ខេត្តរតនគិរី ៖ ជនសង្ស័យម្នាក់ត្រូវសមត្ថកិច្ចចាប់ខ្លួនពីបទ «វាយសម្លាប់កូនប្រសា» ដោយទ្រាំមិនបាននឹងអំពើហិង្សាមកលើកូនស្រីរបស់ខ្លួនរាល់ថ្ងៃពេក អំពើហិង្សាមានស្ថានទម្ងន់ដោយយកគល់ឫស្សីវាយទៅលើកូនប្រសាររបស់ខ្លួនរហូតដល់ស្លាប់បាត់បង់ជីវិត ។
ហេតុការណ៍នេះបានកើតឡើងនៅវេលាម៉ោង០២និង១០នាទីរសៀល ថ្ងៃទី០៦ ខែមីនា ឆ្នាំ២០១៨ ស្ថិតនៅភូមិ១ (អូរខ្វេះ) ឃុំត្រពាំងច្រេស ស្រុកកូនមុំ ខេត្តរតនគិរី ។
ប្រភពពីមន្ត្រីអធិការនគបាលស្រុកកូនមុំ បានឱ្យដឹងថា ជនសង្សយ័មានឈ្មោះ ប្រាក់ ភារុន ភេទប្រុស អាយុ៤៩ឆ្នាំ មានទីលំនៅភូមិឃុំកើតហេតុខាងលើ បានយកគល់ឫស្សីវាយទៅលើជនរងគ្រោះត្រូវជាកូនប្រសាររហូតដល់ស្លាប់នៅនឹងកន្លែងភ្លាមៗ ។
ជនរងគ្រោះជាកូនប្រសាដែលត្រូវឪពុកក្មេកវាយនឹងដំបងគល់ឫស្សីរហូតដល់ស្លាប់នោះ ឈ្មោះ សេង ចាន់ដឿន ភេទប្រុស អាយុ៣៨ឆ្នាំ មានទីលំនៅជាមួយគ្នា ។
តាមប្រភពពីកម្លាំងកងរាជអាវុធហត្ថស្រុកកូនមុំ បានឱ្យដឹងថា អំពើហិង្សាមួយនេះផ្តើមចេញពីជនរងគ្រោះបង្កឡើងដោយដើរផឹកស៊ីស្រវឹងរករឿងឈ្លោះ និងប្រើអំពើហិង្សាដល់ប្រពន្ធកូនជារៀងរាល់ថ្ងៃ តែងតែជេរបញ្ចោរដៀលពូជរៀលដាលដល់ឪពុកក្មេកម្តាយក្មេកជារើយៗ ស្ទើរឪពុកក្មេកទ្រាំលែងបានម្តងៗ ។
ប្រភពបន្តថា ក្នុងថ្ងៃកើតហេតុ ជនរងគ្រោះនោះបានបង្កទំនាស់យ៉ាងខ្លាំង និងប្រើអំពើហិង្សាក្នុងគ្រួសារ និងយកកាំបិតខ្វែវដេញកាប់ឪពុកក្មេកតែត្រូវឪពុកក្មេកឆក់បានគល់ឫស្សីវាយសំពងបានមុនរហូតដល់ស្លាប់នៅនឹងកន្លែងតែម្តងទៅ ។
ក្រោយកើតហេតុ កម្លាំងកងរាជអាវុធហត្ថ និងអធិការដ្ឋានស្រុកកូនមុំ បានចុះដល់កន្លែងកើតហេតុ ធ្វើការឃាត់ខ្លួនភ្លាមៗ ដើម្បីកសាងសំនុំរឿងបញ្ជូនខ្លួនទៅសាលាដំបូងខេត្តចាត់ការតាមនីតិវិធី ៕
ចែករំលែកព័តមាននេះ