សម្តេចប្រមុខរដ្ឋស្ដីទី ជួបសំណេះសំណាលជាមួយគណបក្សប្រតិភូនារី
- ភ្នំពេញ
រាជធានីភ្នំពេញ ៖ ក្នុងពិធីជួបសំណេះសំណាលជាមួយគណបក្សប្រតិភូនារី ដើម្បីអបអរសាទទិវាអន្តរជាតិ ៨ មីនា ២០១៨ លើកទី១០៧ សម្តេច សាយ…
រាជធានីភ្នំពេញ ៖ ក្នុងពិធីជួបសំណេះសំណាលជាមួយគណបក្សប្រតិភូនារី ដើម្បីអបអរសាទទិវាអន្តរជាតិ ៨ មីនា ២០១៨ លើកទី១០៧ សម្តេច សាយ ឈុំ ប្រមុខរដ្ឋស្តីទី និងជាប្រធានព្រឹទ្ធសភាជំរុញនារីជួយបន្តរក្សា និងផ្សព្វផ្សាយតាមគ្រប់រូបភាពនៅតាមគ្រួសារ សហគមន៍ ដើម្បីរួមគ្នាលើកកម្ពស់សីលធម៌សង្គម ។
ការជំរុញរបស់ប្រមុខរដ្ឋស្តីទីបន្ទាប់ពី សម្តេច បានឡើងថា ទោះបីមានភាពរីកចម្រើនគ្រប់វិស័យយ៉ាងណាក៏ដោយក៏យើងនៅមានបញ្ហាប្រឈមមួយចំនួនទៀត ដែលជាផលអវិជ្ជមានសាកលភារូបនីយកម្មការប្រើប្រាស់ប្រព័ន្ធអេឡិចត្រូនិច ដែលបាននាំលំហូរនៃព័ត៌មាន និងវប្បធម៌បរទេសដែលជះឥទិ្ធពលទៅលើសង្គមជាតិ ដូចជាការផ្សព្វផ្សាយរូបភាពអាសអាភាស តាមរយៈប្រព័ន្ធអេឡិចត្រូនិក ប្រព័ន្ធផ្សព្វផ្សាយសង្គម ការជួញដូរគ្រឿងញៀន ភាពទំនើងដែលបង្កឱ្យមានអំពើហិង្សាការរំលោភបំពាន និងការកេងប្រវ័ញ្ចគ្រប់ប្រភេទ ។
សម្តេច ប្រមុខរដ្ឋស្តីទី នៃព្រះរាជាណាចក្រកម្ពុជា បានមានប្រសាសន៍យ៉ាងដូច្នេះនៅ ក្នុងជំនួបសំណេះសំណាលជាមួយគណៈប្រតិភូនារី ដែលមានសមាសភាពអន្តរស្ថាប័ន មន្ទីរកិច្ចការនារី មេឃុំ ចៅសង្កាត់ជាស្ត្រី និងសង្គមស៊ីវិលសរុបចំនួន១០០នាក់ ដឹកនាំដោយ លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី ក្នុងពិធីអបអរសាទរខួបទី១០៧ ទិវាអន្តរជាតិនារី ៨ មីនា ២០១៨ កាលពីរសៀលថ្ងៃទី០៧ ខែមីនា ឆ្នាំ២០១៨ នៅវិមានព្រឹទ្ធសភា ។
សម្តេចបានបញ្ជាក់ថា បញ្ហាទាំងអស់នេះ គឺជាកង្វល់ដ៏ចម្បងរបស់ព្រឹទ្ធសភា រដ្ឋសភា ក៏ដូចជារដ្ឋាភិបាលកម្ពុជា ដែលត្រូវតែរួមគ្នាគិតគូរ និងយកចិត្តទុកដាក់យ៉ាងខ្ពស់បំផុត ។ សម្តេចប្រមុខរដ្ឋស្តីទី បានវាយតម្លៃខ្ពស់ និងគាំទ្រចំពោះក្រសួងកិច្ចការនារី ដែលបានកំណត់យកប្រធានបទ “ស្ត្រីរួមគ្នារក្សាសន្តិភាព ដើម្បីអភិវឌ្ឍជាតិ” ជារបៀបវារៈសម្រាប់ខួបលើកទី១០៧ ទិវាអន្តរជាតិនារី ៨ មីនា ២០១៨ នេះ ។
ប្រធានបទនេះ សមស្របចំពោះការវិវត្តន៍ នៃសភាពការណ៍ពិភពលោក និងឆ្លើយតបទៅនឹងការប្តេជ្ញាចិត្ត និងឆន្ទៈនយោបាយខ្ពស់របស់រាជរដ្ឋាភិបាលកម្ពុជា ក្នុងការការពារសន្តិភាព អធិបតេយ្យភាព និងឯករាជ្យភាពរបស់កម្ពុជា ទប់ស្កាត់មិនឱ្យវិលត្រលប់ទៅរកអតីតកាលដ៏ឈឺចាប់ការបាក់បែកជាតិ និងសង្គ្រាមជាថ្មី ដែលបង្កនូវមហន្តរាយដ៏ធ្ងន់ធ្ងរចំពោះសង្គមជាតិ ។
សម្តេចវិបុលសេនាភក្តី សាយ ឈុំ ប្រមុខរដ្ឋស្តីទី ក៏បានគូសបញ្ជាក់ថា ដោយសារប្រទេសមានសុខសន្តិភាព គោលនយោបាយសមភាពយេនឌ័រ ត្រូវបានបង្កើតឡើងដោយដាក់បញ្ចូលទៅក្នុងយុទ្ធសាស្ត្រចតុកោណ ដំណាក់កាលទី១, ទី២, ទី៣ ដើម្បីកំណើនការងារ សមធម៌ និងប្រសិទ្ធភាព ដែលចាត់ទុកស្ត្រី ជាឆ្អឹងខ្នង នៃសេដ្ឋកិច្ច និងសង្គមជាតិ និងផែនការយុទ្ធសាស្ត្រនារីរតនៈ ដែលរៀបចំ និងសម្របសម្រួល ដោយក្រសួងកិច្ចការនារី បានធ្វើឱ្យការអនុវត្តគោលនយោបាយ និងកម្មវិធីសមភាពយេនឌ័រ ធ្វើឱ្យស្ត្រីក៏ដូចជាសង្គមជាតិទទួលបាននូវសមិទ្ធផលជាច្រើនលើគ្រប់វិស័យរហូតដល់សព្វថ្ងៃនេះ ។ សំឡេងស្ត្រីបានបង្កើននូវគ្រប់កម្រិត ទាំងថា្នក់ជាតិ ក៏ដូចថ្នាក់ក្រោមជាតិ ដែលនេះជាគោលនយោបាយ លើកកម្ពស់សមភាពយេនឌ័ររបស់រាជរដ្ឋាភិបាល និងរបស់គណបក្សប្រជាជនកម្ពុជា ដែលបានបង្កលក្ខណៈឱ្យស្ត្រីមានលទ្ធភាពចូលរួមកាន់តែច្រើនពីមួយអាណត្តិទៅមួយអាណត្តិ ។
សម្តេចប្រមុខរដ្ឋស្តីទី បានបញ្ជាក់បន្តថា សុខសន្តិភាពមានសារៈសំខាន់ណាស់ ដែលជាបំណងប្រាថ្នារបស់បុគ្គលគ្រប់រូប គ្រប់វ័យ ព្រោះបើមានសុខសន្តិភាពគឺមានការអភិវឌ្ឍរីកចម្រើនលើគ្រប់វិស័យ និងគ្រប់ទីកន្លែង ។ ផ្ទុយទៅវិញ ជម្លោះ និងអំពើហិង្សា គឺជាឧបសគ្គនៃវឌ្ឍនភាពសេដ្ឋកិច្ចសង្គមរបស់ប្រទេសយើង ធ្វើឱ្យប៉ះពាល់ដល់សុខុមាលភាពផ្លូវចិត្ត អារម្មណ៍ និងរាងកាយបុគ្គល ។ ជាពិសេសអំពើហិង្សាលើស្ត្រី គឺជាអំពើរំលោភសិទ្ធិមនុស្ស ដែលមានផលប៉ះពាល់អវិជ្ជមានខ្លាំងទៅលើស្ត្រី និងកូនរបស់ពួកគេ ដែលបន្សល់ទុកនូវផលវិបាកគ្រប់ជំនាន់ ។
ជាមួយគ្នានេះ សម្តេចប្រមុខរដ្ឋស្តីទីបានកត់សម្គាល់ថា ក្រសួងកិច្ចការនារីបានរួមចំណែកជាមួយស្ត្រីទូទាំងពិភពលោក ប្រារព្ធពិធីអបអរ សាទរខួបអនុស្សាវរីយ៍ទី១០៧ ទិវាអន្តរជាតិនារី ៨ មីនា ២០១៨ ដោយយកប្រធានបទ “ស្ត្រីរួមគ្នារក្សាសន្តិភាព ដើម្បីអភិវឌ្ឍជាតិ” ក្នុងគោលបំណងបន្តរំលេចពីតម្លៃនៃសន្តិភាព និងការលើកកម្ពស់វប្បធម៌ អហិង្សាដែលរាជរដ្ឋាភិបាលបាននឹងកំពុងគាំទ្រ ជំរុញឱ្យមានការចូលរួមពីគ្រប់ស្ថាប័ន រួមទាំងប្រជាជនបុរសស្ត្រី ដើម្បីអភិវឌ្ឍសង្គមឆ្ពោះទៅលើកកម្ពស់សិទិ្ធ ស្ថានភាព ជីវភាព ឋានៈតួនាទីរបស់ស្ត្រី ក៏ដូចជាសុ ខុមាល ភាពសង្គម ។ ក្នុងនាមសម្តេចប្រមុខរដ្ឋស្តីទី សម្តេច បានគាំទ្រចំពោះប្រធានបទ និងគោលបំណងដែលបានលើកឡើង ដែលសមស្របទៅ នឹងសភាព ការណ៍ពិភពលោក ។ សន្តិភាពគឺពិតជាមានសារៈសំខាន់ខ្លាំងណាស់ ដែលកម្ពុជាប្តេជ្ញារក្សាការពារឲ្យបានជាដាច់ខាត ដើ ម្បីឈានទៅសម្រេចគោល ដៅអភិវឌ្ឍប្រកបដោយចីរភាពនៅឆ្នាំ២០៣០ ៕
ចែករំលែកព័តមាននេះ