ពិធីសែនព្រេនបណ្ដេញខ្មោចព្រាយបិសាចចេញពីភូមិតាមជំនឿដូនតា
- ព្រះវិហារ
ខេត្តព្រះវិហារ ៖ នៅថ្ងៃទី០៧ ខែមីនា ឆ្នាំ២០១៨ កន្លងទៅនេះ តាមជំនឿពីដូនតា ប្រជាពលរដ្ឋរស់នៅភូមិកំពង់ស្រឡៅ ឃុំកំពង់ស្រឡៅ១ ស្រុកឆែប…
ខេត្តព្រះវិហារ ៖ នៅថ្ងៃទី០៧ ខែមីនា ឆ្នាំ២០១៨ កន្លងទៅនេះ តាមជំនឿពីដូនតា ប្រជាពលរដ្ឋរស់នៅភូមិកំពង់ស្រឡៅ ឃុំកំពង់ស្រឡៅ១ ស្រុកឆែប ខេត្តព្រះវិហារ បានរៀបចំពិធីបណ្ដេញព្រលឹងខ្មោចព្រាយបិសាចចេញពីភូមិ ដែលពួកគេជឿថា កន្លងទៅមានខ្មោចព្រាយបិសាចបានចូលមកអុកឡុក ចូលសន្ថិតក្នុងខ្លួនមនុស្ស ធ្វើឲ្យមនុស្សឈឺ និងធ្វើឲ្យប្រជាពលរដ្ឋនៅតំបន់មានការខ្លាចរអា ។
ប្រជាពលរដ្ឋម្នាក់ឈ្មោះ បឿន រស់នៅឃុំកំពង់ស្រឡៅ១ ស្រុកឆែប បានប្រាប់អ្នកសារព័ត៌មានថា ការរៀបចំពិធីនេះឡើង ដើម្បីបណ្ដេញឧបទ្រពចង្រៃ និងព្រាយបិសាចចេញពីក្នុងភូមិនេះ មិនត្រឹមតែចាស់ៗ ក្មេងៗនោះទេ សូម្បីតែសិស្សានុសិស្ស គ្រូបង្រៀន និងកងកម្លាំងនៅក្នុងភូមិក៏មានការចូលរួមជាច្រើនកុះករផងដែរ ។ លោកថា ដោយសារមានជំនឿថា កន្លងទៅមានប្រជាពលរដ្ឋមួយចំនួនត្រូវបានខ្មោចព្រាយបិសាចចូលសន្ថិតក្នុងខ្លួនធ្វើឲ្យមនុស្សឈឺ និងមានការភ័យខ្លាច ទោះបីយកអ្នកឈឺទៅមន្ទីរពេទ្យព្យាបាលបែបណាក៏មិនបានធូរសះស្បើយឡើយ ដូច្នេះហើយ ទើបពួកគេសម្រេចនាំគ្នាមួយភូមិតែម្តង ដើម្បីរៀបចំពិធីនេះឡើង ទៅតាមទំនៀមទម្លាប់ តាមពីដូនតា ដើម្បីកម្ចាត់នូវគ្រោះចង្រៃ ព្រាយបិសាចទាំងឡាយ ឲ្យវិនាសចាកឆ្ងាយពីស្រុកភូមិ នាំមកនូវសេចក្តីសុខឡើងវិញ ។
អ្នកភូមិនៅទីនោះនិយាយថា របៀបរបបនៃការរៀបសែនព្រេនបណ្ដេញខ្មោចព្រាយបិសាចនោះ គេរៀបចំដូចជាស្លាធម៌ បាយសី បាយស បាយក្រហម បន្ទាប់មកបាននាំគ្នាដង្ហែរយកទៅដាក់ក្នុងទឹកទន្លេមេគង្គ បណ្តែតទឹកចោល រួចអុជផាវផ្ទុះទ្រហឹងពេញភូមិ ចំណែកផ្ទះប្រជាពលរដ្ឋនីមួយៗក៏មានចងព័ទ្ធនូវខ្សែអំបោះសីមាការពារផងដែរ ។ ប្រជាពលរដ្ឋថា មូលហេតុដែលកើតមានរឿងបែបនេះ ដោយសារតែកន្លងទៅ ប្រជាពលរដ្ឋរស់នៅតំបន់នោះពុំសូវចាប់អារម្មណ៍ជាមួយ នឹងពិធីសែនអ្នកតា ពិធីអុំទូកសែនដល់អ្នកតា ម្យ៉ាងទៀតការយកខ្មោចតៃហោងចូលមកក្នុងភូមិ ទើបធ្វើឲ្យកើតរឿងការភ័យខ្លាចបែបនេះ ។
សូមបញ្ជាក់ថា នៅខេត្តព្រះវិហារកន្លងទៅនៅតាមតំបន់ដាច់ស្រយាលនានា គេសង្កេតឃើញមានការរៀបចំពិធីសែនអ្នកតាជារៀងរាល់ឆ្នាំ មិនដែលខកខានឡើយ ព្រោះពួកគេជឿថា ការធ្វើបែបនេះអាចដេញនូវគ្រោះចង្រៃចេញពីភូមិស្រុក នឹងនាំឲ្យប្រជាពលរដ្ឋនៅក្នុងភូមិស្រុកមានសេចក្តីសុខក្នុងការរស់នៅ ៕
ចែករំលែកព័តមាននេះ