ខេត្តព្រៃវែង ៖ កុមារីអាយុ៧ឆ្នាំម្នាក់បានស្លាប់បាត់បង់ជីវិតយ៉ាងអាណោចអាធម៌ដោយសារតែជម្ងឺប្រចាំកាយធ្វើទុករើឡើងធ្លាក់ចូលទឹកទន្លេក្នុងពេលកំពុងដើរលេងម្នាក់ឯង ។ ហេតុការណ៌នេះបានកើតឡើងកាលពីវេលាម៉ោង១២និង៣០នាទីថ្ងៃត្រង់ ថ្ងៃទី០៤ ខែមីនា ឆ្នាំ២០១៨ នៅចំណុចខាងមុខផ្ទះកុមារីរងគ្រោះដែលស្ថិតនៅជាប់ដងទន្លេតូច ក្នុងភូមិថ្មី…
ខេត្តព្រៃវែង ៖ កុមារីអាយុ៧ឆ្នាំម្នាក់បានស្លាប់បាត់បង់ជីវិតយ៉ាងអាណោចអាធម៌ដោយសារតែជម្ងឺប្រចាំកាយធ្វើទុករើឡើងធ្លាក់ចូលទឹកទន្លេក្នុងពេលកំពុងដើរលេងម្នាក់ឯង ។ ហេតុការណ៌នេះបានកើតឡើងកាលពីវេលាម៉ោង១២និង៣០នាទីថ្ងៃត្រង់ ថ្ងៃទី០៤ ខែមីនា ឆ្នាំ២០១៨ នៅចំណុចខាងមុខផ្ទះកុមារីរងគ្រោះដែលស្ថិតនៅជាប់ដងទន្លេតូច ក្នុងភូមិថ្មី ឃុំពាមមានជ័យ ស្រុកពាមរក៌ ខេត្តព្រៃវែង ។
កុមារីរងគ្រោះមានឈ្មោះ រ៉ា ស៊ីថារតនា អាយុ៧ឆ្នាំ រស់នៅជាមួយជីដូនអាយុ៥៩ឆ្នាំ ចំណែកម្តាយឈ្មោះ អ៊ំ រ៉ាវី អាយុ៣៣ឆ្នាំ ទៅធ្វើការជាកម្មការិនីរោងចក្រនៅភ្នំពេញយូរៗទើបមកលេងកូននៅស្រុកម្តង ។
ជុំវិញហេតុការណ៌នេះត្រូវបាននគរបាលមូលដ្ឋានប្រាប់ឱ្យដឹងថា កុមារីរងគ្រោះមានជម្ងឺឆ្កួតជ្រូកជាជម្ងឺប្រចាំកាយ និងឧស្សាហ៍ធ្វើទុករើឡើងជាញឹកញាប់ ប៉ុន្តែរាល់ពេលធ្វើទុកម្តងៗត្រូវបានជីដូន និងអ្នកជិតខាងជួយសង្គ្រោះបានមិនដែលមានបញ្ហាអ្វីនោះទេ ។
លុះមកដល់ថ្ងៃកើតហេតុកុមារីរងគ្រោះមានអាការធម្មតាទើបជីដូនមិនបានតាមឃ្លាំមើលបណ្តោយឱ្យដើរលេងមុខផ្ទះម្នាក់ឯង លុះមួយសន្ទុះក្រោយមកពេលដែលជីដូនចេញពីផ្ទះបាយមករកចៅក៏ស្រាប់តែបាត់មិនឃើញចៅក៏មានការផ្អើលឆោឡោនាំគ្នាដើររកតែរកមិនឃើញ ។
រហូតដល់ម៉ោង៤រសៀលថ្ងៃដដែលគឺ៤ម៉ោងក្រោយពីបាត់ខ្លួនក៏ស្រាប់តែឃើញសពកុមារីរងគ្រោះអណ្តែតទៅទើជាប់នឹងបែរត្រីខាងក្រោយផ្ទះរបស់ឈ្មោះ ង្វៀង យ៉ាំងកូយ ជនជាតិវៀតណាម ដែលស្ថិតនៅមាត់ទន្លេមេគង្គ ក្នុងភូមិព្រែកខ្សាយខាងជើង ឃុំព្រែកខ្សាយ(ក) ស្រុកពាមរក៌ ខេត្តព្រៃវែង ទើបនាំគ្នាស្រង់ឡើងយកសពប្រគល់ឱ្យជីដូនរៀបចំធ្វើបុណ្យតាមប្រពៃណី ៕
ចែករំលែកព័តមាននេះ