រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានលាតត្រដាងការពិតមួយដែលថា មានអតីតថ្នាក់ដឹកនាំ អតីតគណបកសង្គ្រោះជាតិ បានសរសេរលិខិតចំនួន៣…
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានលាតត្រដាងការពិតមួយដែលថា មានអតីតថ្នាក់ដឹកនាំ អតីតគណបកសង្គ្រោះជាតិ បានសរសេរលិខិតចំនួន៣ ច្បាប់ផ្សេងៗគ្នា ជូនសម្តេចតេជោ សម្តេចសាយ ជុំ ប្រធានរដ្ឋស្តីទី និងប្រធានតុលាការកំពូល «ស្នើសុំសិទ្ធធ្វើនយោបាយ » វិញ ។
ថ្លែងនៅឯពិធីសម្ពោធសមិទ្ធផលនានានៅក្នុងវត្តឈូកវ៉ា ក្នុងខណ្ឌព្រែកព្នៅ រាជធានីភ្នំពេញព្រឹកថ្ងៃច័ន្ទ ទី០៥ ខែមីនា ឆ្នាំ២០១៨ ថា សម្តេចបានចាររួចហើយលើលិខិតនោះ គឺមិនឆ្លើយតប ហើយទុកជាឯកសារ ។ លើសពីនេះក្រុមអតីតបក្សប្រឆាំងក៏បានផ្ញើសារតាម WhatsApp ដោយស្នើសុំសម្តេចជួយអន្តរាគមន៍ឱ្យពួកគេ មានចំនួន១១៨ នាក់ មានសិទ្ធធ្វើនយោបាយវិញ ។
សម្តេចបានផ្ញើសារនយោបាយទៅអតីតថ្នាក់ដឹកនាំអតីតគណបក្សសង្គ្រោះជាតិថា ៖ «សិទ្ធនយោបាយ [ដែលត្រូវបានដកហូត] ពុំទាន់មានច្បាប់ណា លើកលែងទោសរឿងសិទ្ធនយោបាយទេ» ។ សម្តេចបានពន្យល់ថា រឿងនេះ គឺវាខុសពីអ្នកជាប់គុក ព្រោះតាមច្បាប់ពន្ធនាគារគឺ នាយករដ្ឋមន្ត្រីមានសិទ្ធស្នើសុំព្រះមហាក្សត្រ លើកលែងទោសឱ្យអ្នកដែលត្រូវបានតុលាការកាត់ទោស ហើយបានជាប់ពន្ធនាគារ ។
សម្តេចតេជោបន្តថា រឿងគ្រប់យ៉ាងកើតឡើង គឺដោយសារតែពួកប្រឆាំងខ្លួនឯង ដែលមានចេតនាផ្តួលរំលំរដ្ឋាភិបាល នាយករដ្ឋមន្ត្រីកម្ពុជា ក៏បានប្រកាសឱ្យដឹងថា អតីតមេបក្សគណបក្សប្រឆាំងដែលចង់ជួបចរចាជាមួយសម្តេច ពេលលោកអញ្ជើញទៅប្រជុំនៅទីក្រុងស៊ីដនី ប្រទេសអូស្ត្រាលី សូមកុំសង្ឃឹមព្រោះ «អ្នកជាប់ទោសខាងផ្លូវច្បាប់គ្មាន សិទ្ធចរចាជាមួយ ហ៊ុន សែន» ។
សូមបញ្ជាក់ថា អតីតគណបក្សសង្គ្រោះជាតិ ត្រូវបានតុលាការកំពូលសម្រេចរំលាយចោលជាផ្លូវការកាលពីថ្ងៃទី១៦ ខែវិច្ឆិកា ឆ្នាំ២០១៧ ហើយថ្នាក់ដឹកនាំកំពូលចំនួន១១៨ រូប ត្រូវបានហាមឃាត់សិទ្ធធ្វើនយោបាយរយៈពេល៥ឆ្នាំ គិតចាប់ពីថ្ងៃសាលដីកាចូលជាស្ថាពរជាពិសេស គឺ «បិទផ្លូវតវ៉ា» ៕
ចែករំលែកព័តមាននេះ