រាជធានីភ្នំពេញ ៖ ក្នុងជំនួបជាមួយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៅឯក្រសួងការបរទេស មន្ត្រីជាន់ខ្ពស់សាធារណរដ្ឋកូរ៉េខាងត្បូង បានអះអាងពីការបន្ដសាងសង់អគារ Golden…
រាជធានីភ្នំពេញ ៖ ក្នុងជំនួបជាមួយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៅឯក្រសួងការបរទេស មន្ត្រីជាន់ខ្ពស់សាធារណរដ្ឋកូរ៉េខាងត្បូង បានអះអាងពីការបន្ដសាងសង់អគារ Golden Tower 42ជាន់ និងគម្រោងមួយចំនួននៅក្នុងទីក្រុងរណបកាំកូស៊ីធី ឡើងវិញនៅពេលឆាប់ៗនេះ បន្ទាប់ពីផ្អាកដំណើរការជាច្រើនឆ្នាំមកហើយ ។ នេះបើយោងតាមលោក ជុំ សុន្ទរី អ្នកនាំពាក្យក្រសួងការបរទេស ។
អនុរដ្ឋមន្ត្រីការបរទេសសាធារណរដ្ឋកូរ៉េ លោក Yoon Soon-Gu បានថ្លែងដោយពាំនាំការផ្តាំផ្ញើសួរសុខទុក្ខរបស់រដ្ឋមន្ត្រីការបរទេសកូរ៉េជូនលោកទេសរដ្ឋមន្ត្រី និងបានកត់សម្គាល់ដោយការពេញចិត្តចំពោះលទ្ធផលប្រកបដោយផ្លែផ្កាក្នុងទំនាក់ទំនងរវាងប្រទេសទាំងពីរ។ ក្នុងនោះ លោកក៏បានអះអាងពីបំណងរបស់រដ្ឋាភិបាលកូរ៉េ ក្នុងការបន្តជំរុញកិច្ចសហប្រតិបត្តិការលើគ្រប់វិស័យជាមួយកម្ពុជា ពិសេសការផ្លាស់ប្តូរពាណិជ្ជកម្ម និងវិនិយោគ។ គណៈប្រតិភូ ក៏បានជម្រាបលោកទេសរដ្ឋមន្ត្រីពីបំណងរបស់វិនិយោគិនកូរ៉េបន្តដំណើរការគម្រោងសាងសង់អគារខុនដូ៤២ជាន់ និងគម្រោងនៅកាំកូស៊ីធី ដែលបានផ្អាកដំណើរការក្នុងរយៈកាលកន្លងមក ។
ការចាប់ផ្តើមបន្តសាងសង់ឡើងវិញនេះ ត្រូវបានអ្នកជំនាញមើលឃើញថា ដោយសារម្ចាស់គម្រោងមានភាពជឿជាក់ទៅលើផ្នែកសេដ្ឋកិច្ច សិ្ថរភាពនយោបាយ និងការដឹកនាំរបស់ប្រមុខរាជរដ្ឋាភិបាលកម្ពុជា ។ លើសពីនេះ វត្តមានអគារ៤២ជាន់ ក៏នឹងចូលរួមធ្វើឱ្យវិស័យអចលនទ្រព្យកាន់តែខ្លាំងថែមមួយកម្រិតទៀតផងដែរ ។
លោកឧកញ៉ា ចេង ខេង នាយកក្រុមហ៊ុន CPLមានប្រសាសន៍កន្លងមកថា ៖« ប្រសិនបើម្ចាស់គម្រោងអគារ៤២ជាន់ គាត់មិនមានភាពកក់ក្តៅ អត់មានទីផ្សារ និងការជឿជាក់ទេ ខ្ញុំជឿថា គាត់មិនអាចបន្តការសាងសង់អគារ៤២ជាន់នេះ នៅដើមឆ្នាំ២០១៨ទេ ។ បើគាត់មានការព្រួយបារម្ភពីបញ្ហាបោះឆ្នោត ឬបញ្ហាអ្វី គាត់អាចរង់ចាំមើលការបោះឆ្នោតរួចរាល់ទើបសាងសង់ ក៏មិនហួសពេលដែរ តែការសម្រេចចិត្តនេះ ក៏ព្រោះតែម្ចាស់គម្រោងមានការជឿជាក់ទៅលើទីផ្សារថា វានឹងល្អ ពិសេសអគារនេះនៅចំទីតាំងល្អជាងគេបំផុតនៅក្នុងតំបន់ ហើយនេះជាចំណុចខ្លាំងរបស់គាត់ ធ្វើការសិក្សាហើយសម្រេចសាងសង់ » ។
លោកឧកញ៉ាបន្តថា ៖« ការចាប់ផ្តើមសាងសង់ឡើងវិញ ដើម្បីបញ្ចប់គម្រោងអគារកម្ពស់ ៤២ជាន់នេះ វាគឺជាមុខមាត់ថ្មីមួយសម្រាប់វិស័យខុនដូ នឹងកាន់តែមានភាពជឿជាក់ ។ ប្រសិនបើវាត្រូវបានចាប់ផ្តើមឡើងវិញ និងអាចបញ្ចប់សព្វគ្រប់ដូចការគ្រោងទុក វាពិតជាអស្ចារ្យសម្រាប់ប្រទេសយើងផងដែរ » ។
លោក ឡៅ ទិព្វសីហា អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ មានប្រសាសន៍កន្លងមកថា ម្ចាស់គម្រោងនៃអគារ៤២ជាន់ បានធ្វើលិខិតមួយមកក្រសួងថានឹងចាប់បន្តដំណើរការនៅឆ្នាំ២០១៨នេះ ។
បើតាមលោកអនុរដ្ឋលេខាធិការ គម្រោងនេះ នឹងបញ្ចប់រួចរាល់ជាស្ថាពរនៅឆ្នាំ២០១៩ខាងមុខ ។
គួរបញ្ជាក់ថា អគារ Gold Tower 42ជាន់ បានបញ្ចប់ការសាងសង់ដល់ជាន់ទី៣១ហើយ។ នៅពេលសាងសង់រួច អគារនេះនឹងក្លាយជាមជ្ឈមណ្ឌលពាណិជ្ជកម្មចម្រុះ ដែលមានចំណតយានយន្តក្រោមដីចំនួន៥ជាន់ និងចាប់ពីជាន់ទី១ដល់ទី៣ ជាផ្សារទំនើប, ពីជាន់ទី៤ដល់ជាន់ទី១២ ជាអគារការិយាល័យ និងចាប់ពីជាន់ទី១៣ដល់ជាន់ទី៤២ ជាខុនដូដែលមានចំនួន៣៩៩យូនីត ដែលត្រូវបានក្រុមហ៊ុនYUNWOO Co, Ltd កាលពីអំឡុងខែវិច្ឆិកា ឆ្នាំ២០១៧ ចុះកិច្ចព្រមព្រៀងជាមួយក្រុមហ៊ុន SHENGZHENG HONGTOAO Decoration និងក្រុមហ៊ុន WAIMAN Construction & Engineering (Macao China) ដើម្បីចាប់ផ្តើមសាងសង់អគារនេះ ៕
ចែករំលែកព័តមាននេះ