ខេត្តបាត់ដំបង ៖ ក្នុងសាលប្រជុំទីបញ្ជាការដ្ឋានរថក្រោះកងទ័ពជើងគោកបានបើកកម្មវិធីបូកសរុបលទ្ឋផលការងារយោធាប្រចាំឆ្នាំ២០១៧ និងដាក់ផែនការយោធាឆ្នាំ២០១៨ របស់កងរថក្រោះកងទ័ពជើងគោកស្ថិតភូមិឥន្ទជិត ឃុំឈើទាល ស្រុកបាណន់ ខេត្តបាត់ដំបងវេលាព្រឹកថ្ងៃទី០៦ ខែមីនា ឆ្នាំ២០១៨…
ខេត្តបាត់ដំបង ៖ ក្នុងសាលប្រជុំទីបញ្ជាការដ្ឋានរថក្រោះកងទ័ពជើងគោកបានបើកកម្មវិធីបូកសរុបលទ្ឋផលការងារយោធាប្រចាំឆ្នាំ២០១៧ និងដាក់ផែនការយោធាឆ្នាំ២០១៨ របស់កងរថក្រោះកងទ័ពជើងគោកស្ថិតភូមិឥន្ទជិត ឃុំឈើទាល ស្រុកបាណន់ ខេត្តបាត់ដំបងវេលាព្រឹកថ្ងៃទី០៦ ខែមីនា ឆ្នាំ២០១៨ ក្រោមអធិបតីភាព លោកឧត្តមសេនីយ៍ឯក ព្រហ្ម មរណះ មេបញ្ជាការរងកងទ័ពជើងគោក លោកឧត្តមសេនីយ៍ឯក ប៉ុល ស៊ីនួន មេបញ្ជាការរងកងទ័ពជើងគោកប្រចាំទិសយោធភូមិភាគទី៥ ព្រមទាំងមានការចូលរួមពីលោកឧត្តមសេនីយ៍ទោ អេង ហុង មេបញ្ជាការរងយោធភូមិភាគទី៥ លោកឧត្តមសេនីយ៍ទោជុំ សុឃឿន អគ្គនាយកដ្ឋានផ្គត់ផ្គង់ក្រសួងការពារជាតិ និងមេបញ្ជាការកងរថក្រោះប្រចាំភូមិភាគទី៣- ៤ – ៥ និងមន្ត្រីតំណាងអគ្គនាយកដ្ឋានពន្ធដាដែលជាដៃគូរសម្ព័ន្ឋមេត្រីភាព បានមកចូលរួមសរុបចំនួន៧០នាក់ ។
លោកឧត្តមសេនីយ៍ឯក ពៅ ស៊ីថា មេបញ្ជាការងកងទ័ពជើងគោក មេបញ្ជាការកងរថក្រោះកងទ័ពជើងគោកបានមានមតិស្វាគមន៍រួចលោកឧត្តមសេនីយ៍ត្រី កុយ សិរីវុឌ្ឍី នាយសេនាធិការកងរថក្រោះកងទ័ពជើងគោកបានអានរបាយការណ៍ប្រចាំឆ្នាំ២០១៧ កន្លងមកដោយផ្តោតលើសភាពការណ៍រួមក្នុងភូមិសាស្ត្រដែលមានបញ្ហាព្រំដែន សណ្តាប់ធ្នាប់សង្គមការកសាងអង្គភាពរឹងមាំលើគ្រប់វិស័យ ការងារហ្វឹកហ្វឺន អប់រំចិត្តសាស្ត្រ ការរៀបចំសុខភាព ជីវភាព សុខមាលភាព ការពង្រឹងសម្ព័ន្ឋមេត្រីភាព និងរៀបចំថែទាំរថក្រោះ តាមជំនាញបច្ចេកទេសបន្ថែមទៀត ។
បន្ទាប់មកមានការចាប់អារម្មណ៍និងរាយការណ៍បន្ថែមពីមេបញ្ជាការកងរថក្រោះលេខ៦៦ លេខ៦៩ និងលេខ៦៧ របស់យោធភូមិភាគទី៤ និងទី៥ បានបញ្ជាក់ពីការលំបាកក្នុងការដឹកនាំគ្រប់គ្រង ជួសជុលថែទាំ ព្រោះគ្មានគ្រឿងបន្លាស់ ហើយរាល់ការជួសជុលកន្លងមក គឺមានតាមជំនាញបច្ចេកទេសកែឆ្នៃដែលអាចធ្វើទៅបាន ព្រោះរថក្រោះរថពាស់ដែកខ្លះ មានអាយុកាល២០ឆ្នាំមកហើយ ដែលបានបញ្ចប់សង្គ្រាមរួចមក គឺមានតែការរក្សាថែទាំ ជួសជុលតែប៉ុណ្ណោះ តែអ្វីៗគឺអាចដំណើរការបានដូចធម្មតានៅពេលនេះ ។
លោកឧត្តមសេនីយ៍ឯក ពៅ ស៊ីថា បានថ្លែងថា អង្គភាពយើងនៅមានការខ្វះខាតមិនត្រឹមតែគ្រឿងចក្រ គ្រឿងបន្លាស់ប៉ុណ្ណោះទេ ចំពោះចំនួនទ័ពក៏នៅមានខ្វះខាតដែរ ពីព្រោះទ័ពយើងមួយចំនួនត្រូវបានចូលនិវត្តន៍ ចំពោះទ័ពថ្មី គឺត្រូវការចេះជំនាញទាំងការបើកបរជួសជុលថែទាំ តែត្រូវការពេលវេលាបណ្តុះបណ្តាល ហ្វឹកហ្វឺនបន្ថែមទៀតទើបមានប្រសិទ្ឋិភាព ។
លោកឈឹម មេងហុង តំណាងអគ្គនាយកដ្ឋានពន្ឋដា ដែលជាដៃគូរសម្ព័ន្ឋមេត្រីភាពជាមួយកងទ័ពរថក្រោះនៅទីនេះបានថ្លែងថា អង្គភាពលោកកំពុងត្រៀមរៀបចំគំរោងលើការធានាផ្នែកការថែទាំ ជួសជុល ផ្នែកគ្រឿងបន្លាស់នេះរួចហើយ ដោយមានការមានការអាក់ខានរបស់ថ្នាក់ដឹកនាំពន្ឋដា គឺគ្រប់ៗគ្នាជាប់ភារកិច្ចក្នុងការប្រមូលពន្ឋជូនរដ្ឋដែលបច្ចុប្បន្ន មានការកើនឡើងខ្ពស់ ដែលអាចផ្តល់ប្រាក់បៀវត្សន៍ ដល់គ្រប់មន្ត្រីរាជការគ្រប់ស្ថាប័នទាំងអស់ ដោយមិនឲ្យយឺតចូលក្នុងខែថ្មីឡើយ ។
លោកបានបង្ហើបតួលេខចំណូលរដ្ឋកើនឡើង១ជា១០ក្នុងពេលនេះ ដែលក្នុង១ខែអាចរកចំណូលបានប្រមាណ១៦០លានដុល្លា ហើយបើចំពោះតែខេត្តបាត់ដំបងមួយ១ខែអាចរកចំណូលចូលរដ្ឋបានប្រមាណ៨៥ម៉ឺនដុល្លា ហើយលោកសុំផ្តល់ក្តីសង្ឃឹមច្រើនចំពោះកងទ័ពដែលជាដៃគូរសម្ព័ន្ឋមេត្រីភាពនេះ ក្នុងការជួយគ្នាក្នុងនាមសមរភូមិក្រោយជួយសមរភូមិមុខ ព្រោះបើគ្មានកងទ័ពជួយការពារឲ្យយើងបានសុខសន្តិភាពទេ ប្រាក់ចំណូលពន្ឋដា ក៏គ្មានចំណូលបានមកដូច្នេះដែរ ។
លោកឧត្តមសេនីយ៍ឯក ព្រហ្ម មរណះ មេបញ្ជាការរងកងទ័ពជើងគោកបានថ្លែងថា សូមទទួលស្គាល់សកម្មភាពលទ្ឋផលល្អក្នុងឆ្នាំ២០១៧ តែត្រូវជំរុញបន្ថែមទៀត លើវិស័យហ្វឹកហ្វឺន ដើម្បីឲ្យកងទ័ពយើងទទួលបានគុណភាពកាន់តែល្អប្រសើរឡើង ចំពោះកងទ័ពដែលត្រូវបន្តវេណ ហើយត្រួតពិនិត្យមើលសភាពការណ៍ឆ្នាំ២០១៨នេះ តើមានអ្វីខ្លះដែលត្រូវជួបជាបន្តទៅទៀត0x017d7 ហើយសូមផ្តាំផ្ញើបន្ថែមទៅលើសកម្មភាព ជំរុញការកសាងទីតាំងពង្រឹងអង្គភាពរឹងមាំ ការដាំដុះ ដើម្បីធានាជីវភាពកងទ័ពក្នុងអង្គភាព ថែរក្សាសន្តិសុខក្នុងសង្គម ការពារប្រទេស កិច្ចសហប្រតិបត្តការរួមគ្នា ជាមួយគ្រប់តាមបណ្តាអង្គភាព ការងារពង្រឹងកងកម្លាំង បំប៉នបន្ថែមការហ្វឹកហ្វឺន និងការកែទំរង់ក្នុងអង្គភាព ដើម្បីធានាបានគុណភាពរបស់កងទ័ព ។ ចុងក្រោយគណអធិបតីបានជួយឧបត្ថម្ភកម្មវិធីចំនួន៣លានរៀល សម្រាប់ដំណើរការបានល្អក្នុងពេលនេះ ៕
ចែករំលែកព័តមាននេះ