រាជធានីភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជាអះអាងថា ការសម្តែងការព្រួយបារម្ភពីការធ្វើវិសោធនកម្មក្រមព្រហ្មទណ្ឌ ដើម្បីដាក់ទោសដល់អុ្នកប្រមាថ ព្រះមហាក្ស គឺជាការមិនត្រឹមត្រូវ ។
ការលើកឡើងរបស់អ្នកនាំពាក្យគណបក្សកាន់អំណាច បន្ទាប់ពីលោកស្រី រ៉ូណាស្មីត អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំនៅកម្ពុជា បានសម្តែងក្តីព្រួយបារម្ភចំពោះការធ្វើវិសោធនកម្មរដ្ឋធម្មនុញ្ញ និងក្រមព្រហ្មទណ្ឌនៅក្នុងជំនួបជាមួយ លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌កាលពេលថ្ងៃទី0៦ ខែមីនា ឆ្នាំ២០១៨ កន្លងមកនេះ ។
លោក សុខ ឥសាន បានឲ្យដឹងតាមប្រព័ន្ធតេឡេក្រាម នៅថ្ងៃទី0៧ ខែមីនា ឆ្នាំ២០១៨ ថា ព្រះរាជាណាចក្រកម្ពុជា ប្រកាន់របបនយោបាយរាជានិយមអាស្រ័យរដ្ឋធម្មនុញ្ញ ដែលមានបាវចនា ជាតិ សាសនា ព្រះមហាក្សត្រ ។ រដ្ឋធម្មនុញ្ញ នៃព្រះរាជាណាចក្រកម្ពុជា ចែងថា អង្គព្រះមហាក្សត្រ មិនអាចនរណាបំពារបំពានបានឡើយ ។ ដូច្នេះ ការធ្វើវិសោធនកម្មច្បាប់ ដើម្បីដាក់ទោសអ្នកប្រមាថ ព្រះមហាក្សត្រ គឺជាសំណូមពរចាំបាច់ ដើម្បីការពារព្រះកិត្តិនាម និងព្រះចេស្តា នៃព្រះមហាក្សត្រ ដែលជាទីគោរពសក្ការៈរបស់ប្រជាជនកម្ពុជាទាំងមូល ។
លោកបញ្ជាក់ថា «ការព្រួយបារម្ភ និងការប្រឆាំងនឹងការធ្វើវិសោធនកម្មច្បាប់ដាក់ទោសអ្នកប្រមាថ ព្រះមហាក្សត្រ គឺ ជាការចង់ទុកឱកាសឲ្យជនអគតិប្រមាថ ព្រះមហាក្សត្រ ។ ជាការប្រមាថប្រជាជនកម្ពុជាទាំងជាង១៥លាននាក់ ។ ជាការប្រមាថលទ្ធិប្រជាធិបតេយ្យនៅកម្ពុជា ។ ជាការលំលោភឯករាជ្យ និងអធិបតេយ្យ នៃព្រះរាជាណាចក្រកម្ពុជា» ។
លោកបន្ថែមថា ទោះមានការព្រួយបារម្ភ ឬមិនព្រួយបារម្ភយ៉ាងណា ក៏ការធ្វើវិសោធនកម្មច្បាប់ដាក់ទោសអ្នកប្រមាថ ព្រះមហាក្សត្រ គឺជាសិទ្ធិស្របច្បាប់ នៃស្ថាបននីតិបញ្ញត្តិ នៃព្រះរាជាណាចក្រកម្ពុជា ស្របតាមនីតិវិធីជាធរមាន គ្មានជនណាអាចរារាំងបានជាដាច់ខាត ។ ការប្រមាថព្រះមហាក្សត្រ មិនមែនជាសិទ្ធិបញ្ចេញមតិទេ ។
ក្នុងជំនួបជាមួយលោករដ្ឋមន្ត្រីក្រសួងយុត្តិធម៌ លោកស្រី រ៉ូណាស្មីត អ្នករាយការណ៍ពិសេសរបស់អង្កការសហប្រជាជាតិ ទទួលបន្ទុកសិទ្ធិមនុស្សប្រចាំនៅកម្ពុជា បានសម្តេងការព្រួយបារម្ភចំពោះរាជរដ្ឋាភិបាលកម្ពុជា ធ្វើវិសោធនកម្មច្បាប់រដ្ឋធម្មនុញ្ញ និងក្រមព្រហ្មទណ្ឌ ដែលកំណត់ដាក់ទោសដល់អ្នកប្រមាថព្រះមហាក្សត្រ ទៅផ្ទាល់ ឬប្រយោលក្តី ។ យ៉ាងណាក្តី លោក ជិន ម៉ាលីន បានអះអាងថា ការព្រួយបារម្ភនេះ ត្រូវបានលោករដ្ឋមន្ត្រីក្រសួងតុត្តិធម៌ក៏ដូចជាក្រុមការងារកំណែទម្រង់វិសោធនកម្មច្បាប់ បានធ្វើការពន្យល់រួចហើយ ប៉ុន្តែមិនដឹងគាត់ទទួលយកបានប៉ុន្មាននោះទេ ។
សូមជម្រាបថា កាលខែកុម្ភៈកន្លងមកនេះ រដ្ឋសភា និងព្រឹទ្ធសភាបានអនុម័តវិសោធនកម្មរដ្ឋធម្មនុញ្ញ និងក្រមព្រហ្មទណ្ឌ ជាស្ថារពរួចហើយ សេចក្តីព្រាងវិសោធនកម្មច្បាប់រដ្ឋធម្មមាន៥មាត្រា ធ្វើឡើងដើម្បីរក្សាសុខសន្តិភាព ប្រទេសជាតិ និងដើម្បីលើកស្ទួយតម្លៃជាតិខ្មែរ ក្នុងបុព្វហេតុការពារឯករាជ្យជាតិ អធិតេយ្យជាតិ និងឯករាជ្យជាតិ ប្រឆាំងនឹងការជ្រៀតជ្រែកពីខាងក្រៅ តាមគ្រប់រូបភាព ព្រមទាំងដើម្បីលើកស្ទួយការតម្កល់ផលប្រយោជន៍ជាតិ និងប្រជាជនជាធំ ។ ចំណែកក្រមព្រហ្មទណ្ឌ ដែលមានខ្លឹមសារជារួមថា ការប្រមាថចំពោះ អង្គព្រះមហាក្សត្រ ត្រូវផ្តន្ទាទោសដាក់ពន្ធនាគារពី១ឆ្នាំ ទៅ៥ឆ្នាំ និងពិន័យជាប្រាក់ពី២លានរៀល ទៅ១០លានរៀល ។ ចំពោះនីតីបុគ្គលក៏អាចត្រូវបានផ្តនា្ទទោសពិន័យជាប្រាក់១០លានរៀល ទៅ៥០លានរៀល ព្រមទាំងទោសបន្ថែមមួយ ឬច្រើនក្នុងករណីដែលតុលាការរកឃើញថា មានពិរុទ្ធភាពពាក់ព័ន្ទនឹងការប្រ មាថចំពោះ អង្គព្រះមហាក្សត្រ ៕
ចែករំលែកព័តមាននេះ