រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានបញ្ជាក់នៅថ្ងៃពុធ ទី៧ ខែមីនានេះថា សម្តេចនឹងដឹកនាំគណៈប្រតិភូកម្ពុជាទៅចូលរួមកិច្ចប្រជុំកំពូលមួយនៅទីក្រុងស៊ីដនី ប្រទេសអូស្ត្រាលី…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានបញ្ជាក់នៅថ្ងៃពុធ ទី៧ ខែមីនានេះថា សម្តេចនឹងដឹកនាំគណៈប្រតិភូកម្ពុជាទៅចូលរួមកិច្ចប្រជុំកំពូលមួយនៅទីក្រុងស៊ីដនី ប្រទេសអូស្ត្រាលី ទីកន្លែងដែលសម្តេចនឹងមានកិច្ចពិភាក្សាទ្វេភាគីជាមួយនាយករដ្ឋមន្ត្រីអូស្ត្រាលី លោក Malcolm Bligh Turnbull។
ថ្លែងនៅឯកម្មវិធីជួបសំណេះសំណាល ជាមួយកម្មករ-កម្មការិនីប្រមាណជាង១ម៉ឺននាក់ នៅខេត្តកណ្តាលសម្តេចតេជោ ហ៊ុន សែន បានបញ្ជាក់ថា សម្តេចនឹងចាកចេញពីកម្ពុជាទៅចូលរួមកិច្ចប្រជុំកំពូលពិសេសអាស៊ាន-អូស្ត្រាលី រវាងនាយករដ្ឋមន្ត្រីអូស្ត្រាលី និងប្រមុខដឹកនាំអាស៊ាន នៅល្ងាចថ្ងៃព្រហស្បត្តិ៍ទី ១៥ ខែមីនា ឆ្នាំ២០១៨ ។
សម្តេតេជោ ហ៊ុន សែន មានប្រសាសន៍បញ្ជាក់ថា ៖ «ហើយតាមកម្មវិធីគ្រោងទុក បើគ្មានការប្រែប្រួលអីទេ ម៉ោង ១និង៣០នាទី ដល់ម៉ោង ២និង១៥នាទីរសៀល គឺរយៈពេល ៤៥ នាទី ជាការសន្ទនាទ្វេភាគីរវាងខ្ញុំនឹងនាយករដ្ឋមន្ត្រីអូស្ត្រាលីដែលជាម្ចាស់ផ្ទះនៃការប្រជុំកំពូលអាស៊ាន-អូស្ត្រាលី» ។ ជាមួយគ្នានោះផងដែរ សម្តេចនាយករដ្ឋមន្ត្រីក៏គ្រោងនឹងជួបជុំជាមួយនឹងបងប្អូនខ្មែររស់នៅប្រទេសអូស្ត្រាលីពេលមានវត្តមាននៅទីក្រុងស៊ីដនី ប្រទេសអូស្ត្រាលី ។
ប្រទេសអូស្ត្រាលីនឹងធ្វើជាម្ចាស់ផ្ទះកិច្ចប្រជុំកំពូលអាស៊ាន-អូស្ត្រាលីនៅថ្ងៃទី ១៧-១៨ ខែមីនា ឆ្នាំ២០១៨ នៅទីក្រុងស៊ីដនី កិច្ចប្រជុំកំពូលនេះនឹងត្រូវដឹកនាំដោយលោកនាយករដ្ឋមន្ត្រីអូស្ត្រាលីលោក Malcolm Bligh Turnbull ដោយផ្តោតលើការលើកកំពស់សន្តិសុខនិងវិបុលភាពក្នុងតំបន់។ នេះគឺជាលើកទី ១ ហើយដែលប្រទេសអូស្ត្រាលីនឹងរៀបចំកិច្ចប្រជុំកំពូលពិសេសជាមួយមេដឹកនាំនៃប្រទេសជាសមាជិកអាស៊ានទាំង ១០ ប្រទេស។ កិច្ចប្រជុំកំពូលខាងមុខនេះ ក៏មានជាវេទិកាតុមូល (CEO Forum) ដែលមានអ្នកជំនួញប្រមាណជាង ៦០នាក់ មកពីអាស៊ីអាគ្នេយ៍ចូលរួមជជែកពិភាក្សាពាណិជ្ជកម្មឌីជីថល (digital trade), ក៏ដូចជាវិស័យទេសចរណ៍ កិច្ចប្រជុំកំពូលពាណិជ្ជកម្ម (Business Submit) និងសន្និសីទប្រឆាំងភេរវកម្ម (Counter-terrorism conference)។
អ្នកនាំពាក្យមួយរូបក្រុមការងារពិសេសនៃកិច្ចប្រជុំកំពូលអាស៊ាន (ASEAN special summit taskforce) បានឱ្យដឹងថា អូស្ត្រាលីបានក្លាយជាដៃគូសន្ទនារបស់អាស៊ានជាលើកដំបូងនៅក្នុងឆ្នាំ១៩៩៤ ហើយទំនាក់ទំនងទ្វេភាគីរបស់អូស្ត្រាលី គឺល្អខ្លាំងណាស់ ជាមួយបណ្តាប្រទេសជាសមាជិកអាស៊ាន ។ លោកបានបន្តថា មុនឈានដល់កិច្ចប្រជុំកំពូលពិសេស AUSTRAC នឹងដំណើរការជាលើកដំបូងអាស៊ាន – អូស្ត្រាលី Codeathon ដើម្បីបង្កើនកិច្ចសហការរវាងអង្គភាពស៊ើបការណ៍ហិរញ្ញវត្ថុ (FIUs) ធនាគារអភិវឌ្ឍន៍ និងដៃគូដទៃទៀតនៅក្នុងតំបន់ ដើម្បីប្រឆាំងនឹងការផ្តល់ហិរញ្ញប្បទានដល់អំពើហិង្សានិងបង្កើនសន្តិសុខតាមអ៊ីនធឺណិត។
អ្នកនាំពាក្យមួយរូបក្រុមការងារពិសេសនៃកិច្ចប្រជុំកំពូលអាស៊ាន ដដែលបានបន្ថែមថា៖ «អូស្ត្រាលីបានធ្វើកិច្ចសហប្រតិបត្តិការយ៉ាងជិតស្និទ្ធជាមួយដៃគូអាស៊ាន។ ជាមួយអាស៊ាន យើងជាដៃគូសន្ទនាដំបូងគេបង្អស់ជាមួយអាស៊ាន ហើយយើងខិតខំយ៉ាងខ្លាំងដើម្បីរក្សាភាពជាដៃគូដ៏សំខាន់របស់អាស៊ានក្នុងសម្រាប់វិស័យជាច្រើន តាមរយៈការចែករំលែកលើការងារសន្តិសុខក្នុងតំបន់ ក៏ដូចជាដៃគូពាណិជ្ជកម្មទ្វេភាគីមិនអាចខ្វះបាន»។
លោកបានបន្តថា កិច្ចប្រជុំដែលនឹងប្រព្រឹត្តទៅនាថ្ងៃទី ១៧-១៨ ខែមីនានេះ មិនមែនជាផ្នែកមួយនៃការកិច្ចប្រជុំរវាងអាស៊ាន-អូស្ត្រាលីដែលបានធ្វើឡើងជាទៀងទាត់នោះទេ «ប៉ុន្តែវាជាកិច្ចប្រជុំកំពូលពិសេសមួយដែលផ្តួចផ្តើមគំនិតឡើងដោយនាយករដ្ឋមន្ត្រីអូស្ត្រាលី ទៅកាន់សមភាគីរបស់គាត់ដែលជាមេដឹកនាំអាស៊ាន ដើម្បីមកកាន់ប្រទេសអូស្ត្រាលី ជួបប្រជុំដើម្បីពង្រឹងកិច្ចសហប្រតិបត្តិការឱ្យកាន់តែខ្លាំងក្លា ក៏ដូចជាការចែករំលែកនូវគំនិតយោបល់ ស្តីពីអនាគតនៃភាពជាដៃគូរបស់យើងជាមួយអាស៊ាន និងដើម្បីធ្វើការជាមួយគ្នា ដើម្បីបង្កើតគំនិតដែលនឹងធ្វើឱ្យភាពជាដៃគូរបស់យើងកាន់តែប្រសើរឡើងនាពេលអនាគត»។
គោលបំណងនៃកិច្ចប្រជុំនេះ គឺដើម្បីឆ្លុះបញ្ចាំងពីតម្លៃរបស់អាស៊ាន ដែលជាស្ថាប័នមួយ ហើយហេតុអ្វីអាស៊ានសំខាន់សម្រាប់ប្រទេសអូស្ត្រាលី ។ ហើយមូលហេតុ គឺធម្មតាបំផុត នោះគឺអាស៊ានបានបង្ហាញខ្លួនក្នុងរយៈពេលជាង ៥០ ឆ្នាំជាមួយភាពរឹងមាំខាងផ្នែកសេដ្ឋកិច្ច និងសន្តិសុខក្នុងតំបន់អាស៊ីអាគ្នេយ៍។
អ្នកនាំពាក្យរូបនេះបន្ថែមថា៖ «អាស៊ានបានអភិវឌ្ឍន៍យ៉ាងខ្លាំង ហើយអាស៊ានមានសុខុមនីយកម្ម សន្តិភាព និងកិច្ចសហប្រតិបត្តិការល្អ ហើយសម្រេចបាននូវភាពរីកចំរើនកំណើនសេដ្ឋកិច្ចនៅលើពិភពលោក។ ខ្ញុំសូមឆ្លុះបញ្ចាំងរឿងពិតមួយ ដែលថា ចាប់ពីពេលដែលយើងក្លាយជាដៃគូនៅក្នុងឆ្នាំ ១៩៩៤ មក ពាណិជ្ជកម្មរវាងអូស្ត្រាលី និងអាស៊ានបានកើនឡើងយ៉ាងខ្លាំងគួរឱ្យកត់សម្គាល់។ ដូច្នេះដោយសារហេតុផលទាំងនេះ នាយករដ្ឋមន្ត្រីអូស្ត្រាលី ចង់ឱ្យមានកិច្ចប្រជុំកំពូលពិសេសនេះ ដើម្បីឆ្លុះបញ្ចាំងពីរបៀបដែលប្រទេសអូស្ត្រាលីអាចទទួលប្រយោជន៍ពីសេដ្ឋកិច្ច និងសន្តិសុខពីអាស៊ាន។ ជាពិសេសគឺពង្រឹងពីរបៀបធ្វើការជាមួយគ្នា ដែលយើងអាចបង្កើនផលប្រយោជន៍ឱ្យគ្នាទៅវិញទៅមក» ៕
ចែករំលែកព័តមាននេះ