រាជធានីភ្នំពេញ ៖ លោកម៉ៅ មុនីវណ្ណ បន្ទាប់ពីលាឈប់ធ្វើជាតំណាងរាស្ត្ររបស់គណបក្សសម រង្ស៊ី នាពេលថ្មីៗនេះ ឥឡូវបានប្រកាសនៅក្នុងសន្និសីទកាសែតមួយនៅទីធ្លាខាងមុខរដ្ឋសភា កាលពីព្រឹកថ្ងៃទី២៣ មីនា ២០១១ ថា រូបលោក និងសមាជិកក្រុមការងារជាង១០នាក់ ទៀតប្រចាំខេត្តកំពង់ចាម និងខេត្តតាកែវ បានសម្រេចចាកចេញពីគណបក្សសម រង្ស៊ី ទៅចូលរួមជាមួយគណបក្សសិទ្ធិមនុស្សរបស់លោកគឹម សុខា វិញហើយ។
លោកម៉ៅ មុនីវណ្ណ បានមានប្រសាសន៍ថា ការដែលលោកទៅរួមជាមួយគណបក្សសិទ្ធិមនុស្ស គឺមកពីគណបក្សមួយនេះមានលទ្ធិប្រជាធិបតេយ្យពិតប្រាកដ គោរពការងារបានត្រឹមត្រូវ និងទុកចិត្តសម្រាប់អនាគត…ចំណែកគណបក្សសម រង្ស៊ី លែងមានប្រជាធិបតេយ្យទៀតហើយ ម្យ៉ាងទៀត លោកប្រធានសម រង្ស៊ី រស់នៅក្រៅប្រទេសជារបៀបនិរទេស គ្មានគោលដៅច្បាស់លាស់ គ្មានសិទ្ធិសម្រេចការងារអ្វីទេ ប្រគល់ឱ្យតែលោកយឹម សុវណ្ណ និងលោកអេង ឆៃអ៊ាង ចាត់ចែងប្រកបដោយបក្សពួកនិយម ។
សូមបញ្ជាក់ថា បន្ទាប់ពីភ្ញាក់ផ្អើលតំណាងរាស្ត្រលាឈប់ពីគណបក្សសម រង្ស៊ី នោះ កាលពីវេលាម៉ោង៩ព្រឹក ថ្ងៃទី២២ មីនា ២០១១ នៅទីធ្លាខាងមុខរដ្ឋសភា លោកម៉ៅ មុនីវណ្ណ អតីតតំណាងរាស្ត្រមណ្ឌលកំពង់ចាម និងបច្ចុប្បន្នជាប្រធានក្រុមការងារគណបក្សសម រង្ស៊ី ប្រចាំខេត្តតាកែវ បានប្រកាសនៅក្នុងសន្និសីទកាសែតថា លោកបានលាឈប់ពីតំណាងរាស្ត្រគណបក្សសម រង្ស៊ី ជាផ្លូវការហើយ និងសុំឱ្យមានការកែទម្រង់គណបក្សនេះជាបន្ទាន់ ដោយអះអាងប្រាប់អ្នកកាសែតថា គណបក្សសម រង្ស៊ី ស្ថិតនៅក្រោមឥទ្ធិពលគ្រួសារលោកយឹម សុវណ្ណ និងលោកអេង ឆៃអ៊ាង ។
លោកម៉ៅ មុនីវណ្ណ បន្តថា ខណៈដែលលោកចាកចេញពីគណបក្សសម រង្ស៊ី គឺមិនទៅចូលរួមជាមួយគណបក្សប្រជាជនកម្ពុជា ឬគណបក្សណានៅឡើយទេ… ប៉ុន្តែលោកព្រមានថា បើគ្មានការកែទម្រង់ទេ លោក និងសមាជិកឯទៀតនឹងទៅចូលរួមជាមួយគណបក្សណាដែលមានប្រជាធិបតេយ្យពិតប្រាកដ ៕
ចែករំលែកព័តមាននេះ