ចៅក្រមសាកសួរលោក កឹម សុខា ក្នុងពន្ធនាគារ
- ភ្នំពេញ
រាជធានីភ្នំពេញ ៖ លោក សំ សុគង់ មេធាវីការពារក្តីឲ្យលោក កឹម សុខា នៅថ្ងៃទី៥ ខែមីនា…
រាជធានីភ្នំពេញ ៖ លោក សំ សុគង់ មេធាវីការពារក្តីឲ្យលោក កឹម សុខា នៅថ្ងៃទី៥ ខែមីនា…
រាជធានីភ្នំពេញ ៖ លោក សំ សុគង់ មេធាវីការពារក្តីឲ្យលោក កឹម សុខា នៅថ្ងៃទី៥ ខែមីនា បានថ្លែងប្រាប់កោះសន្តិភាពថា ចៅក្រមស៊ើបសួរលោក គី ឫទ្ធី និងលោកព្រះរាជអាជ្ញារង សៀង សុខ បានទៅសាកសួរលោក កឹម សុខា នៅពន្ធនាគារត្រពាំងផ្លុង ដោយមានវត្តមានក្រុមមេធាវីការពារក្តីចំនួន៧រូបចូលរួមស្តាប់ចម្លើយផងដែរ ។ លោក សំ សុគង់ ដែលស្ថិតក្នុងចំណោមមេធាវីទាំង៧រូប បាននិយាយប្រាប់កោះសន្តិភាពតាមទូរស័ព្ទថា ចៅក្រមសាលាដំបូងរាជធានីភ្នំពេញ បានទៅសាកសួរលោក កឹម សុខា នៅពន្ធនាគារត្រពាំងផ្លុង ។ ការសាកសួរនេះធ្វើឡើងនៅចំពោះមុខមេធាវីចំនួន៧រូប និងជនជាប់ចោទផង ។ លទ្ធផលនៃការសាកសួរអាចដឹងនៅរសៀលថ្ងៃទី៥ ខែមីនា ។
ប្រភពព័ត៌មានពីសាលាដំបូងរាជធានីភ្នំពេញនៅថ្ងៃទី៥ ខែមីនា បានឲ្យដឹងថា ការទៅសាកសួរនេះធ្វើឡើងបន្ទាប់ក្រុមមេធាវីការពារក្តីទាមទារឲ្យតុលាការដោះលែងជនជាប់ចោទបាននៅក្រៅឃុំជាបណ្តោះអាសន្ន ដោយយោងតាមច្បាប់ ការឃុំខ្លួនលើសពី៦ខែ គឺជនជាប់ចោទត្រូវដោះលែងឲ្យនៅក្រៅឃុំ ។ ពេលនេះតុលាការនៅមិនទាន់សម្រេចថា ត្រូវជំនុំជម្រះជនជាប់នៅពេលណាឬក៏ត្រូវដោះលែងនៅក្រៅឃុំតាមការទាមទាររបស់មេធាវីនៅឡើយទេ ខណៈការស៊ើបអង្កេតនៅមិនទាន់ឈានដល់ទីបញ្ចប់ ។ លោក កឹម សុខា ត្រូវបានចោទប្រកាន់ពីបទសន្ទិដ្ឋិភាពជាមួយបរទេស តាមមាត្រា៤៤៣ នៃក្រមព្រហ្មទណ្ឌ ។ បទសន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេសឬភ្នាក់ងារបរទេស ដើម្បីបង្កើតឱ្យ
មានអំពើប្រទូស្តរ៉ាយ និងត្រូវបានចាប់ខ្លួនដាក់ពន្ធនាគារជាបណ្តោះអាសន្ន កាលពីថ្ងៃទី៦ខែកញ្ញា ឆ្នាំ២០១៧ ដោយចោទប្រកាន់ពីបទក្បត់ជាតិ ។
ទោះបីជាមានបណ្តឹងជំទាស់ និងបណ្តឹងសុំនៅក្រៅឃុំជាបន្តបន្ទាប់ក្តី ប៉ុន្តែនាពេលថ្មីៗនេះ ទាំងសាលាឧទ្ធរណ៍និងតុលាការកំពូល បានសម្រេចច្រានចោលបណ្តឹងរបស់ក្រុមមេធាវីការពារក្ដីឲ្យលោក កឹម សុខា ដែលប្តឹងប្រឆាំងនឹងដីកាសម្រេចឃុំខ្លួន ។ តាមនីតិវិធី តុលាការត្រូវបញ្ជូនសំណុំរឿងទៅជំនុំជម្រះ ចំពោះជនត្រូវចោទណាដែលបានជាប់ឃុំលើសពី៦ខែ ។ ប៉ុន្តែ តុលាការក៏អាចពន្យារពេលនៃការឃុំខ្លួនជនត្រូវចោទដែរ ប្រសិនបើការស៊ើបសួរមិនទាន់ចប់ ។ ចំពោះលោក កឹម សុខា បានជាប់ឃុំលើសពី៦ខែហើយ ។ ដូច្នេះ តុលាការត្រូវសម្រេចថា ត្រូវបញ្ជូនសំណុំរឿងទៅជំនុំជម្រះ ឬក៏បន្តការស៊ើបសួរ ឬមួយក៏ត្រូវដោះលែងជាបណ្តោះអាសន្ន ។ នេះជាលើកទី៤ហើយ ដែលចៅក្រមស៊ើបសួរបានទៅសាកសួរលោក កឹម សុខា ដល់ពន្ធនាគារ ។
ការចាប់ខ្លួននិងឃុំខ្លួនលោក កឹម សុខា គឺបន្ទាប់ពីមានការបង្ហោះវីដេអូឃ្លីបមួយដែលលោកបានថ្លែងពីយុទ្ធសាស្ត្រថា លោកបានទទួលការណែនាំពីអ្នកជំនាញអាមេរិកនិងកាណាដាដើម្បីយកឈ្នះលើគណបក្សកាន់អំណាច កាលពីកំឡុងឆ្នាំ២០១៣ នៅអូស្ត្រាលី ។ តុលាការបានចោទប្រកាន់ លោក កឹម សុខា ពីបទពាក់ព័ន្ធនឹងអំពើក្បត់ជាតិ និងបានទៅចាប់ខ្លួនដល់គេហដ្ឋាន កាលពីវេលារំលងអធ្រាត្រឈានចូលថ្ងៃទី៣ ខែកញ្ញា ឆ្នាំ២0១៧ ។តុលាការយកវីដេអូឃ្លីបមួយនេះ ធ្វើជាអង្គហេតុក្នុងការចាប់ខ្លួន និងដាក់លោក កឹម សុខា ឲ្យស្ថិតនៅក្រោមការសង្ស័យថា បានឃុបឃិតជាមួយបរទេសជាសម្ងាត់ ដើម្បីផ្តួលរំលំរាជ
រដ្ឋាភិបាលកម្ពុជា។ ក្នុងវីដេអូឃ្លីបនោះ លោកកឹមសុខា បាននិយាយទៅកាន់អ្នកគាំទ្រថា មានអ្នកជំនាញជាជនបរទេសនៅពីក្រោយ ដើម្បីជួយជ្រោមជ្រែងក្នុងការផ្លាស់ប្តូរមេដឹកនាំនៅកម្ពុជា ។
ព័ត៌មានចុងក្រោយ
ក្រោយពីធ្វើការសាកសួរពេញមួយថ្ងៃទី៥ ខែមីនា លោក គី ឫទ្ធី ចៅក្រមស៊ើបសួរសាលាដំបូងរាជធានីភ្នំពេញ សម្រេចបន្តឃុំខ្លួនជនត្រូវចោទគឺលោក កឹម សុខា អតីតប្រធានអតីតគណបក្សសង្គ្រោះជាតិរយៈពេល៦ខែទៀត នៅពន្ធនាគារត្រពាំងផ្លុង ។ នេះបើយោងតាមបញ្ជាក់របស់លោកមេធាវី សំ សុគង់ នៅល្ងាចថ្ងៃដដែលនោះ ។ លោក សំ សុគង់ បញ្ជាក់ថា នៅក្នុងសប្តាហ៍នេះ ក្រុមមេធាវីនឹងរៀបចំធ្វើបណ្តឹងឧទ្ធរណ៍ ដើម្បីប្រឆាំងនឹងការសម្រេចនេះ ៕
ចែករំលែកព័តមាននេះ