ខេត្តបន្ទាយមានជ័យ ៖ បុរសឥណ្ឌូនេស៊ីម្នាក់ស្លាប់តាមដងផ្លូវ ខណៈប្អូនប្រុសបង្កើតដឹកតាមម៉ូតូទៅកាន់មន្ទីរពេទ្យបង្អែកក្រុងប៉ោយប៉ែត ក្រោយមានអាការមិនស្រួលខ្លួន សង្ស័យជំងឺបេះដូងកាលពីម៉ោងជិត៨យប់ថ្ងៃទី០៦ ខែមិនានេះ ។
ជនរងគ្រោះឈ្មោះ SUHARDI CHANTRA ភេទប្រុស អាយុ២៦ឆ្នាំ មុខរបរជាបុគ្គលិកអនឡាញ ស្នាក់នៅបន្ទប់ជួល ក្រុងប៉ោយប៉ែត ។ តាមប្រភពថា មុនកើតហេតុគេឃើញជនរងគ្រោះត្រូវបានគេសែងចេញពីបន្ទប់ម្ខាងផ្លូវ មុខមន្ទីរសំរាក និងព្យាបាលនគររាជ ហើយប្អូនប្រុសបង្កើតរបស់ជនរងគ្រោះឈ្មោះ WILLY CHANTRA បានដឹកតាមម៉ូតូទៅកាន់មន្ទីរពេទ្យបង្អែកក្រុងប៉ោយប៉ែត លុះពេលទៅដល់ក្រុមគ្រូពេទ្យនាំគ្នាជួយធ្វើចលនានិងពិនិត្យតាមបច្ចេកទេស តែជនរងគ្រោះស្លាប់បាត់ទៅហើយ ។
តាមក្រុមគ្រូពេទ្យនៅមន្ទីរពេទ្យបង្អែកក្រុងប៉ោយប៉ែតដែលប្រចាំការវេនយប់ថ្ងៃកើតហេតុប្រាប់កោះសន្តិភាពថា ជនរងគ្រោះសង្ស័យស្លាប់តាមដងផ្លូវ មុនពេលបញ្ជូនដល់ ព្រោះពេលពិនិត្យស្រាប់តែជនរងគ្រោះដាច់ខ្យល់ស្លាប់បាត់ទៅហើយ ។
សពបរទេសខាងលើត្រូវបានគេតម្កល់នៅបន្ទប់តម្កល់សពក្នុងមន្ទីរពេទ្យបង្អែកក្រុងប៉ោយប៉ែត រង់ចាំស្ថានទូតឥណ្ឌូនេស៊ីចុះទៅពិនិត្យមើល ។ ប្រភពថា សពនឹងបូជាធ្វើបុណ្យនៅក្នុងក្រុងប៉ោយប៉ែតបន្ទាប់មកប្អូនប្រុស និងយកធាតុទៅស្រុកជាក្រោយ ៕
ចែករំលែកព័តមាននេះ