រាជធានីភ្នំពេញ ៖ លោកស្រី ជា ស៊ីណា ឃួង ស្រេង ភរិយាអភិបាលរាជធានីភ្នំពេញបានលើកឡើងថា បច្ចុប្បន្នទស្សនថា នារីបង្វិលកន្ទុយចង្គ្រានមិនជុំ ឬថា ស្ត្រីចេះត្រឹមធ្វើការផ្ទះ គឺលែងមានន័យទៀតហើយ ដោយសារពេលបច្ចុប្បន្ននេះ នារីក្លាយជាដៃគូរមិនអាចខ្វះបាន ជាមួយបុរស និងបានចូលរួមចំណែកយ៉ាង សំខាន់ ក្នុងដំណើរការអភិវឌ្ឍន៍ជាតិមាតុភូមិដែលបានស្តែងឡើង តាមរយៈសមត្ថភាពដឹកនាំរបស់នារី ជា ថ្នាក់ដឹកនាំនៅតាមបណ្តាក្រសួង ស្ថាបន័ រដ្ឋបាលថ្នាក់ក្រោមជាតិ អង្គភាពរដ្ឋ និងឯកជន ។
ជាពិសេសក្រុមប្រឹក្សាជាតិកម្ពុជា ដើម្បីស្ត្រី និងកាកបាទក្រហមកម្ពុជាក្រោមការដឹកនាំរបស់សម្តេចព្រះមហាក្សត្រីនរោត្តមុនី នាថ សីហនុ ព្រះវររាជមាតាជាតិខ្មែរ គង់ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិតប៊ុនរ៉ានី ហ៊ុន សែន ជាប្រធានកាកបាទក្រហមកម្ពុជា បានបំពេញការងារជាច្រើន រួមចំណែកលើកកម្ពស់សិទ្ធិនារី និងកុមារ ការប្រយុទ្ធប្រឆាំងគ្រឿងញៀន យកចិត្តទុកដាក់លើទុរគតជន ក្មេងកំព្រា ព្រមទាំងសកម្មភាពមនុស្សធម៌ជាច្រើនទៀត ។
លោកស្រី ជា ស៊ីណា ឃួង ស្រេង ជាភរិយាលោក ឃួង ស្រេង អភិបាលរាជធានីភ្នំពេញ និងជាអនុប្រធានគណៈកម្មាធិការសាខាសមាគមនារីកម្ពុជា ដើម្បីសន្តិភាព និងអភិវឌ្ឍរាជធានីភ្នំពេញបានមានប្រសាសន៍បែបនេះ ក្នុងពិធីសំណេះសំណាលជាមួយបងប្អូននារីជាបុគ្គលិក កម្មករ ក្រោមឧឱវាទ មន្ទីរសាធារណការ និងដឹកជញ្ជូនរាជធានីភ្នំពេញ នាព្រឹកថ្ងៃទី៧ ខែមិនានេះ នៅមន្ទីរសាធារ និងដឹកជញ្ជូនរាជធានីភ្នំពេញ ដើម្បីចូលរួមអបអរសាទរទិវាអន្តរជាតិនារី៨មិនា ខួបលើកទី១០៧ ។
លោកស្រីជា ស៊ីណា ឃួង ស្រេង បានកោតសរសើរចំពោះបងប្អូននារីដែលបម្រើការងារមន្ទីរសាធារណការ និងដឹកជញ្ជូនរាជធានីភ្នំពេញ ដែលបានបំពេញការងារច្រើនណាស់កន្លងមក ដើម្បីចូលរួមអភិវឌ្ឍរាជធានីភ្នំពេញ ។
លោកសាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញបានលើកឡើងថា បន្ថែមលើការងារស្នូលនៅក្នុងអង្គភាព មន្ត្រីរាជការនិយោជិតជានារីក៏ត្រូវទទួលបន្ទុកនៅឯគេហដ្ឋានក្នុងឋានៈ ជា ភរិយា, ជាម្តាយ,ជាបងស្រី, ជាប្អូនស្រីប្រកបដោយភាពអំណត់ខិតខំអប់រំណែនាំ ថែបំប៉នទាំងស្មារតី និង សកម្មភាព ដើម្បីគ្រួសារមានសុភមង្គល ។ លោកបន្តថា មន្ទីរសាធារណការ និងដឹកជញ្ជូនរាជធានីភ្នំពេញ គឺជាមន្ទីរដែលមានបុគ្គលិកកម្មករជានារីច្រើងជាងគេ ដែលភាគច្រើន បងប្អូនទាំងនោះបំពេញក្រោម កម្តៅ ថ្ងៃ ក្រោមភ្លៀងក្នុងបុព្វហេតុអភិវឌ្ឍរាជធានីភ្នំពេញដូចជា ៖ កសាងថែទាំសួនច្បារ ,ផ្លូវថ្នល់, ប្រពន្ធ័លូ ,អគ្គិសនីបំភ្លឺសាធារណៈជាដើម មិនចាញ់បុរសឡើយ ។
ក្នុងពិធីសំណេះសំណាលនោះ លោកស្រី ជា ស៊ីណា ឃួងស្រេង ក៏បានផ្តល់វត្ថុអនុស្សាវរីយ៍ដល់បងប្អូននារីនៅមន្ទីសាធារណការចំនួន២៦១នាក់ ក្នុងម្នាក់ទទួលបានក្រណាត់សឹង្ហ១ដុំ និងថវិកា២ម៉ឺនរៀលផងដែរ ៕
ចែករំលែកព័តមាននេះ