ខេត្តបន្ទាយមានជ័យ ៖ ការរួមគំនិតគ្នា រវាងម្តាយនិងកូនកាលពីជាង១ឆ្នាំមុន បានត្រូវនគរបាលស្រាវជ្រាវដឹងការពិត ហើយទីបំផុតក៏ឈានទៅឃាត់ខ្លួន២នាក់ម្តាយ-កូន និងបញ្ជូនទៅសាលាដំបូងខេត្ត នៅថ្ងៃ៦ ខែមីនា ជុំវិញករណីឃាតកម្មសម្លាប់ប្តី ។ លោកឧត្តមសេនីយ៍ត្រី សិទ្ធិ ឡោះ ស្នងការរងនគរបាលខេត្ត បានឱ្យដឹងថា ជនទាំង២នាក់ជាម្តាយ-កូននេះ ត្រូវបានឃាត់ខ្លួនកាលពីថ្ងៃទី៥ ខែមីនា ដែលម្តាយឈ្មោះ អាន តឹក អាយុ៥៧ឆ្នាំ ត្រូវជាប្រពន្ធជនរងគ្រោះ និងកូនប្រុសឈ្មោះ សូ វុធ អាយុ២៩ឆ្នាំ រស់នៅភូមិត្រឡោកលិច ឃំុភ្នំលៀប ស្រុកព្រះនេត្រព្រះ ។
លោកស្នងការរងបញ្ជាក់ថា ក្រោយពីមានករណីបាត់ខ្លួនបុរសឈ្មោះ នឹប អឹម អាយុ៥៥ឆ្នាំ មិនដឹងទៅណា ហើយទាំងប្រពន្ធនិងកូនមិនមានតាមរកឬប្តឹងសមត្ថកិច្ចឱ្យជួយរកនោះ ធ្វើឱ្យអ្នកស្រុកជិតខាងមានការសង្ស័យ ។ រីឯនគរបាលបានធ្វើការស្រាវជ្រាវ រហូតឈានដល់ឃាត់ខ្លួនជនទាំង២នាក់ ដែលជាប់ចោទសមគំនិតគ្នាសម្លាប់ប្តីនិងឪពុករបស់ខ្លួន ។ លោកស្នងការរងថ្លែងទៀតថា ក្រោយពេលឃាត់ខ្លួន កូនប្រុសបានសារភាពថា កាលពីថ្ងៃទី៩ វិច្ឆិកា ឆ្នាំ២០១៦ ឪពុកខ្លួនក្រោយពេលត្រឡប់មកពីពិធីឡើងផ្ទះអ្នកភូមិ មានអាការស្រវឹងស្រានិងបានរករឿងម្តាយ លុះនៅម៉ោងប្រមាណ១០យប់ ឪពុកបានយកកាំបិតចុងស្រួចឡើងលើផ្ទះបំណងចាក់ម្តាយ ។
កូនប្រុសរូបនេះសារភាពទៀតថា ពេលឃើញដូច្នេះ ខ្លួនបានស្ទុះមករុញឪពុកភ្លាត់ជើងធ្លាក់ពីលើកាំជណ្តើរមកក្រោម ហើយខ្លួនក៏ឡើងទៅលើផ្ទះដេកវិញ ។ ដោយសារឪពុកស្ងាត់យូរពេក ក៏ចុះមកមើលស្រាប់តែឃើញស្លាប់ដោយបាក់កនិងកាំបិតជង់ពោះ ក៏បានជជែកជាមួយម្តាយ ហើយសម្រេចចិត្តយកសំពត់ដឹកសពតាមគោយន្តទាំងកណ្តាលយប់ យកទៅចោលចម្ងាយពីភូមិជិត៣០គីឡូម៉ែត្រ ។ ក្រោយមក ពេលអ្នកភូមិជិតខាងសួររកឪពុកក៏កុហកថា ឪពុកទៅធ្វើការងារនៅភ្នំពេញ ។លុះនៅថ្ងៃទី២៤ ខែមីនា ឆ្នាំ២០១៧ អ្នកភូមិម្នាក់ឈ្មោះ សៀក តិ ភេទប្រុស អាយុ២៨ឆ្នាំ ខណៈទៅដាក់អង្គប់កណ្តុរបានប្រទះឃើញគ្រោងឆ្អឹងសពនៅក្នុងព្រៃ វាលស្រែខាងលិចបឹងចម្ងាយប្រមាណ៣០០ម៉ែត្រពីភូមិទន្លាប់ ឃុំប្រាសាទ ស្រុកព្រះនេត្រព្រះ ។
ក្រោយពេលឃើញសព ក៏មានការសង្ស័យ ព្រោះស្គាល់សម្លៀកបំពាក់ ទើបហៅប្រពន្ធទៅមើលតែប្រពន្ធមិនបានទៅ គឺទៅតែកូនប្រុស ប៉ុន្តែថាមិនមែនសពឪពុកខ្លួនទេ ហើយអ្នកស្រុកក៏កប់គ្រោងឆ្អឹងនោះទៅ ។
លោកឧត្តមសេនីយ៍ទោ អាត់ ខែម ស្នងការនគរបាលខេត្ត ថ្លែងថា ជនរងគ្រោះមានកូនប្រុសស្រី៦នាក់ ក្នុងនោះ៥នាក់ ខ្លះមានប្តីប្រពន្ធ និងខ្លះទៅធ្វើការប្រទេសថៃ ហើយកូនប្រុសឈ្មោះ សូ វុធ ត្រូវបានបងប្អូនឱ្យនៅផ្ទះមើលឪពុកម្តាយ ។ ពេលនៅជាមួយ ដោយសារឪពុកផឹកស្រាស្រវឹង និងប៉ងប្រើអំពើហិង្សាលើម្តាយ ដោយយកកាំបិតចុងស្រួចឡើងលើផ្ទះខ្លាចចាក់ម្តាយ កូនប្រុសរូបនេះក៏រុញធ្លាក់ពីកាំជណ្តើរបាក់ក និងត្រូវកាំបិតចុងស្រួចជង់ស្លាប់ទៅ ។
លោកស្នងការបញ្ជាក់ថា ករណីនេះមន្ត្រីជំនាញបានធ្វើការស្រាវជ្រាវដូចរាវរកម្ជុលនៅបាតសមុទ្រ ទាល់តែ១ឆ្នាំក្រោយទើបឈានដល់ការ ចាប់ខ្លួនជនសង្ស័យ២នាក់ម្តាយនិងកូនប្រុសដែលសមគំនិតគ្នាសម្លាប់ជនរងគ្រោះជាប្តីនិងជាឪពុក ។ក្រោយពេលកំណត់បានឃាតករហើយ សមត្ថកិច្ចក៏បានយករូបមនុស្សជ័រទៅឱ្យធ្វើត្រាប់ដូចជាច្រានធ្លាក់ពីលើជណ្តើរស្លាប់ផ្កាប់មុខ រូបភាពដឹកតាមគោយន្តយកទៅបោះចោលក្នុងព្រៃជាដើមទុកជាឯកសារនៃឃាតកម្មសម្លាប់ប្តីនិងឪពុក ៕
ចែករំលែកព័តមាននេះ