ប្រទេសស្រីលង្កា ៖ ប្រទេសស្រីលង្កានាថ្ងៃទី៦ មីនា បានចេញការប្រកាសអាសន្នរយៈពេល១០ថ្ងៃក្រោយការបះបោរសំដៅប្រឆាំងជនជាតិភាគតិចអ៊ិស្លាម ព្រមទាំងអំពើហិង្សានានាបណ្តាលឱ្យមនុស្សស្លាប់២នាក់ និងការបំផ្លិចបំផ្លាញផ្ទះចំនួនប្រមាណ១០០ខ្នង ព្រមទាំងហាងទំនិញទាំងឡាយនៅតំបន់មួយនាភាគកណ្តាលប្រទេស ។ រដ្ឋាភិបាលបញ្ជាក់ថា…
ប្រទេសស្រីលង្កា ៖ ប្រទេសស្រីលង្កានាថ្ងៃទី៦ មីនា បានចេញការប្រកាសអាសន្នរយៈពេល១០ថ្ងៃក្រោយការបះបោរសំដៅប្រឆាំងជនជាតិភាគតិចអ៊ិស្លាម ព្រមទាំងអំពើហិង្សានានាបណ្តាលឱ្យមនុស្សស្លាប់២នាក់ និងការបំផ្លិចបំផ្លាញផ្ទះចំនួនប្រមាណ១០០ខ្នង ព្រមទាំងហាងទំនិញទាំងឡាយនៅតំបន់មួយនាភាគកណ្តាលប្រទេស ។
រដ្ឋាភិបាលបញ្ជាក់ថា ការសម្រេចចិត្តបែបនេះជាលើកដំបូងចាប់តាំងពី៧ឆ្នាំមកហើយ ធ្វើឡើងក្រោយបរាជ័យរបស់ប៉ូលិសក្នុងការបញ្ឈប់អំពើហិង្សាក្នុងតំបន់ KANDY ។ កងយោធា និងកងកម្លាំងពិសេសរបស់ប៉ូលិសប្រដាប់ដោយអាវុធត្រូវបានដាក់ពង្រាយដើម្បីស្តារសណ្តាប់ធ្នាប់ឡើងវិញក្នុងតំបន់នេះ ដែលពួកបះបោរបានរំលោភបំពានបម្រាមគោចរណ៍ដែលប្រកាសកាលពីថ្ងៃទី៥ មីនា ។
នៅមុខសភានាយករដ្ឋមន្ត្រីស្រីលង្កា លោក RANIL WICKREMESINGHE ថ្លែងថា រដ្ឋាភិបាលចាត់រាល់វិធានការដើម្បីការពារប្រជាជនពិសេសបណ្តាជនអ៊ិស្លាម ។ លោកគូសបញ្ជាក់ថា ការស៊ើបអង្កេតត្រូវបានបើកធ្វើលើបរាជ័យក្នុងសកម្មភាពរបស់ប៉ូលិសដែលអាចឱ្យពួកបះបោរសិង្ហហ្គាឡេដុតព្រះវិហារអ៊ិស្លាមទាំងឡាយ ដុតផ្ទះ ព្រមទាំងហាងទំនិញនានារបស់ពួកអ៊ិស្លាម ។
សាកសពបុរសអ៊ិស្លាមអាយុ២៤ឆ្នាំម្នាក់ត្រូវបានរកឃើញនាថ្ងៃទី៦ មីនា ក្នុងផ្ទះរបស់គេដែលរងការដុតបំផ្លាញ ។ ប៉ូលិសបញ្ជាក់ថា ពួកបះបោរជាង២០នាក់ ត្រូវចាប់ខ្លួន ។
អំពើហិង្សានៅតំបន់ដាំតែនោះផ្ទុះឡើងក្រោយការស្លាប់ជនសិង្ហហ្គាឡេកាន់ពុទ្ធសាសនាម្នាក់ ដោយសារការវាយប្រហាររបស់ហ្វូងមនុស្សកាលពីសប្តាហ៍មុន ៕
ចែករំលែកព័តមាននេះ