ខេត្តព្រះសីហនុ ៖ បុគ្គលិកធ្វើការនៅកាស៊ីណូឡាយ អ៊ិនស៊ីធី ដែលមានទីតាំងស្ថិតនៅតាមបណ្តោយវិថីលេខ៥០០ ឆ្នេរអូរឈើទាលនៅវេលាម៉ោង៧និង០០នាទីយប់ ថ្ងៃទី០៦ ខែមិនា ឆ្នាំ២០១៨ ស្ថិតនៅក្នុងក្រុម១៧ ភូមិ០៤ សង្កាត់លេខ០៤ ក្រុង- ខេត្តព្រះសីហនុ ។ ដែលបុគ្គលិកកាស៊ីណូមានចំនួន៧៣នាក់ មានប្រុសស្រី បានមកប្រមូលផ្តុំគ្នា នៅខាងមុខកាស៊ីណូ តវ៉ាជាមួយថៅកែរកាស៊ីណូ ក្នុងគោលបំណងទាមទារប្រាក់បៀវត្សប្រចាំខែកុម្ភៈ ឆ្នាំ២០១៨ ដែលថៅកែមិនបានបើកឲ្យបុគ្គលិកកម្មករ-កម្មការិនី ក្រោយពីមានការប្រមូលផ្តុំខាងលើថៅកែរកាស៊ីណូបានរត់គេចខ្លួនបាត់ ។
នៅក្នុងហេតុការណ៍ខាងលើសង្កេតឃើញមានវត្តមានលោក យ៉ូវ ខេមរ៉ា ប្រធានមន្ទីរការងារបណ្តុះបណ្តាលវិជ្ជាជីវចុះអន្តរាគមន៍ស្វែងរកដំណោះស្រាយជូនដល់បុគ្គលិកកម្មករ-កម្មការិនី ប៉ុន្តែនៅមិនទាន់ទទួលបានលទ្ធផលជូនដល់បុគ្គលិកកម្មករ-កម្មការិនីនៅឡើយទេ ។ សមត្ថកិច្ចនគរបាលនៃស្នងការដ្ឋាននគរបាលខេត្តព្រះសីហនុនៅតែបន្តកិច្ចការពារយាមល្បាតមិនឲ្យមានករណីហិង្សាកើតឡើងផងដែរ ។
លោកយ៉ូវ ខេមរ៉ា ប្រធានមន្ទីរការងារបណ្តុះបណ្តាលវិជ្ជាជីវខេត្តព្រះសីហនុបានឲ្យដឹងថា នៅព្រឹកថ្ងៃទី០៧ខែមិនា ឆ្នាំ២០១៨កន្លងមកនេះ លោកបានទទួលពាក្យបណ្តឹងសុំជួយអន្តរាគមន៍០១ច្បាប់ ចុះថ្ងៃទី០៦ ខែមិនា នេះរបស់បុគ្គលិកកម្មករ-កម្មការិនីកាស៊ីណូខាងលើ បានប្តឹងនាយកគ្រប់គ្រងកាស៊ីណូ ដែលបានរត់គេចខ្លួន និងមិនបានទូទាត់ប្រាក់បៀរវត្សប្រចាំខែកុម្ភៈ ឆ្នាំ២០១៨ ជូនដល់បុគ្គលិកកម្មករ-កម្មការិនីក្នុងកាស៊ីណូខាងលើ ។
លោកបានបន្តបន្ថែមឲ្យដឹងទៀតថា បន្ទាប់ពីទទួលបានពាក្យបណ្តឹងលោក និងអនុវត្តទៅតាមមាត្រា១១៧ច្បាប់ស្តីពីការបើកប្រាក់ឲ្យបុគ្គលិក កម្មករ- កម្មការិនីរបស់និយោជកដោយគ្មានសមហេតុផល ធិការការងារត្រូវដាក់កំហិតដល់និយោជក ឲ្យបើកប្រាក់ឈ្នួលឲ្យទៅបុគ្គលិកកម្មករនិយោជិតដោយកម្រិតរយៈពេលដែលត្រូវបើកប្រាក់ឈ្នួលនោះ ។
ហើយកាលណាប្រាក់ឈ្នួលនោះ មិនបានបើកក្នុងរយៈពេលដែលបានកំណត់នោះ អធិការការងារត្រូវធ្វើកំណត់ហេតុ ហើយបញ្ជូនសំណុំរឿងនេះ ដោយឥតគិតសោហ៊ុយទៅតុលាការមានសមត្ថកិច្ចដែលអាចចាត់គ្រប់វិធានការណ៍ រក្សាទ្រព្យសម្បត្តិទុកជាប្រយោជន៍កម្មករ និយោជិត ព្រមទាំងចាត់តាំងអភិបាលបណ្តោះអាសន្នមួយរូបផង បន្ទាប់មកអធិការការងារអាចប្តឹងចោទប្រកាន់គ្រប់បែបយ៉ាងឲ្យនិយោជក បំពេញកាតព្វកិច្ចចំពោះបុគ្គលិកកម្មករនិយោជិត ៕
ចែករំលែកព័តមាននេះ