រាជធានីភ្នំពេញ ៖ តុលាការកំពូលនឹងបើកសវនាការបណ្តឹងសាទុក្ខការសុំនៅក្រៅឃុំរបស់លោកកឹម សុខា អតីតប្រធានគណបក្សសង្គ្រោះជាតិ នៅវេលាម៉ោង៨និង០០នាទី ព្រឹកថ្ងៃទី៩ ខែមីនា ឆ្នាំ២០១៨នេះ បើយោងតាមដីកាកោះរបស់តុលាការជូនដល់ភាគីពាក់ព័ន្ធក្នុងសំណុំរឿងនេះ ។
ចំពោះការនាំខ្លួនជនជាប់ចោទចូលរួមសវនាការ ឬអត់តុលាការ និងមេធាវីការពារក្តីនៅមិនទាន់អាចបញ្ជាក់បាននៅឡើយទេ ។ លោកកឹម សុខាត្រូវបានចោទពីបទ សន្ទិដិ្ឋភាពជាមួយបរទេស ឬក្បត់ជាតិ ។
សំណុំរឿងបណ្តឹងសុំនៅក្រៅឃុំបណ្តោះអាសន្នរបស់លោកកឹម សុខា ត្រូវបានសភាស៊ើបសាលាឧទ្ធរណ៍បានបដិសេធន៍កាលពីពេលថ្មីៗនេះ នៅចំពោះមុខជនជាប់ចោទ និងក្រុមមេធាវីការពារក្តីចំនួន៧រូប បន្ទាប់ពីសវនាការសួរដេញដោលជាង២ម៉ោង ។
លោកកឹម សុខាត្រូវបានចាប់ខ្លួនកាលពីវេលារំលងអាធ្រាត្រចូលថ្ងៃទី៣ ខែកញ្ញា ឆ្នាំ២០១៧ ក្រោមបទ«ក្បត់ជាតិ» និងត្រូវបានបញ្ជូនទៅឃុំខ្លួននៅពន្ធនាគារ ៣ ត្រពាំងថ្លុង ក្នុងខេត្តត្បូងឃ្មុំ ។
គួរបញ្ជាក់ថា សំណុំរឿងក្តីលោក កឹម សុខា អតីតប្រធានគណបក្សសង្គ្រោះជាតិត្រូវបានក្រុមមេធាវីការពារក្តីប្តឹងសាទុក្ខបន្តនីតិវិធី នៅតុលាការកំពូលទៀត ពោល គឺពុំទាន់បញ្ចប់ត្រឹមសភាស៊ើបសួរសាលាឧទ្ធរណ៍ នោះទេ ។លោកមេធាវីសំ សុគង់ ថ្លែងថា ក្រោយពីពិភាក្សាជាមួយលោកកឹម សុខា ប្រធានគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារត្រពាំងផ្លុង ខេត្តត្បូងឃ្មុំ រួចហើយ ក្រុមមេធាវីសម្រេចដាក់បណ្តឹងសាទុក្ខទៅតុលាការកំពូលបន្តទៀត ដើម្បីប្រឆាំងនឹងដីកាសម្រេចឃុំខ្លួនលោកកឹម សុខា ។
យោងតាមបណ្តាញសង្គមមានឈ្មោះ លោកកឹម សុខាបានបញ្ជាក់ថា តុលាការកំពូលនឹងបើកសវនាការសំណុំរឿងបណ្តឹងសាទុក្ខរបស់លោកកឹមសុខា សុំនៅក្រៅឃុំបណ្តោះអាសន្ន ។ លោកមេធាវីសំ សុគង់ ថ្លែងថា «ក្រុមមេធាវីប្តឹងនឹងសេចក្ដីសម្រេចទាំងមូលនៃសាលដីការបស់សភាស៊ើបសួរសាលាឧទ្ធរណ៍ » ។
សូមបញ្ជាក់ថា សាលាឧទ្ធរណ៍កាលព្រឹកថ្ងៃទី១ ខែកុម្ភៈ នាំខ្លួនលោក កឹម សុខា អតីតប្រធានគណបក្សសង្គ្រោះជាតិ ពីពន្ធនាគារត្រពាំងថ្លុង មកចូលរួមសវនាការក្នុងសំណុំរឿងសុំនៅក្រៅឃុំ ជាបណ្ដោះអាសន្ន នៅវេលាម៉ោង ៨ព្រឹក ។ ការនាំខ្លួនជនជាប់ត្រូវចោទចេញពីពន្ធនាគារតាំងពី៤ម៉ោងព្រឹក មកកាន់សវនាការ ហើយជនជាប់បានតវ៉ាថា ការនាំខ្លួននេះព្រឹកពេក ។
ថ្ងៃទី១ ខែកុម្ភៈ ២០១៨ ជាលើកទីមួយហើយ ដែលតុលាការបានអនុញ្ញាតឱ្យមានវត្តមានលោក កឹម សុខា ចូលរួមនីតិវិធីសវនាការ ចំពោះមុខតុលាការសភាស៊ើបសួរនៃសាលាឧទ្ធរណ៍ ដោយហេតុថា កន្លងមកក្រុមមេធាវីបានស្នើសុំគ្រប់មធ្យោបាយតាមផ្លូវច្បាប់ ។ ប៉ុន្តែតុលាការមិនដែលយល់ព្រមតាមសំណើដោះលែងនៅក្រៅឃុំឡើយ ។
គួរបញ្ជាក់ថា លោក ហែម សុជាតិ មេធាវីការពារក្តីម្នាក់ចំណោម៧នាក់ ឱ្យលោក កឹម សុខា បានឱ្យដឹងថា សាលាឧទ្ធរណ៍មិនបានដោះលែងលោក កឹម សុខា ឱ្យមានសេរីភាពឡើងវិញទេ ។ លោក ហែម សុជាតិ បានឱ្យដឹងថា ក្រុមមេធាវីបានលើកពីមូលហេតុផ្លូវច្បាប់ជូនតុលាការ ព្រមទាំងស្នើសុំឱ្យសាលាឧទ្ធរណ៍រក្សាទុកលោក កឹម សុខា នៅពន្ធនាគារក្នុងរាជធានីភ្នំពេញ វិញ ៕
ចែករំលែកព័តមាននេះ