រាជធានីភ្នំពេញ ៖ យោងតាមរបាយការណ៍ចេញផ្សាយរបស់ក្រសួងសេដ្ឋកិច្ច និងហិរញ្ញវត្ថុ បានបង្ហាញថា ក្នុងរយៈពេលមួយឆ្នាំ២០១៧ពេញ ក្រសួងរកចំណូលបានប្រមាណ១៩,៣ទ្រីលានរៀល ឬស្មើនឹងប្រមាណជិត៥ពាន់លានដុល្លារអាមេរិក ដែលសម្រេចបាន១០៦,១%នៃផែនការ ។
របាយការណ៍របស់ក្រសួងសេដ្ឋកិច្ច និងហិរញ្ញវត្ថុ ក៏បានឲ្យដឹងដែរថា ក្នុងចំណោមប្រាក់ចំណូលដែលស្ថាប័នក្រោមឱវាទរកបាននោះ ចំណូលពីសារពើពន្ធ ដែលមានពន្ធគយ និងរដ្ឋាករ និងពន្ធដារ បានសម្រេចលើសផែនការរហូតដល់៨,៤% ហើយចំណូលមិនមែនសារពើពន្ធ ប្រមូលបានលើសច្បាប់កំណត់៨,១% និងចំណូលមូលធនប្រមូលបាន៩៩,៧%នៃច្បាប់ ។
នៅក្នុងសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា ការអនុវត្តចំណាយតាមអង្គភាពថវិកា ភាគច្រើនបានល្អជាងកាលពីឆ្នាំ២០១៦ ដោយអនុវត្តកាន់តែខិតជិតឥណទានច្បាប់ លើកលែងតែករណីដែលមានការបន្ថែមឥណទានថវិកា តាមការសម្រេចរបស់រាជរដ្ឋាភិបាល ជាពិសេស ការអន្តរាគមន៍របស់រដ្ឋលើការជំរុញផលិតកម្ម និងទីផ្សារស្រូវអង្ករ ។
តាមការបញ្ជាក់របស់មន្ត្រីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុ កន្លងមកថា ឆ្នាំ២០១៨ នេះ កម្ពុជាបានកំណត់យកផលទុនជាតិសរុបនឹងកើនឡើងដល់ប្រមាណ២៤ពាន់លានដុល្លារអាមេរិក និងបានធ្វើឲ្យចំណូលសម្រាប់ប្រជាពលរដ្ឋម្នាក់កើនឡើងដល់១.៤៣៥ដុល្លារអាមេរិក ។
យោងតាមរបាយការណ៍របស់ក្រសួងសេដ្ឋកិច្ច ដែលបានចេញផ្សាយនាពេលកន្លងមកឲ្យដឹងថា ដោយសារតែកំណើនសេដ្ឋកិច្ចរបស់កម្ពុជាមានភាពរឹងមាំ ផលទុនជាតិក៏បានកើនឡើងជាបន្តបន្ទាប់ដែរ ។ ជាក់ស្ដែង ក្នុងឆ្នាំ២០១៣ កម្ពុជាមានផលទុនជាតិសរុបជាង១៥ពាន់លានដុល្លារអាមេរិក និងបានកើនឡើងដល់ប្រមាណជាង២២ពាន់លានដុល្លារអាមេរិកក្នុងឆ្នាំ២០១៧ ។
បើតាមលោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានលើកឡើងដែរថា សេដ្ឋកិច្ចកម្ពុជានឹងបន្តកើនឡើងទៀតនៅក្នុងឆ្នាំខាងមុខនេះ យោងទៅលើស្ថានភាពការវិនិយោគ និងពាណិជ្ជកម្មនៅកម្ពុជាបច្ចុប្បន្ន។ លោកថា ៖« ស្ថាប័នអន្តរ ជាតិធំៗបានព្យាករថា សេដ្ឋកិច្ចកម្ពុជានឹងកើនឡើង៦,៩%ក្នុងឆ្នាំ២០១៨ ក៏ប៉ុន្តែខ្ញុំអាចវាយតម្លៃបានថា វាអាចនឹងកើនដល់៧%ឯណោះក្នុងឆ្នាំ២០១៨នេះ » ។
គួរបញ្ជាក់ថា កាលពីដើមសប្ដាហ៍មុននេះ រាជរដ្ឋាភិបាលក៏បានកំណត់ជ្រើសរើសយកទេសចរណ៍ ជាវិស័យអាទិភាពមួយសម្រាប់ចំណូលជាតិ ក្នុងនោះប្រាសាទអង្គរដែលល្បីពាសពេញពិភពលោក រកចំណូលបានប្រមាណ១០០លានដុល្លារអាមេរិកក្នុងឆ្នាំ២០១៧ ។ ដូចនេះ រាជរដ្ឋាភិបាលក៏បានយកចិត្តទុកដាក់បន្ថែមទៀតដើម្បីកែលម្អ និងស្វែងរកតំបន់ទេសចរណ៍ល្បីៗជាច្រើនទៀតនៅកម្ពុជា សម្រាប់ភ្ញៀវទេសចរអន្តរជាតិមកទស្សនា ។ ក្រៅពីចំណូលសម្រាប់ជាតិ វិស័យទេសចរណ៍ក៏បានផ្ដល់ប្រយោជន៍ទាំងផ្ទាល់ និងប្រយោលដល់ប្រជាពលរដ្ឋក្នុងស្រុកផងដែរ ៕
ចែករំលែកព័តមាននេះ