រាជធានីភ្នំពេញ ៖ បន្ទាប់ពីឃើញក្រុមគាំទ្រលោកសម រង្ស៊ី និងលោកកឹម សុខា អតីតប្រធានគណបក្សសង្គ្រោះជាតិ កំពុងជាប់ពន្ធនាគារត្រពាំងថ្លុង ធ្វើការវាយប្រហារគ្នាដែលជាសញ្ញាណមួយ នៃការបែកបាក់នោះ អ្នកនាំពាក្យគណបក្សកាន់អំណាចបានលើកឡើងថា ជាជម្លោះក្រៅសៃវៀន ព្រោះគណបក្សសង្គ្រោះជាតិ ត្រូវបានតុលាការកំពូលរំលាយរួចហើយ ។
លោកសុខ ឥសានអ្នកនាំពាក្យគណបក្សប្រជាជនកម្ពុជាបានឲ្យដឹងនៅថ្ងៃទី៧ ខែមីនានេះថា ក្រោយពេលត្រូវរំលាយដោយតុលាការកំពូលនាថ្ងៃទី១៦ ខែវិច្ឆិកា ឆ្នាំ២០១៧ មក មានការបង្ហាញភ័ស្តុតាងឲ្យឃើញថា ផ្ទៃក្នុងអតីតបក្សសង្គ្រោះជាតិ មានការប្រេះស្រាំ និងបែកបាក់យ៉ាងធ្ងន់ធ្ងរដែលមិនអាចបិទបាំងបាន ។
លោកបន្តថា ឆ្លៀតឱកាសដែលលោកកឹម សុខា ត្រូវជាប់ឃុំខ្លួនមិនអាចធ្វើសកម្មភាពអ្វីបាន លោកសម រង្សី បានរវាសរវៃបង្កើតរបស់ដែលហៅថា ចលនាសាងគ្រោះជាតិ ស្អីគេនោះ ដោយយកឡេះថា ដើម្បីសាងគ្រោះបក្សសាងគ្រោះជាតិឲ្យរស់ឡើងវិញ ។ ប៉ុន្តែក្រយៅខូចរបស់លោក សម រង្ស៊ី ត្រូវបានលោក កឹម សុខា និងក្រុមលោកបានដឹ ង យ៉ាងច្បាស់អស់ហើយទើបមានការប្រកាសមិនចូលរួមបង្កើតរបស់ដែលហៅថា ចលនាសង្គ្រោះជាតិ និង ប្រឆាំងនឹងចលនានេះទៀតផង ។
លោកក៏បានលើកឡើងថា អតីតតមន្ត្រីបក្សប្រឆាំងមកពីកូតា កឹម សុខា បានបញ្ជាក់យ៉ាងដាច់ថា រវាងអតីតបក្សសាងគ្រោះជាតិ និងរបស់ដែលហៅថា ចលនាសាងគ្រោះជាតិនោះ មិនអាចច្រឡំគ្នាបានទេ គឺទាំងពីរនេះដាច់ដោយឡែកពីគ្នា ។ ទន្ទឹមនឹងនេះភាគី សម រង្ស៊ីនិយមក៏បានវាយប្រហារទៅខាងលោកកឹម សុខានិយមវិញយ៉ាង ចាស់ដៃដែរ ។ ដោយបរិហារថា ភាគីកឹម សុខានិយមតែងតែវាយប្រហារខាងសម រង្សីនិយមជាប់ ហើយមិនដែលលើកសសើរសម រង្ស៊ីសោះ បានតែនិយាយវាយប្រហារសម រង្ស៊ី ។
លោកសុខឥសានបញ្ជាក់ថា «ការវាយប្រហារគ្នានេះ បញ្ជាក់យ៉ាងច្បាស់ថា ភាគីទាំងពីរខ្លាំងដូចគ្នា ខ្លាំងខាងប្រឆាំងគ្នា ដូចទឹក និងប្រេង តែទាំងពីរខាងនេះសុទ្ធតែខ្សោយទាំងអស់គ្នា ដោយសារសុទ្ធតែឧទ្ទាមខុសច្បាប់ដូចគ្នា ។ ការបែកបាក់គ្នានេះមានប្រវត្តិតាំងពីដើមមក តាំងពីនៅដោយឡែកពីគ្នា ភាគីទាំងពីរតែងតែវាយប្រហារគ្នា និងចោទគ្នាថា ជាអាយ៉ងរបស់គណបក្សប្រជាជនកម្ពុជាទៀតផង មានលក្ខណដូចទឹក និងប្រេង ។ ឥឡូវនៅតែជាទឹក និងប្រេងដដែលគ្មានអ្វីប្លែកឡើយ » ។
ការលើកឡើងរបស់អ្នកនាំពាក្យគណបក្សកាន់អំណាចនេះ បន្ទាប់ពីកូនស្រី លោក កឹម សុខា កញ្ញា កឹម មនោវិទ្យា បានផ្ញើទៅកាន់លោកសម រង្ស៊ី ឲ្យឈប់ប្រើប្រាស់រូបឪពុក និងឈប់ប្រមាថឪពុកខ្លួន ។ លើសពីនេះបន្ទាប់ពីក្រុមអ្នកនាំទ្រមលោកកឹម សុខា មានលោក យ៉ែម បុញ្ញឬទ្ធិ អតីតអ្នកនាំពាក្យគណបក្សសង្គ្រោះជាតិ និងអ្នកមូយចំនួនទៀត បានប្រកាសមិនទទួលស្គាល់ការបង្កើតចលនាសង្គ្រោះជាតិដែលដឹកនាំដោយលោកសម រង្ស៊ី ។
ក្រោយពីឃើញរូបភាពនៃការខ្វែងគំនិតគ្នា លោកអេង ឆៃអ៊ាងអនុប្រធានអតីតគណបក្សសង្គ្រោះជាតិ បានសរសេសារនៅលើបណ្តាញសង្គមឲ្យក្រុមអតីតបក្សសង្គ្រោះជាតិប្រមូលគ្នាវិញ ដើម្បីកសាងបក្សសង្គ្រោះជាតិឡើងវិញផងដែរ ៕
ចែករំលែកព័តមាននេះ