រាជធានីភ្នំពេញ ៖ ពហុកីឡដ្ឋានជាតិមរតកតេជោដែលត្រៀមស្វាគមន៍ព្រឹតិ្តការណ៍កីឡាស៊ីហ្គេមលើកទី៣២ឆ្នាំ២០២៣ពេលដែលកម្ពុជាធ្វើជាម្ចាស់ផ្ទះនោះបានឈានដល់ការ កសាងដំណាក់កាលទី២ហើយខណៈប្លង់គំរូត្រូវបានដាក់តាំងបង្ហាញជាសាធារណៈនៅទីស្នាក់ការគណៈកម្មាធិការជាតិអូឡាំពិកកម្ពុជា(NOCC) នាព្រឹកថ្ងៃទី១ ខែមីនា ឆ្នាំ២០១៨ ជាផ្លូវការ ។ បើតាមការបញ្ជាក់របស់លោក…
រាជធានីភ្នំពេញ ៖ ពហុកីឡដ្ឋានជាតិមរតកតេជោដែលត្រៀមស្វាគមន៍ព្រឹតិ្តការណ៍កីឡាស៊ីហ្គេមលើកទី៣២ឆ្នាំ២០២៣ពេលដែលកម្ពុជាធ្វើជាម្ចាស់ផ្ទះនោះបានឈានដល់ការ
កសាងដំណាក់កាលទី២ហើយខណៈប្លង់គំរូត្រូវបានដាក់តាំងបង្ហាញជាសាធារណៈនៅទីស្នាក់ការគណៈកម្មាធិការជាតិអូឡាំពិកកម្ពុជា(NOCC) នាព្រឹកថ្ងៃទី១ ខែមីនា ឆ្នាំ២០១៨ ជាផ្លូវការ ។
បើតាមការបញ្ជាក់របស់លោក វ៉ាត់ ចំរើន អគ្គលេខាធិការNOCC ឲ្យដឹងថា ពហុកីឡដ្ឋានជាតិមរតកតេជោ កសាងឡើង គឺមានរចនាបថជារបស់ខ្មែរដែលមានរូបរាងជាសំពៅ
បញ្ជាក់អំពីចំណងមិត្តភាពយូរអង្វែងរវាងព្រះរាជាណាចក្រកម្ពុជា និងសាធារណៈរដ្ឋប្រជាមានិតចិន ជាពិសេសគឺមានប្រព័ន្ធទឹកនៅជុំវិញ កីឡដ្ឋានដើម្បីឲ្យមានភាពត្រជាក់ត្រជុំ គង់វង្ស យូរអង្វែងដូចទៅនឹងប្រាសាទអង្គរ ។
លោក វ៉ាត់ ចំរើន បានឱ្យដឹងបន្តថា ពហុកីឡដ្ឋានជាតិមរតកតេជោ ត្រូវបានបើកការដ្ឋានសាងសង់ដំណាក់កាលទី១ កាលពីថ្ងៃទី១២ ខែមេសា ឆ្នាំ២០១៣ ក្រោមអធិបតីភាពសម្តេចតេជោ ហ៊ុន សែន ។ ពហុកីឡដ្ឋាននេះគ្រោងចំណាយថវិកាសាងសង់ចន្លោះពី១០០លានទៅ២០០លានដុល្លារអាមេរិក ដែលថវិកាមួយភាគធំជាជំនួយឥតសំណងរបស់រដ្ឋាភិបាលចិន ។ ដំណាក់កាលទី២ បើកការដ្ឋានសាងសង់កីឡដ្ឋានធំគឺទីលានបាល់ទាត់ដោយគ្រោងបញ្ចប់ការសាងសង់នៅឆ្នាំ២០២០ គឺប្រើប្រាស់រយៈពេលតែ៤០ខែប៉ុណ្ណោះ ។ រីឯដំណាក់កាលទី៣នឹងត្រូវចាប់ផ្តើមសាងសង់បន្តក្រោយពីដំណាក់កាលទី២បានបញ្ចប់រួចរាល់ ។
ផ្ទៃដីដែលសាងសង់មានទំហំ៩៤ហិកតានៅសង្កាត់ព្រែកតាសេក ខណ្ឌឫស្សីកែវ ។ ចំណែកកីឡដ្ឋានមេមានទំហំ៩ហិកតាដែលអាចផ្ទុកអ្នកទស្សនាបាន១០ម៉ឺននាក់ សាងសង់មានស្តង់ដាប្រកួតកីឡាអូឡាំពិក ដូចជាទីលានប្រកួតបាល់ទាត់ គំនូសរត់ប្រណាំង ការិយាល័យ៦ជាន់ បន្ទប់សម្រាប់អត្តពលិក៨ជាន់ចំនួន៤ រួមបញ្ចូល៤០០បន្ទប់ និងកន្លែងញុំអាហារធំចំនួនពីរ។ ក្នុងនោះមានទីធ្លា៦ផ្សេងទៀត និងកន្លែងហ្វឹកហាត់លើកទម្ងន់ដែលអាចផ្ទុកបាន១៥០០អត្តពលិក ។
កាលជំហានដំបូង មានការសាងសង់ទីលានប្រកួតក្នុងសាល និង មានអាងហែលទឹកស្ដង់ដាដូចជាអាងដែលគេប្រកួតនៅកីឡាអូឡាំពិក អាងសម្រាប់កម្ដៅសាច់ដុំមុនប្រកួត និងអាងលោតទឹក រួមទាំងការបំពាក់ឧបករណ៍ទំនើបៗ ។ ពហុកីឡដ្ឋានជាតិមរតកតេជោ គឺជាពហុកីឡដ្ឋានដ៏ទំនើបរបស់កម្ពុជាដែលមានការគិតគូរខ្ពស់ក្នុងការរំដោះអ្នកទស្សនានៅពេលមានគ្រោះអាសន្នពោលគឺអាចជម្លៀសចំនួនអ្នកទស្សនាប្រមាណ ៦ម៉ឺននាក់ក្នុងរយៈពេលតែប្រមាណ៧នាទីប៉ុណ្ណោះ ៕
ចែករំលែកព័តមាននេះ