រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាបានថ្លែងសារនយោបាយទៅអតីតថ្នាក់ដឹកនាំគណបក្សប្រឆាំង និងសាធារណៈឱ្យបានជ្រាបថា ពុំមានគម្រោងណាមួយសម្រាប់ការជួបចរចាជាមួយលោកសម រង្ស៊ី នៅប្រទេសអូស្ត្រាលីនាពេលខ្លីខាងមុខនោះទេ ។ សម្តេចតេជោ ហ៊ុន…
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាបានថ្លែងសារនយោបាយទៅអតីតថ្នាក់ដឹកនាំគណបក្សប្រឆាំង និងសាធារណៈឱ្យបានជ្រាបថា ពុំមានគម្រោងណាមួយសម្រាប់ការជួបចរចាជាមួយលោកសម រង្ស៊ី នៅប្រទេសអូស្ត្រាលីនាពេលខ្លីខាងមុខនោះទេ ។
សម្តេចតេជោ ហ៊ុន សែននាយករដ្ឋមន្ត្រីកម្ពុជាបានប្រតិកម្មនៅព្រឹកថ្ងៃទី០៥ ខែមីនានេះថា មានសារព័ត៌មានក្នុងស្រុកមួយចំនួនបានស្រង់សម្តីអតីតមេដឹកនាំគណបក្សប្រឆាំង គឺលោក សម រង្ស៊ី ដែលបានលើកឡើងថា រូបគាត់បានត្រៀមខ្លួនរួចរាល់ ដើម្បីជួបសន្ទនាជាមួយរដ្ឋាភិបាល និងសម្តេចហ៊ុន សែន ដើម្បីដោះស្រាយវិបត្តិនយោបាយដែលកំពុងតែកើតមាននៅកម្ពុជានាពេលបច្ចុប្បន្ន ។ សម្តេចតេជោបានបញ្ជាក់ថា សម្តេចសូមជូនជាសារនយោបាយសម្រាប់ប្រជាពលរដ្ឋខ្លួនឯងផង និងសម្រាប់អ្នកខាងក្រៅផង (អតីតថ្នាក់ដឹកនាំបក្សប្រឆាំង) ដោយបញ្ជាក់ឱ្យបានច្បាស់ថា តើអ្នកបានធ្វើអ្វីខ្លះ ហើយអ្នកមកចង់ចរចាជាមួយនឹងសម្តេច ។
សម្តេចនាយករដ្ឋមន្ត្រីមានប្រសាសន៍បន្តថា៖ «អ្នកបានប្រព្រឹត្តអំពើក្បត់ជាតិ ក្បត់ប្រជាជន […] ខ្ញូំសូមបញ្ជាក់ថា បេះដូង ហ៊ុន សែន សឹងមួយជីវិត គឺសម្រាប់ការចរចា ។ ក្នុងមួយជីវិតនេះពោរពេញដោយការចរចា» ។ ប៉ុន្តែឥឡូវនេះ មានអ្នកមានចេតនាដែលគិតថា នៅថ្ងៃទី ១៥ នេះ ខ្ញុំព្រះករុណា ខ្ញុំចាកចេញពីភ្នំពេញទៅអូស្ត្រាលី […] គេកំពុងនិយាយថា នឹងមានការចរចា» ។
សម្តេចតេជោ ហ៊ុន សែន បញ្ជាក់ថា៖ «ខ្ញុំមិនមែនទៅអូស្ត្រាលី ដើម្បីចារចារជាមួយពួកក្បត់ជាតិទេ» ។ សម្តេចតេជោគ្រោងនឹងចាកចេញពីកម្ពុជានៅថ្ងៃទី១៥ ខែមីនានេះ ទៅចូលរួមកិច្ចប្រជុំកំពូល ពិសេសនៅទីក្រុងស៊ីដនី ប្រទេសអូស្ត្រាលីដែលនឹងប្រព្រឹត្តទៅនាថ្ងៃទី១៧-១៨ មីនា ដែលដឹកនាំការប្រជុំដោយនាយករដ្ឋមន្ត្រីអូស្ត្រាលីជាមួយប្រមុខដឹកនាំពីប្រទេសជាសមាជិកអាស៊ានទាំង ១០ ។
សម្តេចបញ្ជាក់ថា គ្មានការចរចាណាមួយនឹងកើតឡើងនោះទេ ហើយសម្តេចក៏បានស្នើមិត្តបរទេសកុំឱ្យសោះ ក្នុងការប៉ុនប៉ងរៀបចំឱ្យមានការជួបចរចាជាមួយលោក សម រង្ស៊ី លើទឹកដីអូស្ត្រាលី ៕
ចែករំលែកព័តមាននេះ