ខេត្តរតនគិរី ៖ អ្នកប្រកបរបរដំកាំបិតលក់ម្នាក់បាននិយាយថា មុខរបរនេះធ្វើអ្នកមានមិនបានទេ គឺបានត្រឹមតែម៉ារស់ ។
នៅក្នុងគ្រួសារមួយ ដែលមានកូន២នាក់ក្នុងបន្ទុក បុរសឈ្មោះ ហូ កូត អាយុ៣២ឆ្នាំ ប្រកបមុខរបរជាអ្នកធ្វើកាំបិតលក់ រស់នៅភូមិថ្មី ឃុំទីងចាក់ ស្រុកបកែវ ដែលជាជំនាញបន្តពីកេរឪពុករបស់គាត់បានរៀបរាប់ថា គាត់ចាប់យកមុខរបរដំកាំបិតលក់នេះ ក្រោយពីឪពុករបស់គាត់ចាស់ជរាទៅធ្វើការលែងកើត ក៏បានធ្លាក់មកលើខ្លួនជាកូនបន្តវេនបានរយៈពេល៦ឆ្នាំហើយ ។ ក្នុងនោះដែរប្រភេទដែកដែលគាត់យកមកធ្វើកាំបិតគឺគាត់ដើរទិញប្រភេទដែកថែបមានចន្ទាសរថយន្តក្នុង១គីឡូក្រាមតម្លៃ៤ពាន់រៀល ជូនពេលខ្លះអស់ដែកធ្វើ និងពិបាករកទិញ ធ្វើឱ្យស្ទះប្រាក់ចំណូលប្រចាំថ្ងៃផងដែរ ។
អ្នកធ្វើកាំបិតរូបនោះបានបន្តថា មួយថ្ងៃបើមានដែកគ្រប់គ្រាន់គាត់អាចធ្វើកាំបិតបានចំនួន២ទៅ៣កាំបិត ហើយក្នុងកាំបិត១ធុនតូចលក់បានតម្លៃ២៥០០០រៀល រីឯកាំបិតធុនធំបានតម្លៃ៤០០០០រៀល ។ គាត់ថា ពេលផលិតបានជាកាំបិតហើយ ជួនកាល៣ទៅ៤ថ្ងៃទើបលក់បាន៣ទៅ៤កាំបិត បើចំថ្ងៃណាហេងមានបងប្អូនអាជីវករលក់ដូរក្នុងផ្សារបានលុងមកទិញ គាត់លក់ដាច់ច្រើន គឺធ្វើទៅតាមការកុម្ម៉ង់ឱ្យម្ដងៗចំនួន២០ទៅ៣០កាំបិត ។
លោក ហូ កូត បានបន្តទៀតថា ទម្រាំរកទិញដែកដំកាំបិតឱ្យអាជីវករក្នុងផ្សារគ្រប់ចំនួនត្រូវប្រើពេលពី២ទៅ៣ខែឯណោះ ទើបចប់ដែលចំណុចនេះហើយធ្វើឱ្យគាត់ស្ទះសេដ្ឋកិច្ចក្នុងគ្រួសារ ។ គាត់បានបញ្ជាក់ថា កាំបិតដែលគាត់ធ្វើមានតែ២ប្រភេទទេ គឺកាំបិតកកុក និងកាំបិតខ្វែវ ជាប្រភេទកាំបិតដែលប្រជាពលរដ្ឋទិញយកទៅកាប់ត្រាយព្រៃធ្វើចម្ការ ។
តាមរយៈអ្នកធ្វើកាំបិតរូបនេះបានឱ្យដឹងដែរថា គាត់មិនធ្លាប់មានការកុម្ម៉ង់ឱ្យធ្វើជាដាវឬកាំបិតជាអាវុធសម្រាប់បង្កបញ្ហាក្នុងសង្គមនោះទេ ហើយគាត់ក៏បានបញ្ជាក់ថា ទោះបីមកចរចាឱ្យគាត់ធ្វើក៏មិនធ្វើដែរ ។ អ្នកដំកាំបិតលក់រូបនេះបន្តថា ជីវិតអ្នកដំដែកដូចគាត់នេះបានត្រឹមតែម៉ារស់ តែធ្វើអ្នកមានមិនកើតទេ ។ នៅក្នុងស្រុកបកែវនេះមានប្រជាពលរដ្ឋចំនួន៤គ្រូសារទៀតគេប្រកបមុខរបរធ្វើកាំបិតលក់ដូចគាត់ដែរ។ ក្នុងការអងេ្កតរបស់សារព័ត៌មានយើងមុខរបរដំកាំបិតលក់ក្នុងទីក្រុងបានលុងមានចំនួន៤កន្លែង ៕
ចែករំលែកព័តមាននេះ