សម្តេចចក្រី ប្រធានរដ្ឋសភា ជំរុញបុរសៗផ្តល់កិត្តិយសដល់ស្នាដៃស្ត្រី
- ភ្នំពេញ
រាជធានីភ្នំពេញ ៖ សម្តេចចក្រី ហេង សំរិន ប្រធានរដ្ឋសភា ជំរុញបុរសៗផ្តល់កិត្តិយសដល់ស្នាដៃស្ត្រី និងលើកតម្កើងតម្លៃឋានៈតួនាទី និងសិទ្ធិស្ត្រី ក្នុងសង្គម…
រាជធានីភ្នំពេញ ៖ សម្តេចចក្រី ហេង សំរិន ប្រធានរដ្ឋសភា ជំរុញបុរសៗផ្តល់កិត្តិយសដល់ស្នាដៃស្ត្រី និងលើកតម្កើងតម្លៃឋានៈតួនាទី និងសិទ្ធិស្ត្រី ក្នុងសង្គម ។ ការជំរុញរបស់សម្តេចចក្រី ហេង សំរិន ធ្វើឡើងជួបសំណេះសំណាលជាមួយប្រតិភូស្ត្រី មកពីស្ថាបនរដ្ឋអង្គការ និងវិស័យឯកជនទៀត ដើម្បីលើកកម្ពស់តម្លៃស្ត្រី អបអរសាទរទិវាអន្តរជាតិនារី ៨ មីនា ២០១៨ ខួបទី១០៧ ក្រោមប្រធានបទ “ស្ត្រីរួមគ្នារក្សាសន្តិភាព ដើម្បីអភិវឌ្ឍជាតិ”។
ក្នុងឱកាសជួបសំណេះសំណាលជាមួយស្ត្រីដែលមកពីស្ថាបនផ្សេងៗគ្នា ដែលដឹកនាំដោយលោកស្រីវេជ្ជបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី នៅវិមានរដ្ឋសភា នាព្រឹកថ្ងៃទី០៦ ខែមីនា ឆ្នាំ២០១៨ នេះ សម្តេចប្រធានរដ្ឋសភា បានគូសបញ្ជាក់ថា ថ្ងៃទី០៨ ខែមីនា គឺជាទិវាដែលផ្តល់កិត្តិយសចំពោះស្នាដៃរបស់ស្ត្រី និងជាថ្ងៃដែលយើងទាំងអស់គ្នា ជាពិសេសបុរសត្រូវតែបន្តជំរុញ និងលើកតម្កើងនូវតម្លៃឋានៈ តួនាទី និងសិទ្ធិរបស់ស្ត្រីឲ្យកាន់តែមានភាពប្រសើរ និងថ្លៃថ្លាថែមទៀត ។
សម្តេចបានគូសបញ្ជាក់បន្តថា ក្នុងឱកាសដ៏ថ្លៃថ្លានេះ សម្តេចសូមអបអរសាទរ និងវាយតម្លៃខ្ពស់ចំពោះ កិច្ចខិតខំប្រឹងប្រែងយ៉ាងសកម្មរបស់រាជរដ្ឋាភិបាលកម្ពុជា ក្នុងកិច្ចការពារ និងលើកស្ទួយនូវតម្លៃ ឋានៈ តួនាទី សិទ្ធិ និងជីវភាពរបស់ស្ត្រី ដែលឆ្លើយតបទៅនឹងសេចក្តីប្រកាសផែនការសកម្មភាព នៃទីក្រុងប៉េកាំង ដែលបានដាក់ចេញនៅក្នុងសន្និសីទ ស្ត្រីពិភពលោកលើកទី៤ ឆ្នាំ១៩៩៥ គោលដៅអភិវឌ្ឍន៍សហសវត្សរ៍ និងសេចក្តីសម្រេច លើកទី៨ របស់ក្រុមប្រឹក្សាសន្តិសុខអង្គការសហប្រជាជាតិ ស្តីពី “ ស្ត្រី សុខសន្តិភាព និង សន្តិសុខ”។
សម្តេចបានគូសបញ្ជាក់ថា «ស្របតាមស្មារតីរដ្ឋធម្មនុញ្ញ នៃព្រះរាជាណាចក្រកម្ពុជា រាជរដ្ឋាភិបាលបានដាក់បញ្ចូលគោលនយោបាយស្តីពីការលើកកម្ពស់ស្ថានភាពស្ត្រី និងសមភាពយេនឌ័រ ។ រាជរដ្ឋាភិបាលកម្ពុជា មានការប្តេជ្ញាចិត្តខ្ពស់ក្នុងការលើកកម្ពស់តួនាទីស្ត្រី ក្នុងការធ្វើសេចក្តីសម្រេចក្នុងវិស័យសាធារណៈ នៅគ្រប់កម្រិត តាមរយៈគោលនយោបាយជាតិនានា ក្នុងនោះមានយុទ្ធសាស្ត្រចតុកោណ ផែនការយុទ្ធសាស្ត្រអភិវឌ្ឍន៍ជាតិ បច្ចុប្ប ន្នកម្ម និងកម្មវិធីជាតិសម្រាប់ការអភិវឌ្ឍន៍តាមបែបប្រជាធិបតេយ្យ នៅថ្នាក់ក្រោមជាតិ និងផែនការយុទ្ធសាស្ត្រស្ត្រីនារីរតនៈជាដើម» ។
សម្តេចបានសង្គត់ធ្ងន់ថា «ការជ្រើសយកប្រធានបទ “ស្ត្រីរួមគ្នារក្សាសន្តិភាព ដើម្បីអ ភិវឌ្ឍជាតិ”សម្រាប់ទិវា ៨ មីនា ឆ្នាំ២០១៨ នេះ ពិតជាមានសារៈសំខាន់ និងស្របទៅនឹងបរិបទតំបន់ និងសកលជាពិសេសសម្រាប់កម្ពុជាយើង ដែលជានិច្ចកាលបានផ្តល់តម្លៃជាសារវ័ន្តនូវតម្លៃសន្តិភាព និងការលើកកម្ពស់វប្បធម៌អហិង្សា ដែលរាជរដ្ឋាភិបាល បាននឹងកំពុងគាំទ្រជំរុញ ឱ្យមានការចូលរួមពីគ្រប់ស្ថាប័ន រួមទាំងបុរសទាំងស្ត្រី ដើម្បីអភិវឌ្ឍសង្គមឆ្ពោះទៅបន្តលើកកម្ពស់សិទិ្ធ ស្ថានភាព ជីវភាព ឋានៈ តួនាទីរបស់ស្ត្រី ព្រមទាំងសុខុមាលភាពសង្គម» ។
លោកស្រីវេជ្ជបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានលើកឡើងថា រាជរដ្ឋាភិបាលបានកំពុងយកចិត្តទុកដាក់ជាខ្លាំង ក្នុងការជំរុញលើកកម្ពស់សមភាពយេនឌ័រ ។ ស្ត្រី និងកុមារី នៅក្នុងគ្រប់កម្រិតបានកំពុងយកចិត្តទុកដាក់ថែទាំ គាំពារ និងផ្តល់ឱកាស ជំរុញ និងលើកទឹកចិត្តពីរាជរដ្ឋាភិបាល ។
លោកស្ត្រីរដ្ឋមន្ត្រី បានលើកឡើងថា នៅក្នុងក្របខណ្ឌគោលនយោបាយជាតិ គាំពារសង្គមឆ្នាំ២០១៦-២០២៥ ដែលជាផែនទីមគ្គុទេសសម្រាប់ កែទម្រង់ការអភិវឌ្ឍប្រព័ន្ធគាំពារសង្គម ដើម្បីរក្សាឱ្យបាននូវសន្តិសុខប្រាក់ចំណូល កាត់បន្ថយនូវភាពរងគ្រោះផ្នែកសេដ្ឋកិច្ច និងហិរញ្ញវត្ថុរបស់ប្រជាជន ។ វិធានការថ្មីៗ ដែលរាជរដ្ឋាភិបាល បាននឹងកំពុងអនុវត្ត និងរៀបចំដើម្បីលើកកម្ពស់សុខុមាលភាព សមធម៌ សាមគ្គីភាព នៅក្នុងសង្គមជាតិទាំងមូល មានច្រើននៅក្នុងនោះ មានការដាក់ចេញជាសាច់ប្រាក់ សម្រាប់ជួយស្ត្រីមានផ្ទៃពោះ ដើម្បីយកទៅប្រើប្រាស់ក្នុងការថែទាំសុខភាពមុន និងក្រោយសម្រាលកូនឱ្យស្របទៅនឹងគោលនយោបាយកាត់បន្ថយភាពក្រីក្ររបស់រាជរដ្ឋាភិបាលកម្ពុជា ។
លោកស្ត្រីបន្ថែមថា សម្រាប់កម្មការិនីឆ្លងទន្លេត្រូវបានឈប់សម្រាករយៈពេល៣ខែ ដោយទទួលបានបៀវត្សរ៍១២០ភាគរយ ក្នុងនោះបេឡាជាតិសន្តិសុខសង្គមចេញ៧០ភាគរយ និងនិយោជកចេញ៥០ភាគតយ ព្រមទាំងបានទទួលប្រាក់ឧបត្ថម្ភចំនួន៤០ម៉ឺនរៀល ចំពោះកូនមួយកូនភ្លោះពីរ៨០ម៉ឺនរៀល និងកូនភ្លោះបីបាន១លាន២សែនរៀល ។ វិធានការការគាំពារ និងវឌ្ឍនភាពរបស់ស្ត្រីនៅក្នុងសង្គមកម្ពុជាមានច្រើន ។
ស្ត្រីបានចូលរួមកិច្ចការសង្គម ក្នុងវិស័យនានាមានការកើនឡើង គ្រប់ផ្នែកគ្រប់វិស័យនេះបើតាមរបាយការណ៍របស់ក្រសួងកិច្ចការនារី ។ លោកជំទាវវេជ្ជបណ្ឌិត អ៊ឹង កន្ថាផាវី បានលើកឡើងចំពោះ វឌ្ឍនភាពរបស់ស្ត្រីក្នុងវិស័យនយោបាយថា “ការចូលរួមរបស់ស្ត្រីក្នុងវិស័យនយោបាយមានការកើនឡើងជាលំដាប់ ក្នុងនោះសមាជិករដ្ឋសភាជាស្ត្រីឆ្នាំ១៩៩៣ មាន៥.៨៣ភាគរយ កើនដល់២០.៣២ភាគរយ ឆ្នាំ២០១៣ ។ នៅឆ្នាំ១៩៩៣ ស្ត្រីជារដ្ឋមន្ត្រី (គ្មាន) រដ្ឋលេខាធិការ (គ្មាន) អនុរដ្ឋលេខាធិការ (២រូប) ។ បើប្រៀបធៀបនៅឆ្នាំ២០១៣ មានឧបនាយ ករដ្ឋមន្ត្រីជាស្ត្រី (១រូប) ទេសរដ្ឋមន្ត្រី(១រូប) រដ្ឋមន្ត្រីជាស្ត្រី (២រូប) រដ្ឋលេខាធិការ(៣៨រូប) និងអនុរដ្ឋលេខាធិការ (៤៨រូប) ។ ស្ត្រីជាចៅសង្កាត់/មេឃុំ មានការកើនឡើងពី៤២រូបក្នុងឆ្នាំ២០០២ ដល់១៣០រូបក្នុងឆ្នាំ២០១៨”។
សម្តេចចក្រី ហេង សំរិន ក្នុងនាមរដ្ឋសភា ដែលជាស្ថាប័ននីតិប្បញ្ញត្តិ សម្តេចសូមគាំទ្រ និងលើកទឹកចិត្តដល់រាជរដ្ឋាភិបាល ជាពិសេសក្រសួងកិច្ចការនារី បន្ត និងជំរុញអនុវត្តគោលនយោបាយជាតិ ឲ្យកាន់តែខ្លាំងក្លាថែមទៀត ដើម្បីឧត្តមប្រយោជន៍របស់ស្ត្រី និងក្មេងស្រី ក៏ដូចជាប្រជាជនកម្ពុជាទាំងមូល ។
សម្តេចមានសង្ឃឹមយ៉ាងមាំថា តាមរយៈបាវចនាខាងលើនេះស្ត្រីកម្ពុជា ដែលមានចំនួនជាងពាក់កណ្តាល នៃចំនួនប្រជាជនកម្ពុជាជាង១៤លាននាក់ នឹងក្លាយជាកម្លាំងដ៏សំខាន់បំផុតដែលមិនអាចចៀសវាងបាន និងជាសក្តានុពលយ៉ាងធំធេងក្នុងការរក្សាសន្តិភាព និងជំរុញកិច្ចអភិវឌ្ឍនៃមាតុភូមិកម្ពុជា ៕
ចែករំលែកព័តមាននេះ