ខេត្តរតនគិរី ៖ ឃ្មុំព្រៃធម្មជាតិដែលប្រជាពលរដ្ឋរកបានពីតាមតំបន់ព្រៃនានាក្នុងខេត្ដរតនគិរីសព្វថ្ងៃនេះ ត្រូវបានលក់ក្នុងតម្លៃសមរម្យល្មម គឺមួយសំបុកលក់ចាប់ពី៣ម៉ឺន រហូតទៅដល់ជាង១០ម៉ឺនរៀល តាមតូចតាមធំ ។
លោក យុង សាម វ័យជាងហាសិបឆ្នាំ ជនជាតិភាគតិចទំពួនរស់នៅភូមិភ្នំ សង្កាត់បឹងយក្សឡោម ក្រុងបានលុង បានជិះម៉ូតូដឹកប្រពន្ធដោយយួរឃ្មុំជាច្រើនបង្គង យកមកលក់នៅមុខផ្សារបានលុងបានប្រាប់ឱ្យដឹងថា ឃ្មុំដែលគាត់យកមកលក់នោះ គឺប្រមូលទិញពីប្រជាពលរដ្ឋមួយចំនួនដែលរកបានពីក្នុងព្រៃ ដោយគាត់យកមកលក់បន្ដសម្រាប់គេយកទៅច្របាច់យកទឹក ឬធ្វើជាម្ហូបដែរធ្វើឱ្យរូបគាត់អាចទទួលបានផលចំណេញពីការលក់សំបុកឃ្មុំព្រៃនេះ សម្រាប់ផ្គត់ផ្គង់ជីវភាពក្នុងគ្រួសារបានមួយកម្រិត ។
អ្នកលក់ឃ្មុំរូបនោះបានបន្ដឱ្យដឹងទៀតថា ឃ្មុំទាំងនោះ គឺជាឃ្មុំធម្មជាតិហើយលក់ក្នុងតម្លៃខុសគ្នា គឺទៅតាមសំបុកតូចឬសំបុកធំ ពោលគឺឃ្មុំមួយសំបុកតូច(ឃ្មុំខ្យង) លក់តម្លៃ៣ម៉ឺនរៀលក្នុងមួយសំបុក ។ ចំណែកសំបុកធំ(ឃ្មុំផ្លិតឬឃ្មុំត្រចៀកដំរី)លក់បានក្នុងតម្លៃ៨ម៉ឺនដល់ទៅជាង១០ម៉ឺនរៀលក៏មានដែរ ។អ្នកលក់ឃ្មុំបានបញ្ជាក់ថា បច្ចុប្បន្នពិបាកក្នុងការស្វែងរកឃ្មុំដើម្បីយកមកលក់ណាស់បួនប្រាំថ្ងៃទៅមួយសប្ដាហ៍ ទើបអ្នកភូមិរកបានបួនដប់សំបុក ។ ឃ្មុំខែចែត្រគេនិយមចូលចិត្ដទិញយកទៅប្រើប្រាស់ដោយច្របាច់យកទឹកដាក់ដបរក្សាទុកដើម្បីធ្វើជាថ្នាំព្យាបាលជំងឺផ្សេងៗអ្នកខ្លះក៏ទិញយកទៅហូបធម្មតា ។
ចំណែកអ្នកធ្លាប់ទិញឃ្មុំយកទៅប្រើប្រាស់កន្លងមកបានឱ្យដឹងដែរថា មានសំបុកឃ្មុំមួយចំនួនបានដាក់លក់នៅដងផ្លូវជាតិលេខ៧៨ ពីក្រុងបានលុងទៅស្រុកអូរយ៉ាដាវ ភាគច្រើនសំបុកឃ្មុំទាំងនោះ ច្រើនជាសំបុកដែលបងប្អូនជនជាតិដើមភាគតិចរកបានពីក្នុងព្រៃ ឬនៅតាមភូមិដាច់ស្រយាល ។ ហើយសំបុកឃ្មុំទាំងនោះពួកគាត់ច្រើនលក់ធូរថ្លៃជាងសំបុកឃ្មុំ ដែលគេយកមកលក់បន្តនៅពីមុខផ្សារបានលុង ។ អ្នកខ្លះនិយាយថា ឃ្មុំមួយសំបុកធំលក់តំលៃតែបួនទៅប្រាំម៉ឺនរៀលតែប៉ុណ្ណោះ ហើយជាឃ្មុំខែចែត្រធម្មជាតិដូចគ្នាផងដែរ ។
អ្នកធ្លាប់ទិញឃ្មុំដដែលបានបញ្ជាក់ឱ្យដឹងថា គាត់ទិញសំបុកឃ្មុំនេះយកមកច្របាច់យកទឹកព្រោះលោកយល់ថា សំបុកឃ្មុំដែលយកមកច្របាច់យកទឹកខ្លួនឯងច្រើនតែសុទ្ធល្អ ។ ហើយចំពោះទឹកឃ្មុំខែចែត្រវិញ វាមានរសជាតិផ្អែមឆ្ងាញ់ខ្លាំងណាស់ ហើយវាក៏ជាឱសថសម្រាប់ព្យាបាលជំងឺបានច្រើនមុខទៀតផងដោយ សារវាជាទឹកដមផ្កាព្រៃច្រើនមុខ ។ ការប្រើប្រាស់ទឹកឃ្មុំសម្រាប់ធ្វើជាឱសថព្យាបាលរោគនេះមានតាំងពីបុរាណកាលយូរលង់ណាស់មកហើយ។ ក្រុមអ្នករកឃ្មុំបន្តទៀតថា នៅជិតថ្ងៃសីលទើបរកបានច្រើន ហើយឃ្មុំពេញក្បាលទឹកល្អនិងរកបាន១ថ្ងៃ៣ទៅ៤សំបុក ។បើតាមអ្នកទិញលក់បន្តនៅតាមផ្លូវជាតិលេខ៧៨អា លើចិញ្ចើមផ្លូវចេញពីក្រុងបានលុង ឆ្ពោះទៅស្រុកអូរយ៉ាដាវ បាននិយាយថា ទឹកឃ្មុំ១លីត្រ៧០,០០០រៀល ហើយក្នុងមួយអាទិត្យលក់បាន២០ម៉ឺនរៀលគឺមានច្រើនលក់បានច្រើន មិនដែលសល់ទេ ៕
ចែករំលែកព័តមាននេះ