ខេត្តព្រៃវែង ៖ កុមារីអាយុ៥ឆ្នាំម្នាក់ បានរងរបួសធ្ងន់ធ្ងរ ដោយសារតែត្រូវម៉ូតូមួយគ្រឿងជិះមកបុកទាំងកំរោល នៅខណៈពេលដែលកុមារីរងគ្រោះ កំពុងអង្គុយលេងលើគ្រែក្បែរចិញ្ចើមផ្លូវ ។ ហេតុការណ៍នេះបានកើតឡើង កាលពីវេលាម៉ោង៤និង៣០នាទីល្ងាចថ្ងៃទី០៤…
ខេត្តព្រៃវែង ៖ កុមារីអាយុ៥ឆ្នាំម្នាក់ បានរងរបួសធ្ងន់ធ្ងរ ដោយសារតែត្រូវម៉ូតូមួយគ្រឿងជិះមកបុកទាំងកំរោល នៅខណៈពេលដែលកុមារីរងគ្រោះ កំពុងអង្គុយលេងលើគ្រែក្បែរចិញ្ចើមផ្លូវ ។ ហេតុការណ៍នេះបានកើតឡើង កាលពីវេលាម៉ោង៤និង៣០នាទីល្ងាចថ្ងៃទី០៤ ខែមិនានេះ នៅតាមបណ្តោយផ្លូវជាតិលេខ៨A ចន្លោះគីឡូម៉ែត្រលេខ៥៣ និង៥៤ ក្នុងភូមិវៃវេទ ឃុំរាប ស្រុកពារាំង ខេត្តព្រៃវែង ។
គ្រោះថ្នាក់នេះបង្កឡើងដោយម៉ូតូមួយគ្រឿង សេ១២៥ ពណ៌ខ្មៅ ពាក់ស្លាកលេខព្រៃវែង១K- ៧៦០២ បើកបរដោយឈ្មោះ ហ័ស ហ៊ុច ភេទប្រុស អាយុ១៨ឆ្នាំ មានទីលំនៅក្នុងភូមិជ្រៃ ឃុំរាប ស្រុកពារាំង ចំណែកកុមារីរងគ្រោះមានឈ្មោះ ភា ស៊ាវម៉ី អាយុ៥ឆ្នាំ មានទីលំនៅក្នុងភូមិកើតហេតុ ។
ព័ត៌មានពីសមត្ថកិច្ចបានឲ្យដឹងថា មុនពេលកើតហេតុ គេឃើញម៉ូតូបង្កខាងលើជិះតែម្នាក់ឯង ធ្វើដំណើរក្នុងទិសដៅពីកើតទៅលិច លុះពេលមកដល់ចំណុចកើតហេតុ ដោយសារតែម៉ូតូបើកលឿនពេក អ្នកបើកបរគ្រប់គ្រងមិនបានធ្វើឲ្យម៉ូតូធ្លាក់ចេញពីផ្លូវ ហើយជ្រុលទៅបុកគ្រែឬស្សី ដែលនៅក្បែចិញ្ចើមផ្លូវទាំងកំរោល បណ្តាលឲ្យកុមារីរងគ្រោះ ដែលកំពុងតែអង្គុយលេងម្នាក់ឯងលើគ្រែនោះ ខ្ទាតប៉ើង និងរងរបួសយ៉ាងធ្ងន់ធ្ងរ រីឯអ្នកបើកបរម៉ូតូបង្កគ្រាន់តែរងរបួសស្រាលប៉ុណ្ណោះ ។
ក្រោយកើតហេតុកុមារីរងគ្រោះត្រូវបានឪពុកម្តាយនាំយកទៅសង្គ្រោះនៅមន្ទីរពេទ្យឯរាជធានីភ្នំពេញ ។ ចំណែកជនបង្កទៅព្យាបាលរបួសនៅគ្លីនិកឯកជនក្នុងស្រុក រីឯម៉ូតូសមត្ថកិច្ចយកទៅរក្សាទុកនៅប៉ុស្តិ៍រដ្ឋបាល រង់ចាំភាគីទាំង២ ចូលខ្លួនដោះស្រាយនៅពេលក្រោយ ៕
ចែករំលែកព័តមាននេះ