ខេត្តកណ្តាល ៖ បុរសម្នាក់ដែលរាល់ពេលស្រវឹងស្រាតែងតែវាយធ្វើបាបប្រពន្ធ និងបំផ្លិចបំផ្លាញទ្រព្យសម្បត្តិក្នុងផ្ទះខ្ទេចខ្ទី ហើយត្រូវសមត្ថកិច្ចប៉ូលិសហៅទៅណែនាំជាច្រើនលើកច្រើនសានោះ នៅតែមិនកែចរិតអគតិរបស់ខ្លួន ដូច្នេះហើយត្រូវក្រុមគ្រួសារចាប់ចងយកទៅប្រគល់ឱ្យប៉ុលិសស្រុកខ្សាច់កណ្តាលកាលពីវេលាម៉ោង៣រសៀល ថ្ងៃទី៨ ខែមីនា។
ជននោះឈ្មោះចឺម ជា អាយុ៣២ឆ្នាំ ជាកសិករ មានទីលំនៅក្នុងភូមិព្រែកក្របៅទី២ ឃុំព្រែកអំពិល ស្រុកខ្សាច់កណ្តាល ចំណែកស្ត្រីជាប្រពន្ធឈ្មោះយិត វុន អាយុ៣១ឆ្នាំ ជាកសិករ។ ប៉ូលិសឱ្យដឹងថា នៅវេលាម៉ោង៣រសៀល ថ្ងៃទី៨ ខែមីនា ឆ្នាំ២០១១ ឈ្មោះចឺម ជា ត្រឡប់មកពីផឹកស្រានៅ កោះដាច់ឆ្លងទូកមករោងចាំចំការនៅកោះកាង ស្ថិតក្នុងភូមិព្រែកក្របៅទី២ ឃុំព្រែកអំពិល ស្រុកខ្សាច់កណ្តាលវិញឃើញប្រពន្ធកំពុងដេកលើអង្រឹង ក៏ស្ទុះទៅបោចសក់ និងទះកំផ្លៀងមួយដៃ ហើយបំរុងវាយថែមទៀត តែត្រូវប្អូនប្រុសបង្កើត និងម្តាយរបស់គេចូលឃាត់ ។ លើសពីនេះសាច់ញាតិបានចាប់ចងយកទៅប្រគល់ឱ្យសមត្ថកិច្ចប៉ូលិសប៉ុស្តិ៍ព្រែកអំពិលតែម្តង។
សមត្ថកិច្ចប៉ូលិសបញ្ជាក់ថា កន្លងមកឈ្មោះចឺម ជា តែងតែប្រើអំពើហិង្សាក្នុងគ្រួសារដោយវាយប្រពន្ធ និងបំផ្លាញទ្រព្យសម្បត្តិ ដូចជាចាន ឆ្នាំង និងដុតរោងចាំចំការទៀតផង ហើយត្រូវសមត្ថកិច្ចប៉ូលិសប៉ុស្តិ៍ព្រែកអំពិលនាំយកទៅប៉ុស្តិ៍ដើម្បីអប់រំ និងឱ្យធ្វើកិច្ចសន្យាតាមសំណូមពររបស់ប្រពន្ធ។ ជនសង្ស័យឈ្មោះចឺម ជា ត្រូវសមត្ថកិច្ចប៉ូលិសកសាងសំណុំរឿងបញ្ជូនទៅសាលាដំបូងខេត្តហើយ ៕
ចែករំលែកព័តមាននេះ