រាជធានីភ្នំពេញ ៖ រាជរដ្ឋាភិបាលកម្ពុជា បានប្រកាសកាលពីពេលថ្មីៗនេះថា ផ្លូវជាតិលេខ៣ នឹងត្រូវស្ថាបនាពង្រីកបន្ថែមទៀតដើម្បីកុំឲ្យមានបញ្ហាកកស្ទះចរាចរណ៍ ឬពិបាកធ្វើដំណើរ ។ ទន្ទឹមនឹងនេះ បច្ចុប្បន្ន…
រាជធានីភ្នំពេញ ៖ រាជរដ្ឋាភិបាលកម្ពុជា បានប្រកាសកាលពីពេលថ្មីៗនេះថា ផ្លូវជាតិលេខ៣ នឹងត្រូវស្ថាបនាពង្រីកបន្ថែមទៀតដើម្បីកុំឲ្យមានបញ្ហាកកស្ទះចរាចរណ៍ ឬពិបាកធ្វើដំណើរ ។ ទន្ទឹមនឹងនេះ បច្ចុប្បន្ន នៅតាមបណ្ដោយផ្លូវជាតិមួយនេះ ក៏កំពុងតែមានសកម្មភាពវិនិយោគមមាញឹកទៅលើវិស័យដីធ្លី ក្នុងនោះគេសង្កេតឃើញមានការចាក់ពង្រាបដីធំៗ និងមានតំបន់ខ្លះកាត់ពុះជាឡូត៍សម្រាប់លក់ផងដែរ ។
លោក ប៉ូ អ៊ាវគង់ នាយកគ្រប់គ្រងក្រុមហ៊ុនវាយតម្លៃអចលនទ្រព្យ Advance បានឲ្យដឹងថា តាមពិតទៅ សកម្មភាពវិនិយោគនៅតាមបណ្ដោយផ្លូវជាតិលេខ៣ មិនមានទុនធំៗទេ ហើយភាគច្រើននៃការវិនិយោគនៅតំបន់នោះ គឺជាតំបន់រោងចក្រឧស្សាហកម្ម ។ អីចឹង ការចាក់បំពេញដី និងពង្រាបដីមានទំហំធំៗនោះ ក៏ដើម្បីសង់ជាឃ្លាំង និងរោងចក្រប៉ុណ្ណោះ ។
លោកថ្លែងថា ៖« នៅថ្ងៃអនាគតដ៏ខ្លី រោងចក្រមួយចំនួនដែលនៅក្នុងទីក្រុង នឹងត្រូវផ្លាស់ប្តូរទៅនៅជាយក្រុងវិញ ហើយតំបន់នៅតាមផ្លូវជាតិ ជាពិសេស ផ្លូវជាតិលេខ៣ និងលេខ៤ គឺជាតំបន់ដែលមានសក្ដានុពលសម្រាប់រោងចក្រឧស្សាហកម្ម ព្រោះអីតំបន់ទាំងនោះងាយស្រួលក្នុងការនាំទំនិញចេញ-ចូលទៅកាន់កំពង់ផែអន្តរជាតិ » ។
លោកបន្តថា កាលពីមុន រោងចក្រសហគ្រាសបានដាក់ទីតាំងនៅផ្លូវវេងស្រេង និងតំបន់ជិតៗក្រុង ក៏ប៉ុន្តែបច្ចុប្បន្ន តំបន់ទាំងនោះបានក្លាយជាតំបន់លំនៅឋានសម្រាប់ការរស់នៅវិញម្ដង។ ដូចនេះ ទើបធ្វើឲ្យចរាចរណ៍មានភាពមមាញឹក និងកាន់តែស្ទះខ្លាំងឡើង ដែលតម្រូវឲ្យមានការរុះរើរោងចក្រទៅកាន់តំបន់ជាយក្រុងវិញ ដើម្បីកាត់បន្ថយការកកស្ទះ ។
ពាក់ព័ន្ធនឹងការបោះឆ្នោតជាតិនាពេលខាងមុខនេះ លោក ប៉ូ អ៊ាវគង់ បាននិយាយថា ៖ «ខ្ញុំនៅតែមានសុទិដ្ឋិនិយមចំពោះវិស័យដីធ្លី និងអចលនទ្រព្យទាំងមូលនៅកម្ពុជា ព្រោះកម្ពុជាយើងមានប្រវត្តិបោះឆ្នោតជាច្រើនលើកមកហើយ ប៉ុន្តែវាគ្មានបញ្ហាអ្វីធ្ងន់ធ្ងរទេ ។ ដូចនេះ នៅក្រោយការបោះឆ្នោតខាងមុខ យើងរំពឹងថា ការវិនិយោគនឹងកាន់តែកើនឡើងថែមទៀត។ បច្ចុប្បន្ន លំហូរវិនិយោគពីបរទេសមកកាន់កម្ពុជាកាន់តែច្រើនឡើងៗ ជាពិសេស វិនិយោគិនមកពីប្រទេសចិនផ្ទាល់តែម្ដង ដែលបច្ចុប្បន្ននេះ គេសង្កេតឃើញមានកំណើនច្រើន ហើយបាននិងកំពុងបណ្ដាក់ទុនវិនិយោគជាបន្តបន្ទាប់នៅកម្ពុជា » ។
អ្នកវាយតម្លៃអចលនទ្រព្យផ្សេងទៀត ក៏បានលើកហេតុផលស្រដៀងនឹងលោក ប៉ូ អ៊ាវគង់ ដែរ គឺវិនិយោគិនចាប់ផ្ដើមស្វែងរកការវិនិយោគនៅតំបន់ណាដែលមានគម្រោងអភិវឌ្ឍន៍របស់រាជរដ្ឋាភិបាល ។ ជាក់ស្ដែង តំបន់ដែលគ្រោងនឹងធ្វើស្ពានឆ្លងទន្លេ តំបន់ទីក្រុងរណប និងការអភិវឌ្ឍហេដ្ឋារចនាសម្ព័ន្ធ ជាដើម ។
លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា កំណើនប្រជាពលរដ្ឋនៅរាជធានីភ្នំពេញ គឺទាមទារឲ្យមានការពង្រីកផ្ទៃដីរាជធានីជាបន្តបន្ទាប់ ហើយការពង្រីកផ្ទៃដីរាជធានីនេះដែរ គឺត្រូវការកាត់យកដីនៅខេត្តជាប់រាជធានី ។ ដូចនេះ ទើបធ្វើឲ្យតម្លៃដីនៅជាយៗរាជធានីឡើងថ្លៃផងដែរ ។
សម្ដេចតេជោ នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងនាពេលកន្លងមកថា កាលពីសម័យមុន ម្នាក់ៗនាំគ្នារត់ចោលដី ព្រោះតែសង្គ្រាម ប៉ុន្តែមកដល់សម័យនេះវិញ ម្នាក់ៗនាំគ្នាចាប់ដីទុកលក់ ស្របពេលតម្លៃដីក៏ចេះតែកើនឡើងជាបន្តបន្ទាប់ ហើយការឡើងថ្លៃដីនេះ ក៏មិនមែនជារឿងចៃដន្យដែរ ពោលគឺជាការខិតខំប្រឹងប្រែងរបស់រាជរដ្ឋាភិបាល ៕
ចែករំលែកព័តមាននេះ