រាជធានីភ្នំពេញ ៖ មហាជនតែងតែរិះគន់ចំពោះសិល្បករខ្លះដែលបញ្ចេញកាយវិការមិនសមរម្យ និងពាក្យអាសអាភាសនៅក្នុងពិធីកាត់សក់មង្គលការជាពិធីមង្គល តាមទំនៀមទម្លាប់ប្រពៃណីខ្មែរ ។ ជាក់ស្តែងកន្លងមកមិនយូរប៉ុន្មានតារាកំប្លែងស្រីម្នាក់ដែលប្រកបអាជីពកាត់សក់មង្គលការដែរនោះ បានសម្តែងមិនសមរម្យនៅក្នុងពិធីកាត់សក់មង្គលការមួយ ។ វាជាភាពមិនសមរម្យមួយក្នុងចំណោមច្រើនទៀតដែលមហាជនរិះគន់…
រាជធានីភ្នំពេញ ៖ មហាជនតែងតែរិះគន់ចំពោះសិល្បករខ្លះដែលបញ្ចេញកាយវិការមិនសមរម្យ និងពាក្យអាសអាភាសនៅក្នុងពិធីកាត់សក់មង្គលការជាពិធីមង្គល តាមទំនៀមទម្លាប់ប្រពៃណីខ្មែរ ។
ជាក់ស្តែងកន្លងមកមិនយូរប៉ុន្មានតារាកំប្លែងស្រីម្នាក់ដែលប្រកបអាជីពកាត់សក់មង្គលការដែរនោះ បានសម្តែងមិនសមរម្យនៅក្នុងពិធីកាត់សក់មង្គលការមួយ ។ វាជាភាពមិនសមរម្យមួយក្នុងចំណោមច្រើនទៀតដែលមហាជនរិះគន់ ។
និស្សិតដែលរៀននៅសាលាឯកជនក្នុងរាជធានីភ្នំពេញម្នាក់សុំមិនបញ្ចេញឈ្មោះបាននិយាយកាលពីពេល ថ្មីៗកន្លងមកថា សិល្បករសម្តែងកាយវិការ និងពាក្យសម្តីមិនសមរម្យនៅក្នុងពិធីកាត់សក់មង្គលការ គឺវាអាចជាការខុសឆ្គងមួយ ។ បើទោះបីជាខ្លួនគ្មានជំនាញក្នុងផ្នែកនេះក៏ដោយ ប៉ុន្តែតាមការយល់ឃើញខ្លះ ការលេងកំប្លែង គឺមិនចាំបាច់ប្រើប្រាស់ពាក្យចំអេសចំអាសទើបគេសើចនោះទេ គឺមានវិធីច្រើនដែលល្អ និងអាចឲ្យអ្នកមើលសើចបានដូចគ្នា ។ ម្យ៉ាងនៅក្នុងពិធីកាត់សក់ដែលជាប្រពៃណី និងទំនៀមទម្លាប់ដ៏ល្អរបស់ខ្មែរយើងនោះ គឺរឹតតែមិនត្រូវប្រើពាក្យចំអេសចំអាស ឬកាយវិការណាមួយដែលមិនសមរម្យឡើយ ព្រោះនៅទីនោះគឺមានវត្តមានចាស់ព្រឹទ្ធាចារ្យ និងក្មេងៗដែលកំពុងស្តាប់ និងទស្សនា ។ ប្រសិនបើយើងអាចមានកាយវិការ ឬពាក្យសម្តីណាមួយមិនសមរម្យនោះ វានាំឲ្យ ចាស់ៗកាន់ធម៌អា ថ៌មិនអាចទទួលយកបានឡើយ ហើយ ក្មេងៗអាចនឹងយកតម្រាប់តាមអ្វីដែលបានឃើញនោះ ។
ធ្វើការនៅក្រុមហ៊ុនឯកជនមួយលោកនាង យល់ថា បើគិតពីសិល្បៈរាល់ពាក្យកំប្លែង និងកាយវិការណាមួយដែលជាជំនាញរបស់អ្នកសម្តែងនោះ គឺវាមិនខុសឆ្គងឡើយ ប៉ុន្តែផ្ទុយទៅវិញបើយើងនិយាយពីរូបភាពជាក់ស្តែង និងការរស់នៅប្រចាំថ្ងៃវិញ គឺវាមិនសមរម្យឡើយ ប្រសិនបើយើងសម្តែងចេញនូវកាយវិការណាមួយ ឬក៏ពាក្យសម្តីណាមួយមិនល្អ ក្នុងទីសាធារណៈនោះ ។ មិនសូម្បីតែលោក ឬក៏អ្នកផ្សេងមួយចំនួនទៀតឡើយ ប្រសិនមានសកម្មភាពមិនល្អ ឬក៏ពាក្យសម្តីអាសអាភាសណាមួយ លោកជាអ្នកទស្សនាហាក់អៀនខ្លួន ឬក៏មិនហ៊ានទាំងចង់មើលផងដែរ ។
លោកនាងបានស្នើឲ្យអ្នកសម្តែងទាំងអស់គួររិះរកមធ្យោបាយណាដែលល្អ ផ្ទុយពីការប្រើពាក្យសម្តីមិនសមរម្យមកជំនួសវិញ ព្រោះក្នុងជីវភាពរស់នៅប្រចាំថ្ងៃគឺមានពាក្យសម្តី និងកាយវិការច្រើនដែលអាចយកទៅសម្តែងឲ្យទស្សនិកជនបានសើចសប្បាយ ។
ជាមន្ត្រីរាជការម្នាក់លោករ៉ុង បានសម្តែងការមិនពេញចិត្តចំពោះការប្រើប្រាស់ពាក្យសម្តី និងកាយវិការមិនសមរម្យណាមួយនៅក្នុងពិធីមង្គលការ ។ ពិធីកាត់សក់ជាពិធីមួយក្នុងចំណោមពិធីជាច្រើនក្នុងមង្គលការខ្មែរ សម្រាប់ផ្តល់សិរីមង្គលដល់គូស្វាមីភរិយាថ្មី ។ ប្រសិនបើអ្នកសម្តែងក្នុងពិធីកាត់សក់ប្រើអាកប្បកិរិយាសម្តែងផ្ទុយទៅនឹងទំនៀមទម្លាប់់នោះ គឺវានឹងជះឥទ្ធិពលអវិជ្ជមានណាមួយទៅដល់ម្ចាស់កម្មវិធី ជាមួយនឹងការរិះគន់ពីមហាជនដែលបានចូលរួម ។
បើតាមលោករ៉ុង ចេតនា របស់អ្នកសម្តែងនោះគឺមានបំណងដើម្បីបង្កភាពសប្បាយរីករាយហើយ ប៉ុន្តែបើយើងប្រើពាក្យអ្វីផ្សេងពីនេះដែលល្អ និងសមរម្យវាមិនជះឥទ្ធិពលអាក្រក់នោះឡើយ ។
តារាកំប្លែង និងជាអ្នកមានអាជីពកាត់សក់ម្នាក់លោកខាត់ ចំរើន អះអាងថា «បច្ចុប្បន្នមានអ្នកចេះច្រៀងកាត់សក់ច្រើន ខ្លះមានក្បួន ខ្លះមិនមានក្បួនតាមទីផ្សារប្រកួតប្រជែងជាក់ស្តែង ។ អ្នកសម្តែងខ្លះមានជំនាញ អ៊ីចឹងគេមានក្បួនមានខ្នាតរបស់គេច្រើននៅក្នុងការសម្តែងឲ្យទស្សនិកជនបានសើច ដោយមិនចាំបាច់តែប្រើពាក្យចំអេសចំអាស ឬកាយវិការមិនសមរម្យណាមួយឡើយ »។
បើតាមលោកខាត់ ចំរើន តាមបុគ្គលិកលក្ខណៈប្រពៃណីខ្មែរគឺយើងត្រូវលេងតាមក្បួនតាមខ្នាត ប៉ុន្តែដល់សម័យនេះវាក៏អាចអាស្រ័យទៅលើអ្នកជួលដែរ ព្រោះអ្នកជួលខ្លះចង់ឲ្យមានការលេងទៅបានសើចសប្បាយ ដោយមិនខ្វល់ពីការប៉ះពាល់ណាមួយឡើយ ។ ប៉ុន្តែបើម្ចាស់កម្មវិធីចង់បានតាមក្រមសីលធម៌គឺត្រូវជួលអ្នកដែលមានជំនាញពិតប្រាកដ ដែលបានចេញពីសាលវិចិត្រសិល្បៈ នោះការលេងមិនមានការប៉ះពាល់ឡើយ ប៉ុន្តែបើជួលអ្នកកំប្លែងនោះ គឺគេចមិនផុតពីជួបបញ្ហានេះឡើយ ។
លោកខាត់ ចម្រើន ទទួលស្គាល់ពីអ្នកកំប្លែងមួយចំនួន បច្ចុប្បន្នបានយកពាក្យសម្តីខាងក្រៅយកមកសម្តែងច្រើនពេក ដោយមិនគិតពីការប៉ះពាល់ និងការមិនសមរម្យទៅដល់មហាជន ៕
ចែករំលែកព័តមាននេះ