ខេត្តបន្ទាយមានជ័យ ៖ កុមារាម្នាក់បានស្លាប់មុនពេលបញ្ជូនទៅទៅមន្ទីរ និងកុមារីម្នាក់បានជួយសង្គ្រោះទាន់ពេលរួចផុតពីការស្លាប់ ក្នុងករណីលង់ទឹកស្រះ ។ ហេតុការណ៍បង្កឲ្យមានការភ្ញាក់ផ្អើលនេះ បានកើតឡើងនៅវេលាម៉ោងម៉ោង០៣និង១០នាទីរសៀល ថ្ងៃទី០៨ ខែមីនា ឆ្នាំ២០១៨ ភូមិបន្ទាយឆ្មារលិច ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ។
តាមការឲ្យដឹងពីនគរបាលមូលដ្ឋានប៉ុស្តិ៍រដ្ឋបាលឃុំបន្ទាយឆ្មារ បានឲ្យដឹងថា កុមារារងគ្រោះដែលស្លាប់ឈ្មោះ រ៉ាត់ មានិត អាយុ៨ឆ្នាំ រស់នៅភូមិបន្ទាយឆ្មរខាងជើង ឃុំបន្ទាយឆ្មារ ស្រុកថ្មពួក ។ មុនពេលកើតហេតុ បានសុំម្តាយឈ្មោះ អូម ម៉ៅ អាយុ៤០ឆ្នាំ ទៅលេងផ្ទះយាយនៅភូមិបន្ទាយឆ្មារលិច ឃុំបន្ទាយឆ្មារ ពេលមកដល់ផ្ទះយាយ កុមារា រ៉ាត មានិត បានបបួលកុមារីឈ្មោះ ណោត សារ៉េន អាយុ១០ឆ្នាំ ទៅលេងទឹកប្រឡាយនៅចំណុចទំនប់លាវ ខាងលិចភូមិបន្ទាយឆ្មារលិច ចម្ងាយប្រមាណ៥០ម៉ែត្រជាមួយគ្នា បណ្ដាលឲ្យលង់ទឹកទាំងពីរនាក់ ហើយត្រូវបានប្រជាពលរដ្ឋនៅក្បែរនោះជួយស្រង់ រួចឪពុកម្តាយបានបញ្ជូនមកសង្គ្រោះបន្ទាន់នៅមន្ទីរពេទ្យបង្អែកស្រុកថ្មពួក ។
ប្រភពដដែលបានបញ្ជាក់ថា ក្រោយពីជួយសង្គ្រោះកុមារា ឈ្មោះ រ៉ាត់ ម៉ានិត ដោយករណីធ្ងន់ធ្ងរក៏បានស្លាប់មុនមកដល់មន្ទីរពេទ្យ ចំណែកកុមារីឈ្មោះ ណោត សារ៉េន ជួយសង្គ្រោះបានទាន់ពេលវេលា រួចផុតពីការបាត់បង់ជីវិត ។ ចំពោះសពកុមារា រ៉ាត មានិត ក្រោយពីសមត្ថកិច្ចនគរបាលប៉ុស្តិ៍រដ្ឋបាលឃុំបន្ទាយឆ្មារពិនិត្យ រួចបានប្រគល់ជូនឪពុកម្តាយចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ