រាជធានីភ្នំពេញ ៖ ប្រធានបទ «ស្ត្រីរួមគ្នារក្សាសន្តិភាព ដើម្បីអភិវឌ្ឍន៍ជាតិ» នេះជាប្រធានបទនៃទិវានារីអន្តរជាតិខួបលើកទី១០៧ ដែលរៀបចំនៅទីស្តីការក្រសួងការបរទេស និងសហប្រតិបត្តិការអន្តរជាតិ ដោយមានការចូលរួមអធិបតីភាពដោយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងភរិយា និងមានស្ត្រីជាមន្ត្រីរាជការជាច្រើននាក់បានចូលរួមកាលពីរសៀលថ្ងៃទី៧ ខែមីនា ឆ្នាំ២០១៨។
ថ្លែងក្នុងពិធីនោះលោកទេសរដ្ឋមន្ត្រី ប្រាក់ សុខុន បានលើកឡើងថា ក្រសួងការបរទេសរៀបចំវិធីនេះឡើង ដើម្បីអបអរសាទរ និងរំលឹកប្រវត្តិនៃការតស៊ូ និងជោគជ័យរបស់ស្ត្រីក្នុងការទាមទារដណ្តើមយកមកនូវសិទ្ធិខាងសេដ្ឋកិច្ច សង្គម និងនយោបាយមានជាង១០០ឆ្នាំមុននេះ សិទ្ធិទាំងនោះពុំត្រូវបានប្រគល់ជូនស្ត្រីឡើយ។
លោកទេសរដ្ឋមន្ត្រីបានលើកឡើងថា ពីប្រធានបទដែលក្រសួងកិច្ចការនារីបានលើកឡើងប្រធានបទ «ស្ត្រីរួមគ្នារក្សាសន្តិភាព ដើម្បីអភិវឌ្ឍជាតិ»ថា ស្ត្រីទាំងអស់ត្រូវរួមគ្នាមិនមែនស្ត្រីខ្លួនទេ។ រក្សាសន្តិភាព គឺមិនឲ្យបាត់បង់សន្តិភាពដែលយើងមាន ឬទទួលបានកុំឲ្យបាត់បង់ទៅវិញ។ លោកថា ៖ «សន្តិភាពមានតម្លៃណាស់សម្រាប់ជាតិ សម្រាប់ប្រទេសជាតិ សម្រាប់ប្រជាជនគ្រប់រូប»។
លោកទេសរដ្ឋមន្ត្រីបានលើកឡើងថា ៖ ជាឧទាហរណ៍នៅថ្ងៃ១៧ មេសា ១៩៧៥ ប្រជាពលរដ្ឋនៅទីក្រុងភ្នំពេញ បានចេញពីផ្ទះយ៉ាងពពាក់ពពួនមកអបអរសាទរការចូលមករបស់កងទ័ពឈុតខ្មៅទាំងមិនស្គាល់ពួកគេ ទាំងមិនដឹងពីអ្វី ដែលមេដឹកនាំខ្មែរក្រហមគ្រោងទុកសម្រាប់ពួកគេ។ តែក្រោយមកវាបានក្លាយទៅជារឿងមួយផ្សេងទៅវិញ។
លោកទេសរដ្ឋមន្ត្រីបានលើកឡើងថា ៖ ហេតុអ្វី? គឺព្រោះប្រជាជនបានរង់ចាំសង្ឃឹមថា ប្រទេសជាតិមានសន្តិភាពឡើងវិញ ហើយដែលទន្ទឹងចាំអស់រយៈពេលជាយូរ ព្រោះពួកគេបានដឹងពីតម្លៃនៃសន្តិភាព បន្ទាប់ពីបានរងទុក្ខវេទនារយៈពេល៥ឆ្នាំក្រោយពេលរដ្ឋប្រហារឆ្នាំ១៩៧០។
លោកបានបញ្ជាក់បន្ថែមពីន័យពាក្យបន្ត «ដើម្បីអភិវឌ្ឍជាតិ» ឥឡូវនេះនៅគ្រប់វេទិកាអន្តរជាតិ និងតំបន់ពាក្យត្រូវបានគេផ្សាភ្ជាប់គ្នា គឺសន្តិភាព និងអភិវឌ្ឍ។ «គ្មានសន្តិភាពគឺគ្មានការអភិវឌ្ឍ។ គ្មានការអភិវឌ្ឍ ក៏គ្មានសន្តិភាពស្ថិតស្ថេរបានយូរដែរ»៕
ចែករំលែកព័តមាននេះ