ហ្វីលីពីន ៖ ទឹកមាននៅរាងកាយយើងគ្រប់គ្នាប្រហែល៦០%។ យើងត្រូវការទទួលទានទឹកយ៉ាងហោចណាស់ ឲ្យបាន២.៤លីត្រក្នុងមួយថ្ងៃ ដើម្បីបំពេញរាល់នូវការបាត់បង់។ អ្នកខ្លះមិនចូលចិត្តផឹកទឹកធម្មតាទេ ហើយបែរជាចូលចិត្តផឹកទឹកផ្អែមៗជំនួសវិញ។
ដោយសារតែទម្លាប់មិនចូលចិត្តផឹកទឹកឲ្យគ្រប់តាមការកំណត់ ស្ត្រីម្នាក់ស្ទើរតែមិនអាចរក្សាជីវិតឲ្យនៅរស់បានដល់សព្វថ្ងៃ។
Joana Krisha Cha Duenas បានចែករំលែកបទពិសោធន៍ជូរចត់របស់ខ្លួននៅលើគណនេយ្យបណ្តាញសង្គមរបស់ខ្លួន។ នាងប្រាប់ថា នាងតែងតែផឹកទឹកជារៀងរាល់ថ្ងៃតិចជាង២លីត្រ ដែលនេះគឺមិនគ្រប់តាមការកំណត់ឡើយ។ ដល់ថ្ងៃទី២ ខែមីនា កន្លងមកនេះ នាងស្រាប់តែមានអាការៈមិនស្រួល។ នាងបានប្រញាប់ប្រញាល់ទៅមន្ទីរពេទ្យ HealthServ Los Baños ដើម្បីឲ្យគ្រូពេទ្យពិនិត្យព្យាបាល។ គ្រូពេទ្យបានប្រាប់ថា នាងរងនូវការខ្វះជាតិទឹក ហើយការខ្វះនេះអាចនឹងធ្វើឲ្យមានជំងឺខ្សោយតម្រង់នោមបាន ព្រោះឈាមទៅកាន់តម្រង់នោមមិនគ្រប់គ្រាន់។
គួរបញ្ជាក់ផងដែរថា មុននឹងមានរឿងនេះកើតមានឡើង គ្រូពេទ្យក៏ធ្លាប់រកឃើញថា Joana មានជំងឺគ្រាប់គ្រួសក្នុងផ្លូវទឹកនោមផងដែរ។ នេះក៏ដោយសារតែការទទួលទានទឹកមិនគ្រប់គ្រាន់តាមតម្រូវការ។ ដើម្បីឲ្យបានសុខភាពល្អ យើងគួរតែធ្វើតាមការណែនាំរបស់គ្រូពេទ្យជំនាញ៕
ចែករំលែកព័តមាននេះ