ទីក្រុងម៉ិកស៊ីកូ ៖ ការគំរាមកំហែងរបស់លោកប្រធានាធិបតីអាមេរិក ដូណាល់ ត្រាំ អំពីសង្គ្រាមពាណិជ្ជកម្មផ្នែកដែកថែប បានបញ្ចប់ក្តីសង្ឃឹមនៃដំណើរការចរចាកិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA) ។ កាលពីថ្ងៃព្រហស្បតិ៍កន្លងមក…
ទីក្រុងម៉ិកស៊ីកូ ៖ ការគំរាមកំហែងរបស់លោកប្រធានាធិបតីអាមេរិក ដូណាល់ ត្រាំ អំពីសង្គ្រាមពាណិជ្ជកម្មផ្នែកដែកថែប បានបញ្ចប់ក្តីសង្ឃឹមនៃដំណើរការចរចាកិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA) ។
កាលពីថ្ងៃព្រហស្បតិ៍កន្លងមក លោកត្រាំ បាននិយាយថា នាសប្តាហ៍ក្រោយនេះ លោកនឹងប្រកាសពីពន្ធ២៥%លើដែកថែបនាំចូល និងពន្ធ១០%លើផលិតផលអាលុយមីញ៉ូមនាំចូល បន្ទាប់ពីលោកបានបង្ហោះនៅលើ Twitter ថា សង្គ្រាមពាណិជ្ជកម្មគឺល្អ និងងាយស្រួលឈ្នះ ។
លោក Jerry Dias ប្រធានសហជីព Unifor ប្រទេសកាណាដា និយាយថា ៖«ប្រទេសកាណាដាពិតជាខឹងសម្បាណាស់ ។ ការប្រកាសពន្ធនេះ បានបញ្ចប់រាល់ក្តីសង្ឃឹមលើការបន្តកិច្ចចរចា រួមមាន ការរៀបចំវិធានការថ្មីៗសម្រាប់យានយន្តក្នុងតំបន់ » ។
លោកកត់សម្គាល់ថា ៖« វាច្បាស់ណាស់ថាប្រសិនបើកាណាដាមិនរួចផុតពីពន្ធអាមេរិកនៅថ្ងៃអង្គារទេនោះ កាណាដាគួរតែដើរចេញពីតុចរចា NAFTA ហើយ » ។
ចំណែកលោក Kenneth Smith ប្រធានអ្នកចរចា NAFTA មកពីប្រទេសម៉ិកស៊ិក ប្រាប់អ្នកកាសែតថា កិច្ចចរចាមិនបានប៉ះពាល់នឹងការប្រកាសនេះឡើយ ។ ប៉ុន្តែលោកថា ម៉ិកស៊ិក និងកាណាដា អាចនឹងរួចផុតពីពន្ធទាំងនេះ ព្រោះប្រទេសទាំងពីរជាសម្ព័ន្ធមិត្តរបស់សហរដ្ឋអាមេរិក ។
ទោះជាយ៉ាងណា វានៅមិនទាន់ច្បាស់នៅឡើយទេថា តើពន្ធលើលោហៈធាតុទាំងនេះនឹងដាក់លើដៃគូរបស់សហរដ្ឋអាមេរិក ក្រោមកិច្ចព្រមព្រៀង NAFTA ដែរឬទេ ។
ប្រទេសកាណាដាជាអ្នកផ្គត់ផ្គង់ដែកថែប និងអាលុយមីញ៉ូមទៅសហរដ្ឋអាមេរិកធំជាងគេ បានសន្យាថា នឹងសងសឹក ប្រសិនបើចាំបាច់ ។
មន្ត្រីម៉ិកស៊ិកនិយាយថា រដ្ឋាភិបាលនឹងរង់ចាំការបកស្រាយច្បាស់លាស់អំពីបញ្ហានេះ មុននឹងធ្វើការឆ្លើយតប ប៉ុន្តែមន្ត្រីម្នាក់បាននិយាយនៅសប្តាហ៍មុនថា ប្រទេសម៉ិកស៊ិកនឹងសងសឹកវិញផងដែរ ។
សមាគមឧស្សាហកម្មដែកថែបម៉ិកស៊ិក Canacero និយាយថា ពួកគេសង្ឃឹមថា រដ្ឋាភិបាលនឹងចេញសកម្មភាពវាយបកភ្លាមៗ ប្រសិនបើសហរដ្ឋអាមេរិកដាក់ពន្ធលើប្រទេសម៉ិកស៊ិក ហើយសកម្មជនកសិកម្មក្នុងការចរចា NAFTA ក៏ប្រឆាំងនឹងផែនការដាក់ពន្ធនេះដែរ ៕
ចែករំលែកព័តមាននេះ