លោក ហ៊ុន ម៉ាណែត ៖ ដល់ម៉ោងគេវាយប្រហារលាបពណ៌មាក់ងាយពលរដ្ឋខ្មែរគ្នាឯងទៀតហើយ
- ភ្នំពេញ
រាជធានីភ្នំពេញ ៖ កូនប្រុសច្បងរបស់ សម្តេចតេជោ ហ៊ុន សែន នាយករដ្ឋមន្ត្រី គឺលោក ហ៊ុន ម៉ាណែត…
រាជធានីភ្នំពេញ ៖ កូនប្រុសច្បងរបស់ សម្តេចតេជោ ហ៊ុន សែន នាយករដ្ឋមន្ត្រី គឺលោក ហ៊ុន ម៉ាណែត…
រាជធានីភ្នំពេញ ៖ កូនប្រុសច្បងរបស់ សម្តេចតេជោ ហ៊ុន សែន នាយករដ្ឋមន្ត្រី គឺលោក ហ៊ុន ម៉ាណែត បានអះអាងថា «ដល់ម៉ោងដែលគេបើកការវាយប្រហារ លាបពណ៌ និងមាក់ងាយដល់ប្រជាពលរដ្ឋខ្មែរគ្នាឯងទៀតហើយ» ។ ការលើកឡើងរបស់ លោក ហ៊ុន ម៉ាណែត បន្ទាប់បីសកម្មជនអតីតគណបក្សសង្គ្រោះជាតិ នៅក្រៅប្រទេសបានកំពុងធ្វើការវាយប្រហារ និងលាបពណ៌ខ្មែរនៅក្រៅប្រទេស ។
យោងតាមបណ្តាញសង្គមហ្វេសប៊ុក លោកឧត្តមសេនីយ៍ឯក ហ៊ុន ម៉ាណែត មេបញ្ជាការ នៃបញ្ជាការដ្ឋានជាតិកម្លាំងពិសេសប្រឆាំងភេរវកម្មបានលើកឡើងថា «ជារឿយៗ ឲ្យតែមានប្រជាពលរដ្ឋខ្មែររស់នៅក្រៅប្រទេសដែលមានទស្សនៈគាំទ្ររាជរដ្ឋាភិបាល ហើយប្រើសិទ្ធិរបស់ខ្លួនតាមរយៈការបញ្ចេញមតិរបស់ខ្លួនគាំទ្ររាជរដ្ឋាភិបាល ឬចូលរួមក្នុងកម្មវិធីនានា ដើម្បីជួបជុំអបអរនូវអ្វីដែលជាសមិទ្ធិផលជាតិ ឬដែលរាជរដ្ឋាភិបាលសម្រេចបាន គឺត្រូវបានអស់លោកមួយចំនួន ដែលមាននិន្នាការប្រឆាំងរាជរដ្ឋាភិបាលនៅក្រៅប្រទេស ចោទពួកគាត់ថា ជាជនលក់ឧត្តមគតិ ឬជាមនុស្សដែលគេទិញក្បាលបាន ឬពេលខ្លះរហូតដល់ប្រើពាក្យ អសុរសទៅលើពួកគាត់ ដូចជាជេពួកគាត់ថា ជាខ្មោចស៊ីពេរជាដើម» ។
លោកបន្តថា «ប្រជាពលរដ្ឋខ្មែររាប់លាននាក់ ប្រាកដណាស់គឺមានមនុស្សដែលមានទស្សនៈខុសគ្នាហើយ មិនថាប្រជាពលរដ្ឋខ្មែរដែលរស់នៅក្នុងប្រទេសខ្មែរ ឬនៅប្រទេសអាមេរិក អូស្ត្រាលី ណូវ៉ែលស្សឺឡង់ អឺរ៉ុប ។ល។ » លោកបញ្ជាក់ថា «អញ្ចឹងអស់លោកដែលមាននិន្នាការប្រឆាំងរដ្ឋាភិបាលនៅតាមបណ្តាប្រទេសមួយចំនួន គួរតែយល់ហើយថា នៅទីណាក៏មានប្រជាពលរដ្ឋដែលមានទស្សនៈស្របជាមួយអស់លោក និងអ្នកដែលមានទស្សនៈខុសពីអស់លោកដែរ ។ ហើយបើអស់លោក តាំងខ្លួនជាអ្នកប្រជាធិបតេយ្យពិតៗ គួរតែអស់លោកទទួលស្គាល់ការពិតនេះ ហើយគួរ បង្ហាញនូវកាយវិការ ឬការបញ្ចេញមតិ ប្រកបដោយភាពថ្លៃថ្នូរ និងការគោរពគ្នាផង» ។
ជាមួយគ្នានោះដែរ លោកឧត្តមសេនីយ៍ឯក ក៏បានលើកឡើងថា «ការប្រឌិតរឿងមិនពិត ដើម្បីលាបពណ៌ប្រជាពលរដ្ឋខ្មែរដែលមានទស្សនៈខុសពីខ្លួនថា ជាជនលក់ឧត្តមគតិ ឬលក់ក្បាល ក្នុងតម្លៃនេះ ឬតម្លៃនោះ គួរឈប់ទៅ ព្រោះវាជាការមើលងាយខ្លាំងណាស់ចំពោះពួកគាត់ ។ ប្រជាពលរដ្ឋខ្មែររស់នៅក្រៅប្រទេសដែលលោកបាន និងកំពុងមើលងាយនោះ ក៏ជាមនុស្សដែលមានកិត្តិយស និងសេចក្តីថ្លៃថ្នូរ ហើយក៏ចង់បានការគោរពសិទ្ធិរបស់គាត់ដូចអស់លោកដែរ ។ ជាពិសេសចំពោះលោកពូខ្លះ ដែលតាំងខ្លួនជាមនុស្សចាស់ទុំ ហើយមានតំណែងខ្ពស់នៅក្រៅប្រទេសទៀតនោះ ការដែលលោកពូដុតបញ្ឆេះកំហឹងនៅក្នុងអារម្មណ៌របស់ប្រជាពលរដ្ឋខ្មែរមួយចំនួនដែលមានទស្សនៈស្របជាមួយពូ ហើយដឹកនាំគាត់ឲ្យទៅជេរប្រមាថទៅលើប្រជាពលរដ្ឋខ្មែរដែលមានទស្សនៈខុសពីពូនោះ មិនមែនជាសកម្មភាពមួយដែលបង្ហាញពីការបង្រួបបង្រួមគ្នា ឬគោរពសិទ្ធិគ្នានោះទេ ។
លោក ហ៊ុន ម៉ាណែត ក៏បានលើកពីទង្វើរបស់អ្នកនៅខាងក្រៅថា «ការធ្វើទង្វើរនេះ ផ្ទុយទៅវិញវានាំឲ្យតែប្រជាពលរដ្ឋប៉ះអារម្មណ៍គ្នា រវាងអ្នកដែលពូនាំឲ្យទៅជេរ និងអ្នកដែលត្រូវគេជេរ» ។ លោកគូសបញ្ជាក់ថា «ក្នុងនាមជាក្មេងជំនាន់ក្រោយ ខ្ញុំសូមជូនយោបល់ទៅលោកពូថា ៖ ថ្វីត្បិតតែលោកពូមានវ័យចំណាស់ និងមានឋានៈខ្ពស់នៅក្រៅប្រទេសក៏ដោយ ក៏សកម្មភាពរបស់ពូបានបង្ហាញពីកម្រឹតនៃភាពចាស់ទុំ និងសីលធម៌របស់លោកពូ ។ បើសកម្មភាពរបស់លោកពូមិនសមរម្យ ឬគ្មានការទទួលខុសត្រូវ ក៏មហាជនជាពិសេសក្មេងៗជំនាន់ក្រោយក៏មិនគោរពដែរ» ។
សូមជម្រាបថា ការលើកឡើងរបស់លោកឧត្តមសេនីយ៍ឯក ហ៊ុន ម៉ាណែត បន្ទាប់លោក ឆាំ ឆានី សកម្មជនអតីតគណបក្សសង្គ្រោះជាតិបានចោទ លោកឧត្តមសេនីយ៍ បញ្ជាមេបណ្តាញឈ្មោះ ម៉េង មុខរបរលក់នំបុ័ងនៅទីក្រុងស៊ីដនី ឲ្យដើរប្រមូលមនុស្សទៅគាំទ្រ សម្តេចតេជោ ហ៊ុន សែន ក្នុងពេលកិច្ចប្រជុំអាស៊ាន អូស្ត្រាលី ដោយក្នុងម្នាក់ៗទទួលបានទឹកប្រាក់ចំនួន៦០០ដុល្លារសហរដ្ឋអាមេរិក ។
សូមជម្រាបថា នៅថ្ងៃទី១៧-១៨ ខែមីនា ឆ្នាំ២០១៨ ខាងមុខនេះ សម្ដេចតេជោ ហ៊ុន សែន នឹងដឹកនាំគណៈប្រតិភូ នឹងទៅអូស្ត្រាលីដើម្បីចូលរួមកិច្ចប្រជុំកំពូលអាស៊ាន-អូស្ត្រាលី ៕
ចែករំលែកព័តមាននេះ