រាជធានីភ្នំពេញ ៖ ចោរឆក់ម្នាក់ក្នុងចំណោម២នាក់ ត្រូវបានអ្នកធ្វើដំណើរតាមផ្លូវចាប់ប្រគល់ទៅឱ្យសមត្ថកិច្ច បន្ទាប់ពីបានធ្វើសកម្មភាពឆក់ទូរស័ព្ទដៃពីនារី២នាក់បានសម្រេចតែចៃដន្យដួលម៉ូតូ ហើយចោរឆក់ម្នាក់ទៀតរត់គេចខ្លួនបាត់ស្រមោល។ ហេតុការណ៍នេះ កើតឡើងកាលពីវេលាម៉ោង១១និង៣០នាទីយប់ថ្ងៃទី៤ ខែមីនា នៅមុខប៉ុស្តិ៍នគរបាលរដ្ឋបាលទឹកល្អក់ទី៣ តាមផ្លូវលេខ១៨២ ក្នុងសង្កាត់ទឹកល្អក់ទី៣ ខណ្ឌទួលគោក។ ស្ត្រីទាំង២នាក់ដែលរងគ្រោះ ម្នាក់ជាអ្នកបើកម៉ូតូឈ្មោះ ធា កញ្ញា អាយុ២៥ឆ្នាំ និងម្នាក់ទៀតជាម្ចាស់ទូរស័ព្ទដៃឈ្មោះ ធា ស្រីមុំ អាយុ២៧ឆ្នាំ ទាំង២នាក់ប្រកបរបរលក់ដូរ ស្នាក់នៅផ្ទះជួលក្នុងភូមិបឹងបាយ៉ាប សង្កាត់ភ្នំពេញថ្មី ខណ្ឌសែនសុខ។
ចំណែកចោរឆក់ឈ្មោះ តាំង អមតៈ ភេទប្រុស អាយុ២២ឆ្នាំ មុខរបរមិនពិតប្រាកដ ស្នាក់នៅបន្ទប់ជួលក្នុងសង្កាត់ទឹកល្អក់ទី១ ខណ្ឌទួលគោក មានស្រុកកំណើតនៅឃុំកំពង់ភ្នំ ស្រុកលើកដែក ខេត្តកណ្តាល។ បើតាមនារីរងគ្រោះបានរៀបរាប់ថា មុនកើតហេតុ ពួកនាងទាំង២នាក់ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០០៧ ពណ៌ខ្មៅ ពាក់ស្លាកលេខ កំពង់ស្ពឺ១C-១៦៣៤ ចេញមកពីផ្ទះបំណងទៅទិញបន្លែនៅផ្សារដើមគ ដោយធ្វើដំណើរតាមផ្លូវលេខ១៨២ពីលិចទៅកើត។ លុះទៅដល់ចំណុចខាងលើ ស្រាប់តែលេចមុខជន២នាក់ជិះម៉ូតូមួយគ្រឿងម៉ាកស៊ុយហ្សុយគីលែត ពណ៌ទឹកប្រាក់ មកពីក្រោយហើយក៏ធ្វើសកម្មភាពឆក់ទូរស័ព្ទដៃរបស់នាងម៉ាកសាំស៊ុងអង្គុយខាងក្រោយដែលកំពុងលេងហ្វេសប៊ុក។
ជាចៃដន្យ ពេលឆក់បានហើយបម្រុងបើកគេចក៏ទាក់ដៃចង្កូតម៉ូតូគ្នា បណ្តាលឱ្យដួលទាំង២គ្រឿង។ ភ្លាមនោះ ជនដែលជាអ្នកធ្វើសកម្មភាពឆក់ត្រូវបានអ្នកឃើញហេតុការណ៍ជួយចាប់ឃាត់ ខ្លួនបានរួមទាំងម៉ូតូពាក់ស្លាកលេខកណ្តាល ១W-៧២២៨។ ចំណែកឯបក្ខពួកម្នាក់ជាអ្នកបើកម៉ូតូ បានយកទូរស័ព្ទរបស់ជនរងគ្រោះដែលឆក់បានរត់គេចខ្លួនបាត់ស្រមោល៕
ចែករំលែកព័តមាននេះ