រាជធានីភ្នំពេញ ៖ មុខសញ្ញាជួញដូរ និងផលិតគ្រឿងញៀនដ៏ធំមួយ ដែលលាក់ខ្លួននៅក្នុងភូមិគ្រឹះលេខ២៦BC ផ្លូវលេខ៣៨៤ សង្កាត់ទួលស្វាយព្រៃទី១ ខណ្ឌចំការមន បានត្រូវសមត្ថកិច្ចនៃមន្ទីរប្រឆាំងគ្រឿងញៀន ដោយមានការចូលរួមពីមន្ត្រីសាលាដំបូងរាជធានី និងលោកឡូ យុយ អភិបាលខណ្ឌចំការមនផង បានអនុវត្តដីកាឆែកឆេរកាលពីរសៀលថ្ងៃទី២៧ ធ្នូ ឆ្នាំ២០១២ ដោយឃាត់ខ្លួនជនសង្ស័យ៣នាក់ ដកហូតអាវុធខ្លីបាន១ដើម និងថ្នាំញៀនមួយកញ្ចប់ធំ ។
ក្នុងប្រតិបត្តិការនេះ សមត្ថកិច្ច និងមុខសញ្ញាជនសង្ស័យបានផ្ទុះអាវុធតដៃគ្នាមួយប្រាវប្រមាណជា១០គ្រប់ ជាហេតុធ្វើឲ្យជនសង្ស័យ២នាក់ រងរបួសដោយគ្រាប់កាំភ្លើង ដោយឡែក កម្លាំងសមត្ថកិច្ចបានរួចផុតពីគ្រោះថ្នាក់ ។ តាមប្រភពព័ត៌មានជំហានដំបូងឱ្យដឹងថា មន្ត្រីសមត្ថកិច្ចដែលស្ថិតក្នុងប្រតិបត្តិការនេះនិយាយថា មូលហេតុដែលមានការផ្ទុះអាវុធ គឺដោយសារក្រុមជនសង្ស័យជាមន្ត្រីយោធា ហើយមានអាវុធជាប់ខ្លួនបានបាញ់មកលើសមត្ថកិច្ចមុនទើបសមត្ថកិច្ចបាញ់តដៃវិញ ខណៈពេលបើកប្រតិបត្តិការឡោមព័ទ្ធលំនៅឋានដ៏ស្តុកស្តម្ភមួយនេះ ។
នៅក្នុងប្រតិបត្តិការខាងលើនេះដែរ សមត្ថកិច្ចដកហូតបានរថយន្តម៉ាកហាំម័រ ពណ៌ខ្មៅ មួយគ្រឿង និងអាវុធខ្លីម៉ាកBអាតា ដែលជាប្រភេទកាំភ្លើងទំនើបមានតម្លៃរាប់ពាន់ដុល្លាររួមជាមួយប្រាក់ដុល្លារមួយចំនួនទៀត ។ មន្ត្រីសមត្ថកិច្ចដដែលបានបញ្ជាក់ថា ប្រតិបត្តិការនេះក៏បានឈានទៅឆែកឆេរទីតាំង៣កន្លែងផ្សេងទៀត ដែលទីតាំង២កន្លែងនៅខណ្ឌមានជ័យ គឺក្នុងសង្កាត់ព្រែកប្រា១ និងក្នុងសង្កាត់ស្ទឹងមានជ័យ១ តែមិនមានប្រភពណាមួយឱ្យដឹងថា ការឆែកឆរទាំង២ទីតាំងនោះបានរកឃើញភស្តុតាងអ្វីខ្លះទេ ។ ចំណែកទីតាំងមួយទៀតក៏បានធ្វើការឆែកឆេរដែរ គឺនៅផ្ទះលេខ៣៦ ផ្លូវលេខ២០២ ក្នុងសង្កាត់ទឹកល្អក់៣ ខណ្ឌទួលគោក ។ ប្រភពព័ត៌មានជំហានដំបូងត្រូវបានរកឃើញម្សៅសចំនួន៣បាវ និងឧបករណ៍ពុម្ពផលិតគ្រឿងញៀនចំនួន៣ ។
ជនសង្ស័យដែលសមត្ថកិច្ចឃាត់ខ្លួននៅក្នុងភូមិគ្រឹះក្នុងសង្កាត់ទួលស្វាយព្រៃទី១ មាន៣នាក់គឺ ស្រី្តម្នាក់ និងប្រុស២នាក់ ក្នុងនោះ ១-ឈ្មោះពៅ បុប្ផា ភេទស្រី ២-ឈ្មោះស្រី សារឿន ភេទប្រុស ដែលមានអាវុធខ្លីបាញ់តដៃជាមួយសមត្ថកិច្ច និងជាមេខ្លោង ហើយ២នាក់នេះជាប្តីប្រពន្ធ ចំណែកម្នាក់ទៀតមិនទាន់ស្គាល់ឈ្មោះនៅឡើយទេ ។
មន្ត្រីសមត្ថកិច្ចបង្ហើបថា មុនឈានដល់ប្រតិបត្តិការឆែកឆេរទីតាំងខាងលើនេះ គឺសមត្ថកិច្ចបានប្រើពេលវេលាតាមដានស្រាវជ្រាវអស់រយៈពេលជាង១ឆ្នាំមកហើយ ទើបតែថ្មីៗនេះ សមត្ថកិច្ចបានឃាត់ខ្លួនជនសង្ស័យម្នាក់នៅតាមដងផ្លូវ ទើបបន្តឈានទៅឆែកឆេរទីតាំងខាងលើ ដែលជាកន្លែងស្នាក់នៅរបស់ក្រុមជនសង្ស័យជូញដូរនិងផលិតគ្រឿងញៀន ស្ថិតក្នុងភូមិគ្រឹះយ៉ាងស្តុកស្តម្ភនេះ ។
សូមបញ្ជាក់ថា មុខសញ្ញាមួយក្រុមខាងលើនេះ គឺជាជនជាតិវៀតណាមទាំងអស់គ្នា ហើយក្នុងនោះ ឈ្មោះស្រី សារឿន បានធ្វើជាមន្រ្តីយោធាដែលឋានៈជាឧត្តមសេនីយ៍ទៀតផង តែអត់ចេះនិយាយភាសាខ្មែរច្បាស់ទេ ។ មិនដឹងថាឋានៈជាឧត្តមសេនីយ៍ និងការប្រើរថយន្តហាំម័រពាក់ស្លាកលេខខេមរភូមិន្ទនោះជាការក្លែងក្លាយ ឬបែបណានោះទេ ៕
ចែករំលែកព័តមាននេះ