រាជធានីភ្នំពេញ ៖ ក្នុងបរិបទសម័យបច្ចេកវិទ្យាទំនើប គ្រប់បណ្ដាប្រទេសទាំងអស់នៅលើពិភពលោក បានផ្លាស់ប្តូរពីការធ្វើពាណិជ្ជកម្ម និងទំនាក់ទំនងរបស់ពួកគេដោយផ្ទាល់មកទំនាក់ទំនងតាមប្រព័ន្ធឌីជីថល ដែលអាចឲ្យពួកគេចំណេញពេលវេលា និងថវិកា ។ សម្រាប់កម្ពុជាវិញ…
រាជធានីភ្នំពេញ ៖ ក្នុងបរិបទសម័យបច្ចេកវិទ្យាទំនើប គ្រប់បណ្ដាប្រទេសទាំងអស់នៅលើពិភពលោក បានផ្លាស់ប្តូរពីការធ្វើពាណិជ្ជកម្ម និងទំនាក់ទំនងរបស់ពួកគេដោយផ្ទាល់មកទំនាក់ទំនងតាមប្រព័ន្ធឌីជីថល ដែលអាចឲ្យពួកគេចំណេញពេលវេលា និងថវិកា ។ សម្រាប់កម្ពុជាវិញ ក៏បានខិតខំប្រឹងប្រែងធ្វើយ៉ាងណា ឲ្យវិស័យបច្ចេកវិទ្យាដើរទាន់ជាមួយបណ្ដាប្រទេសផ្សេងៗផងដែរ ។
ក្នុងជំនួបពិភាក្សាជាមួយវិស័យឯកជន ដើម្បីជជែករកដំណោះស្រាយសមស្របក្នុងការអភិវឌ្ឍហេដ្ឋារចនាសម្ព័ន្ធបច្ចេកវិទ្យានៅក្នុងប្រទេសកម្ពុជា នាព្រឹកថ្ងៃទី៦ មីនា លោកបណ្ឌិត កាន ច័ន្ទមេត្តា អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ បានលើកឡើងថា ដើម្បីអភិវឌ្ឍន៍សេដ្ឋកិច្ចឌីជីថល រាជរដ្ឋាភិបាលកម្ពុជា តាមរយៈក្រសួងប្រៃសណីយ៍ និងទូរគមនាគមន៍ បាននិងកំពុងយកចិត្តទុកដាក់លើការបង្កើតបរិយា កាសអំណោយផលសម្រាប់យុវជន ក្នុងការប្រើប្រាស់អំណោយទានផ្នែកបច្ចេកវិទ្យាគមនាគមន៍ និងព័ត៌មានរបស់ខ្លួន បង្កើត Startup ក្នុងវិស័យនេះផងដែរ ។
លោកថ្លែងថា ៖« ក្រសួងប្រៃសណីយ៍ និងទូរគមនាគមន៍បាននិងកំពុងសហការជាមួយក្រសួងសិប្បកម្ម និងឧស្សាហកម្ម និងក្រសួងពាក់ព័ន្ធដើម្បីជំរុញលើកទឹកចិត្តដល់ Startup និងសហគ្រាសខ្នាតតូច និងមធ្យមផងដែរ » ។
លោកបន្តថា កម្ពុជាបានបង្កើតមូលនិធិចំនួន២ ដែលបានចូលរួមចំណែកក្នុងការអភិវឌ្ឍសេដ្ឋកិច្ចឌីជីថលដែរនោះគឺ មូលនិធិកាតព្វកិច្ចសេវាសកលវិស័យទូរគមនាគមន៍ ដែលមូលនិធិនេះជួយដល់ការកសាងហេដ្ឋារចនាសម្ព័ន្ធទូរគមនាគមន៍នៅតាមតំបន់ជន បទ។ ចំណែកមូលនិធិមួយទៀត គឺមូលនិធិការកសាងសមត្ថភាពស្រាវជ្រាវ ការអភិវឌ្ឍលើវិស័យទូរគមនាគមន៍ និងបច្ចេកវិទ្យាគមន៍និងព័ត៌មាន ដែលមូលនិធិនេះជួយដល់ការអប់រំ ការស្រាវជ្រាវ និងនវានុវត្តន៍ក្នុងវិស័យបច្ចេកវិទ្យាគមនាគមន៍ និងព័ត៌មាន ។
លោកថា ៖« តាមរយៈមូលនិធិនេះ មជ្ឈមណ្ឌលនវានុវត្តន៍ក្នុងវិស័យបច្ចេកវិទ្យាគមនា គមន៍ និងព័ត៌មានមួយ នឹងត្រូវសាងសង់នៅចុងខែមីនា ឆ្នាំ២០១៨នេះ ដោយមជ្ឈមណ្ឌលនវានុវត្តន៍នេះនឹងក្លាយជាកន្លែងអំណោយផលមួយដល់យុវជនសិក្សា និងប្រឹក្សាយោបល់ ក៏ដូចជាបង្ហាញពីសមត្ថភាពរបស់ខ្លួនផងដែរ » ។
លោកបញ្ជាក់ថា ការចូលរួមរបស់ក្រសួងលើការកាត់បន្ថយគម្លាតឌីជីថលរវាងប្រជាពលរដ្ឋទីក្រុង និងជនបទ តាមរយៈការកសាងបណ្តាញទូរគមនាគមន៍ ការអប់រំ និងការស្រាវជ្រាវ ក៏ដូចជាការបង្កើតបរិយាកាសសម្រាប់យុវជននិងប្រតិបត្តិករ តាមរយៈក្រសួងតែម្ខាង គឺពិបាកនឹងទទួលបានភាពជោគជ័យណាស់ ។ ដូច្នេះ លោកស្នើឱ្យមានការចូលរួមពីវិស័យឯកជន ដើម្បីរួមចំណែកអភិវឌ្ឍន៍ ក៏ដូចជាសហការជាមួយក្រសួងបង្កើតបរិយាកាសអំណោយផលដល់ការអភិវឌ្ឍសេដ្ឋកិច្ចឌីជីថលនេះ ។
តំណាងមកពីក្រុមហ៊ុនផលិតទូរស័ព្ទ Huawei បានលើកឡើងថា ដើម្បីជំរុញដល់ការអភិវឌ្ឍសេដ្ឋកិច្ចឌីជីថល ចាំបាច់ណាស់ត្រូវអភិវឌ្ឍន៍វិស័យបច្ចេកវិទ្យាគមនាគមន៍ និងព័ត៌មាន ឱ្យបានប្រសើរ ព្រោះថា បច្ចេកវិទ្យាគមនាគមន៍និងព័ត៌មាន មានឥទ្ធិពលលើសេដ្ឋកិច្ចឌីជីថល ។
ក្នុងកិច្ចពិភាក្សានេះ តំណាងក្រុមហ៊ុនក៏បានធ្វើបទបង្ហាញអំពីទស្សនទាន ដែលជាធាតុចូលក្នុងការបង្កើតផែនការជាតិអភិវឌ្ឍន៍វិស័យបច្ចេកវិទ្យាគមនាគមន៍ និងព័ត៌មាន (ប.គ.ព) នៅកម្ពុជា សម្រាប់សេដ្ឋកិច្ចឌីជីថលឆ្នាំ២០១៨ ដល់ឆ្នាំ២០៣២ផងដែរ ។ បទបង្ហាញនេះផ្តោតលើ៤ចំណុចសំខាន់ៗគឺ ១-ចក្ខុវិស័យ និងតម្រូវការរបស់កម្ពុជា, ២-ការប្រៀបធៀបជាមួយអន្តរជាតិ និងការវិភាគលើគម្លាត, ៣-គោលដៅអភិវឌ្ឍន៍ឌីជីថលនៅកម្ពុជា និង៤-យុទ្ធសាស្ត្រ និងការអនុវត្ត ។
គួររំលឹកថា កាលពីថ្ងៃទី២២ មករា ក្រសួងប្រៃសណីយ៍ និងទូរគមនាគមន៍បានប្រកាសដាក់ឲ្យអនុវត្តជាផ្លូវការនូវ «គម្រោងអភិវឌ្ឍន៍ធនធានមនុស្សផ្ដោតលើការពង្រឹងសមត្ថភាពផ្នែកមូលដ្ឋានគ្រឹះ និងជំនាញបច្ចេកវិទ្យាគមនាគមន៍និងព័ត៌មាន ដើម្បីធ្វើឲ្យប្រសើរឡើងនៃសេដ្ឋកិច្ចនៅមូលដ្ឋាន » សម្រាប់ការអភិវឌ្ឍនិងលើកកម្ពស់ធនធានមនុស្ស ជំនាញផ្នែកព័ត៌មានវិទ្យានៅមូលដ្ឋាន ដោយអនុវត្តនៅក្នុងរាជធានី/ខេត្តចំនួន៤គឺ ៖ ភ្នំពេញ, បាត់ដំបង, បន្ទាយមានជ័យ និងស្វាយរៀង ហើយរំពឹងថា គម្រោងនេះអាចរួមចំណែកក្នុងការអភិវឌ្ឍ និងលើកកម្ពស់ធនធានមនុស្សជំនាញផ្នែកព័ត៌មានវិទ្យានៅក្នុងប្រទេសកម្ពុជា និងនាំមកនូវការជំរុញសេដ្ឋកិច្ចក្នុងប្រទេស ជាពិសេសជួយលើកកម្ពស់ជីវភាពរស់នៅរបស់ប្រជាពលរដ្ឋ ។
បើតាមក្រសួងប្រៃសណីយ៍ គម្រោងនេះបានចាប់ផ្តើមអនុវត្តពីខែតុលា ឆ្នាំ២០១៧ ដល់ខែកញ្ញា ឆ្នាំ២០២១ ដែលមានរយៈពេល៤ឆ្នាំ ដោយផ្តោតលើសកម្មភាពធំៗចំនួន៣រួមមាន ការបណ្តុះបណ្តាលព័ត៌មានវិទ្យាជាលក្ខណៈអនុវត្តជាក់ស្តែង, ការលើកកម្ពស់បច្ចេកវិទ្យានៅតាមតំបន់ជនបទ និងការបង្កើតការងារព័ត៌មានវិទ្យា ។
សកម្មភាពចម្បងរបស់គម្រោងនេះ គឺជាការបណ្តុះបណ្តាលព័ត៌មានវិទ្យាជាលក្ខណៈអនុវត្តជាក់ស្តែង ដែលមាន៣វគ្គដូចខាងក្រោម ៖
១-វគ្គសិក្សាមូលដ្ឋានដែលស្មើនឹងការប្រឡង IP (IT Passport) របស់អង្គការ ITPEC ។
២-វគ្គសិក្សាមធ្យម ដែលស្មើនឹងការប្រឡង FE (Fundamental IT Engineers) របស់ អង្គការITPEC ។
៣-វគ្គសិក្សាកម្រិតខ្ពស់ ដែលស្មើនឹងការប្រឡងAP (Applied IT Engineers) របស់ អង្គការITPEC ៕
ចែករំលែកព័តមាននេះ