ខេត្តបន្ទាយមានជ័យ ៖ កម្លាំងនគរបាលជំនាញការិយាល័យ ប្រឆាំងគ្រឿងញៀនបានរៀបចំសំណុំរឿង បញ្ជូនមុខសញ្ញាប្រើប្រាស់គ្រឿងញៀនមួយសំបុកធំចំនួន០៩នាក់ ដែលមានស្រីម្នាក់ទៅសាលាដំបូងខេត្តបន្ទាយមានជ័យ នៅថ្ងៃទី០៤ ខែមីនា ឆ្នាំ២០១៨នេះ ។
លោកវរសេនីយ៍ឯកធិន ស៊ិនដេត អធិការនគរបាលក្រុងប៉ោយប៉ែតបានឲ្យដឹងថា នៅវេលាម៉ោង១១និង៣០នាទីព្រឹកថ្ងៃទី០២ ខែមីនា ឆ្នាំ២០១៨ ក្រោយពីទទួលបានព័ត៌មានថា មានក្រុមក្មេងប្រមូលផ្តុំគ្នាជក់គ្រឿងញៀន នៅក្នុងបន្ទប់ជួលក្នុងភូមិបាលិលេយ្យ២ សង្កាត់-ក្រុងប៉ោយប៉ែត ខេត្តបន្ទាយមានជ័យ កម្លាំងនគរបាលផ្នែកជំនាញប្រឆាំងគ្រឿងញៀននៃអធិការដ្ឋាននគរបាលក្រុងប៉ោយប៉ែតបានចុះប្រតិបត្តិការត្រួតពិនិត្យនៅក្នុងបន្ទប់ជួល ឃាត់ខ្លួនមុខសញ្ញាសង្ស័យទាំង២នាក់ ម្នាក់ឈ្មោះ អ៊ិន សិលា ភេទប្រុស អាយុ១៨ឆ្នាំ និងម្នាក់ទៀតឈ្មោះ ឆន ព្រីង ភេទប្រុស អាយុ១៨ឆ្នាំ ទាំង២នាក់នៅភូមិក្បាលស្ពាន១ សង្កាត់- ក្រុងប៉ោយប៉ែត ។ ជាមួយគ្នានឹងការឃាត់ខ្លួននេះ សមត្ថកិច្ចដកហូតបានវត្ថុតាងមានម្សៅក្រាមសថ្លា១កូនថង់តូច ទូរស័ព្ទដៃចំនួន១គ្រឿង ដបកែច្នៃសម្រាប់ជក់ថ្នាំញៀន២ ដែកកេះចំនួន៨កាំបិតសាម៉ូរ៉ៃ២ កាំបិតចិតបន្លែ១ ។
លោកអធិការនគរបាលក្រុងប៉ោយប៉ែត គឺលោកវរសេនីយ៍ឯកធិន ស៊ិនដេត ក៏បានបញ្ជាក់ទៀតថា ក្រោយពីធ្វើការឃាត់ខ្លួនមុខសញ្ញាបានចំនួន២នាក់នេះ កម្លាំងនគរបាលជំនាញនៅវេលាម៉ោង៤ល្ងាចថ្ងៃទី០២ ខែមីនា ឆ្នាំ២០១៨ ថ្ងៃដដដែលបានបន្តធ្វើការចុះប្រតិបត្តិការទៅចំណុចផ្ទះជួលនៅភូមិក្បាលស្ពាន១ សង្កាត់-ក្រុងប៉ោយប៉ែត ឃាត់ខ្លួនមុខសញ្ញាប្រុស-ស្រីចំនួន៧នាក់ទៀតមានឈ្មោះទី១-សារឿន ទី ភេទប្រុស អាយុ៣៨ឆ្នាំ នៅភូមិក្បាលស្ពាន១ សង្កាត់-ក្រុងប៉ោយប៉ែត ទី២-ចាន់ ស្រីលាក់ ភេទស្រី អាយុ២២ឆ្នាំ នៅភូមិ-សង្កាត់ផ្សារកណ្តាល ក្រុងប៉ោយប៉ែត ទី៣-មុំ សំណាង ភេទប្រុស អាយុ១៨ឆ្នាំ នៅភូមិ-សង្កាត់ផ្សារកណ្តាល ក្រុងប៉ោយប៉ែត ទី៤-ខាន់ សុជា ភេទប្រុស អាយុ៣៣ឆ្នាំ នៅភូមិបាលិលេយក្យ២ សង្កាត់-ក្រុងប៉ោយប៉ែត ទី៥- មុត មុន្នី ភេទប្រុស អាយុ២៦ឆ្នាំ ភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ទី៦ – យូ ណេស្កា ភេទប្រុស អាយុ៣៦ឆ្នាំ ភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែតទី៧- ឌី ញាញ់ ភេទប្រុស អាយុ៣៧ឆ្នាំ ភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។
លោកអធិការបានបន្តថា ក្នុងកិច្ចប្រតិបត្តិការបង្ក្រាបក្រុមប្រមូលផ្តុំគ្នាជក់គ្រឿងនេះ សមត្ថកិច្ចបានរកឃើញថ្នាំញៀនម្សៅក្រាមពណ៌សថ្លា ចំនួន១កូនថង់ សម្ភារជក់ថ្នាំញៀនចំនួន១ , ដែកកេះ១ ,ថ្នាំគ្រាប់ពណ៌ក្រហមមានអក្សរ WY ចំនួន៥គ្រាប់, ដបច្នៃសម្រាប់ជក់ថ្នាំញៀនចំនួន១ ។
ពិនិត្យឆែកឆេរមួយកន្លែងទៀតដកហូតបាន ៖ ដបច្នៃសម្រាប់ជក់ថ្នាំ ,ដែកកេះចំនួន២ ,បំពង់ប៊ឺតសម្រាប់ថ្នាំញៀនចំនួន៣កំណាត់ ,សំបកថង់ថ្នាំញៀនប្រើប្រាស់រួចចំនួន២ ។
លោកវរសេនីយ៍ត្រី ង៉េង សុជា នាយការិយាល័យនគរបាលប្រឆាំងគ្រឿងញៀនបានបញ្ជាក់ឲ្យដឹងថា ៖ មុខសញ្ញាប្រើប្រាស់គ្រឿងទាំងសំបុកនេះ ត្រូវបានកម្លាំងនគរបាលការិយាល័យជំនាញរៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យហើយដែរ ៕
ចែករំលែកព័តមាននេះ