រាជធានីភ្នំពេញ ៖ បើតាមប្រធានសមាគមអ្នកចិញ្ចឹមសត្វកម្ពុជាបានឲ្យដឹងថា ដោយសារតែវិបត្តិជ្រូកជាង១ឆ្នាំកន្លងទៅនេះ បានធ្វើឲ្យកសិករ និងម្ចាស់កសិដ្ឋានមួយចំនួនបោះបង់ចោលរបរនេះទៅចាប់របរថ្មី ព្រោះតែមិនអាចទប់ទល់នឹងការខាតបង់បាន ហើយបច្ចុប្បន្ន ការផ្គត់ផ្គង់សាច់ជ្រូកខ្មែរលើទីផ្សារមានត្រឹមតែ៥០%ប៉ុណ្ណោះ និង៥០%ទៀតពឹងផ្អែកលើការនាំចូលពីប្រទេសជិតខាង ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានថ្លែងថា ៖« បច្ចុប្បន្ន វត្តមានសាច់ជ្រូកក្នុងស្រុកដែលផ្គត់ផ្គង់លើទីផ្សារមានប្រមាណតែពាក់កណ្ដាលប៉ុណ្ណោះ ក្រៅពីនោះ ជាជ្រូកនាំចូលពីប្រទេសជិតខាង ជាពិសេសប្រទេសវៀតណាម » ។
លោកបន្តថា តាមពិតទៅ បើសិនជាអាជ្ញាធរសមត្ថកិច្ចរឹតបន្តឹងចំពោះការនាំចូលជ្រូកពីប្រទេសវៀតណាម ឬអនុវត្តឲ្យបានទៅតាមអ្វីដែលក្រសួងកសិកម្ម រុក្ខាប្រមាញ់ និងនេសាទ បានកំណត់នោះ ជ្រូកក្នុងស្រុកអាចមានលទ្ធភាពផ្គត់ផ្គង់ទៅតាមតម្រូវការ ព្រោះបច្ចេកទេសក្នុងការចិញ្ចឹមជ្រូកសម័យនេះ មិនដូចកាលពីជំនាន់មុនៗដែលត្រូវប្រើពេលយូរខែទេ ក៏ប៉ុន្តែដោយសារតែការហូរចូលពីប្រទេសជិតខាងដោយសេរីខ្លាំងពេក ទើបធ្វើឲ្យតម្លៃជ្រូកក្នុងស្រុកធ្លាក់មកនៅទាប មិនអាចរកប្រាក់ចំណេញ ដែលជាហេតុធ្វើឲ្យកសិករ និងម្ចាស់កសិដ្ឋានត្រូវបោះបង់ចោលរបរចិញ្ចឹមជ្រូកតែម្ដងទៅ ។
លោកបន្ថែមថា បើស្ថានភាពនៅតែដូចបច្ចុប្បន្ន មិនយូរទេ ម្ចាស់កសិដ្ឋាននានាជាច្រើនទៀតនឹងត្រូវបោះបង់អស់ ហើយពេលនោះ កម្ពុជាត្រូវពឹងលើទីផ្សារនាំចូលទាំងស្រុង។ ចំណែកតម្លៃ ក៏ស្ថិតនៅលើមាត់គេដែរ ចង់ទាប ខ្ពស់ មិនអាចតវ៉ាបានទេ ។
យោងតាមការចុះស្រាវជ្រាវរបស់សមាគមអ្នកចិញ្ចឹមសត្វកម្ពុជា បានឲ្យដឹងថា បច្ចុប្បន្នតម្លៃជ្រូករស់ នៅក្នុងប្រទេសវៀតណាម ទាំង៣តំបន់ ពោលគឺតំបន់ភាគខាងជើង ភាគកណ្ដាលនិងភាគខាងត្បូង បានធ្លាក់ចុះយ៉ាងខ្លាំង និងបានធ្វើឲ្យពួកឈ្មួញរកស៊ីជ្រូកនៅក្នុងប្រទេសកម្ពុជា សម្រុកនាំចូលជ្រូករស់ពីប្រទេសវៀតណាម មកផ្គត់ផ្គង់តាមកន្លែងកាប់ជ្រូកនានាក្នុងរាជធានីភ្នំពេញ និងខេត្តនៅជាប់ព្រំប្រទល់ប្រទេសវៀតណាម ។
ប្រធានសមាគមដដែលនេះ ក៏បានបញ្ជាក់ថា វៀតណាមគេលក់ជ្រូកតម្លៃទាប ប៉ុន្តែគេអាចនៅចំណេញ ព្រោះថ្លៃដើមក្នុងការផលិតរបស់គេអស់តិចជាងកម្ពុជា ពីព្រោះតម្លៃអគ្គិសនីទាប ហើយបើអគ្គិសនីទាបហើយនោះ វត្ថុធាតុដើមដទៃទៀត ក៏មានតម្លៃទាបដែរ អីចឹង គេផលិតអស់តិច គេអាចលក់ទាបបាន តែបើសិនជាកម្ពុជាលក់ទាបដូចវៀតណាមនោះ គឺមិនអាចរួចខ្លួនឡើយ ។
លោកស្រី ម៉ន ណារី ម្ចាស់កសិដ្ឋានមួយកន្លែងនៅស្រុកកៀនស្វាយ ខេត្តកណ្ដាល បានឲ្យដឹងថា ចាប់តាំងពីតម្លៃជ្រូកធ្លាក់ចុះជាបន្តបន្ទាប់ គាត់ត្រូវយកលុយដែលចំណេញពីប៉ុន្មានឆ្នាំមុននោះ មកទប់ទល់នឹងការខាតបង់នៅពេលនេះវិញ ក៏ប៉ុន្តែបើសិនជាតម្លៃជ្រូកនៅតែបន្តធ្លាក់ចុះទៀត ប្រហែលជាមិនអាចទប់ទល់បានទៀតទេ ។ ដូចនេះ មានតែកាត់បន្ថយការចិញ្ចឹម ឬក៏បិទកសិដ្ឋានចោលតែម្ដង ខណៈមុខរបរមួយនេះ វាបានជួយរូបគាត់តាំងពីយូរមកហើយ និងបានផ្ដល់ចំណូលដល់គ្រួសាររបស់គាត់ផងដែរ ៕
ចែករំលែកព័តមាននេះ