ទីក្រុងប៉េកាំង ៖ កាលពីថ្ងៃសុក្រកន្លងមក អ្នកនាំពាក្យរបស់គណៈកម្មាធិការជាតិសន្និសីទប្រឹក្សាយោបល់នយោបាយ និងជាទីប្រឹក្សានយោបាយជាតិរបស់ប្រទេសចិន បានស្នើធ្វើកំណែទម្រង់វិស័យឧស្សាហកម្ម ការប្រើប្រាស់ថាមពល និងការដឹកជញ្ជូនក្នុងប្រទេស ដើម្បីកាត់បន្ថយបរិយាកាសកខ្វក់ ខណៈប្រទេសនេះងាកទៅកាន់ការលូតលាស់មានគុណភាពខ្ពស់…
ទីក្រុងប៉េកាំង ៖ កាលពីថ្ងៃសុក្រកន្លងមក អ្នកនាំពាក្យរបស់គណៈកម្មាធិការជាតិសន្និសីទប្រឹក្សាយោបល់នយោបាយ និងជាទីប្រឹក្សានយោបាយជាតិរបស់ប្រទេសចិន បានស្នើធ្វើកំណែទម្រង់វិស័យឧស្សាហកម្ម ការប្រើប្រាស់ថាមពល និងការដឹកជញ្ជូនក្នុងប្រទេស ដើម្បីកាត់បន្ថយបរិយាកាសកខ្វក់ ខណៈប្រទេសនេះងាកទៅកាន់ការលូតលាស់មានគុណភាពខ្ពស់ ។ នេះបើយោងតាមការចេញពីគេហទំព័រ chinadaily.com.cn។
លោក Wang Guoqing បាននិយាយក្នុងសន្និសីទកាសែតមួយថា ៖« ការអភិវឌ្ឍប្រទេសជាមួយការបញ្ចេញឧស្ម័នបំពុលបណ្តាលឲ្យបរិស្ថានកខ្វក់ខ្លាំងក្លា គឺមិនត្រឹមតែប៉ះពាល់ដល់ការអភិវឌ្ឍសេដ្ឋកិច្ចរយៈពេលវែងប៉ុណ្ណោះទេ តែវាក៏ប៉ះពាល់ដល់សុខភាពពលរដ្ឋផងដែរ ។ វាមិនមែនជាការអភិវឌ្ឍដែលពួកយើងចង់បានឡើយ » ។
លោក Wang បន្តថា ៖« ទឹកថ្លា និងភ្នំក្រាស់ៗមានតម្លៃស្មើនឹងមាស-ប្រាក់ ។ ការគ្រប់គ្រងបរិយាកាសកខ្វក់ គឺមិនប៉ះពាល់ដល់ការខិតខំប្រឹងប្រែងអភិវឌ្ឍន៍សេដ្ឋកិច្ចជាតិ និងជួយដល់ជីវភាពរស់នៅរបស់ពលរដ្ឋទេ » ។
លោកនិយាយថា ៖« នៅពេលមានស្ថានភាពបរិយាកាសមិនល្អកាលពីប៉ុន្មានថ្ងៃមុន ពួកយើងទាំងអស់គ្នាគិតថា គុណភាពបរិយាកាសនេះបានក្លាយទៅជាបញ្ហាអាក្រក់ម្តងទៀត » ។
គួរបញ្ជាក់ថា មូលហេតុចម្បងដែលធ្វើឲ្យបរិយាកាសកខ្វក់ គឺគំរូអភិវឌ្ឍន៍គ្មានប្រសិទ្ធភាព និងការរស់នៅដោយបំពុលបរិស្ថាន ។ បញ្ហាទាំងនេះមិនទាន់បានដោះស្រាយទាំងស្រុងទេ ។
លោក Wang បន្ថែមថា ៖« ការគ្រប់គ្រងបរិយាកាសកខ្វក់ គឺជាគម្រោងស្មុគស្មាញមួយដែលត្រូវការរយៈពេលយ៉ាងយូរដើម្បីដោះស្រាយ ប៉ុន្តែឲ្យតែប្រជាពលរដ្ឋយកចិត្តទុកដាក់ជាមួយវានោះ ពួកយើងមានជំនឿចិត្តថា នឹងអាចការពារផ្ទៃមេឃពណ៌ខៀវរបស់យើងបាន » ៕
ចែករំលែកព័តមាននេះ