦ទៅ៧ខែ ទើបទទួលបានផល ហើយទិន្នផលបានតែពី១,៥តោន ទៅ១,៦តោនប៉ុណ្ណោះ ក្នុង១ហិកតា ឃើញថា ខុសគ្នាឆ្ងាយណាស់ ។ លោកស្រុន សុខុម បញ្ជាក់ថា ពូជស្រូវសែនពិដោរនេះត្រូវបានក្រសួងកសិកម្មរកឃើញនៅឆ្នាំ២០០២ ហើយបានស្នើសុំទៅសម្តេចតេជោហ៊ុន សែន ដាក់ឈ្មោះពូជស្រូវនេះថា សែនពិដោរ ដោយពាក្យសែនជាឈ្មោះសម្តេច ឯពិដោរ ពីព្រោះស្រូវនេះស្រាលហើយក្រអូប ៕
ចែករំលែកព័តមាននេះ