តាមប្រភពព័ត៌មាន Metro បានឲ្យដឹងថា អ្នកប្រមឹកអាចនឹងប្រឈមការកើតមហារីក៥ដងច្រើនជាងធម្មតា ពេលផឹកតែក្តៅបន្ថែម។ នេះជាលទ្ធផលនៃការសិក្សាស្រាវជ្រាវចុងក្រោយ។
កន្លងមក ជំងឺមហារីកបំពង់អាហារមានការទាក់ទងជាមួយនឹងការផឹកស្រា និងជក់បារី តែពេលនេះអ្នកស្រាវជ្រាវរកឃើញថា អត្រាប្រឈមកាន់តែកើនខ្ពស់ ប្រសិនបើផឹកទឹកតែក្តៅៗបន្ថែម។
ការសិក្សានេះ សិក្សាទៅលើមនុស្ស ៤៥៦.១៥៥នាក់ ដែលមានអាយុចន្លោះពី៣០ឆ្នាំទៅ៧៩ឆ្នាំ នៅប្រទេសចិន។ គេតាមដានមើលការវិវត្តន៍លើអ្នកដែលផឹកស្រា ហើយផឹកតែក្តៅ។ គេរកឃើញថា អ្នកដែលផឹកតែក្តៅជាប្រចាំ ហើយផឹកស្រាលើសពី១៥ក្រាមក្នុងមួយថ្ងៃរាល់ថ្ងៃ មានអត្រាកើតជំងឺមហារីកច្រើនជាងមនុស្សធម្មតា។ នេះជាការសិក្សារបស់វេជ្ជបណ្ឌិត Canqing Yu និងអ្នកធ្វើការជាមួយ មកពីមូលនិធិជាតិវិទ្យាសាស្ត្រធម្មជាតិនៃប្រទេសចិន។
ក្នុងសេចក្តីសន្និដ្ឋាន គេបានសរសេរថា៖ «ការចៀសវាងពីការទទួលទានតែក្តៅ អាចជួយកាត់បន្ថយការប្រឈមនឹងជំងឺមហារីកបំពង់អាហារ លើអ្នកផឹកស្រា ឬជក់បារី»។
គួរបញ្ជាក់ផងដែរថា រៀងរាល់ឆ្នាំមានមនុស្ស ៩២១១នាក់ ត្រូវបានគេរកឃើញថា មានជំងឺមហារីកបំពង់អាហារ។ ការវិវត្តន៍នៃជំងឺនេះ គឺមិនល្អទាល់តែសោះ ព្រោះមានតែអ្នកជំងឺ១៥% ទេ ដែលអាចរស់បានលើសពី៥ឆ្នាំ៕
ចែករំលែកព័តមាននេះ