រាជធានីភ្នំពេញ ៖ អ្នកប្រដាល់ជើងខ្លាំងគ្មានគូប្រៀបក្នុងទសវត្សឆ្នាំ១៩៩០អូត ភូថង ដែលជាប្អូនប្រុសបង្កើតរបស់អធិរាជកែងឆេះជង្គង់ហោះលោក អេ ភូថង អស់រយៈពេលជាច្រើនឆ្នាំកន្លងមកនេះ បានធ្វើឱ្យអ្នកនិយមតាមដានការប្រកួតភាគច្រើនសម្ដែងការងឿងឆ្ងល់យ៉ាងខ្លាំងមិនដឹងថាកីឡាកររូបនេះទៅប្រកបរបរអ្វីបន្ទាប់ពីបាត់មុខឈឹងពីសង្វៀនប្រដាល់អស់រយៈពេលយ៉ាងយូរបែបនេះ។
ជួបអ្នកយកព័ត៌មានកោះសន្តិភាពកាលពីពេលថ្មីៗកន្លងទៅនេះ លោក អូត ភូថង ដែល
មានកាយសម្បទារឹងមាំ ខ្ពស់ស្រឡះ សាច់ឈាមស្រស់ថ្លា រហ័សរហួនមិនខុសកាលពីនៅក្មេងបានប្រាប់ថា សព្វថ្ងៃលោកធ្វើជាគ្រូបង្ហាត់ប្រដាល់ឱ្យក្លិបកីឡាPrakutដែលមានទីតាំងនៅក្នុងសង្កាត់ចតុមុខ ខណ្ឌដូនពេញ ម្ដុំរដ្ឋសភា ដោយទទួលបានប្រាក់ខែបន្តិចបន្តួចយកមកផ្គត់ផ្គង់ជីវភាពគ្រួសារ។
អូត ភូថង ជាអតីតអ្នកប្រដាល់ដ៏ល្បីឈ្មោះមួយរូបនៅក្នុងសមាគមកីឡាប្រដាល់ក្រសួងការពារជាតិ ដែលធ្លាប់ឡើងប្រកួតដណ្ដើមខ្សែក្រវាត់ជើងឯកស្ទើររាប់មិនអស់ពីគ្រប់ស្ថាប័ននានា ។ លោកប្រាប់ថា សព្វថ្ងៃនេះលោកនៅតែស្រឡាញ់ចូលចិត្តវិស័យកីឡាប្រដាល់យ៉ាងខ្លាំង ប៉ុន្តែដោយសារតែលោកមានវ័យចំណាស់បន្តិចទៅហើយ កម្លាំងចុះខ្សោយជាងមុន មិនអាចឱ្យលោកឡើងសង្វៀនប្រកួតដូចមុនបានទៀតទេ ទើបលោកមានបំណងបង្កើតក្លិបប្រដាល់មួយ គ្រាន់តែមិនទាន់មានលទ្ធភាពប៉ុណ្ណោះ ។
លោកបានមកធ្វើជាគ្រូបង្ហាត់ប្រដាល់ឱ្យក្លិបកីឡាឈ្មោះPrakutនេះជិត១ឆ្នាំហើយដោយទទួលបានប្រាក់ឧបត្ថម្ភក្នុង១ខែ១៥០ដុល្លារ ហើយក្នុង១ថ្ងៃបង្ហាត់២ម៉ោងចាប់ពីម៉ោង៥និង៣០នាទីល្ងាចដល់ម៉ោង៧និង៣០នាទីយប់ ។ បន្ទាប់មកធ្វើជាសន្តិសុខយាមផ្សារទំនើបមួយនៅក្នុងរាជធានីភ្នំពេញរហូតដល់ម៉ោង៥ភ្លឺ និងឆ្លៀតពេលទៅធ្វើការឱ្យប៉ុស្តិ៍លេខ៥រៀងរាល់ថ្ងៃអាទិត្យទៀតផង ។ អូត ភូថង បានប្រាប់ថា តាមពិតការងារបន្ទាប់បន្សំដែលលោកធ្វើទាំងអស់នេះជាការងារបណ្ដោះអាសន្នដើម្បីស្វែងរកកម្រៃបន្ថែមមកជួយទប់តម្រូវការនៅក្នុងគ្រួសារប៉ុណ្ណោះខណៈបំណងប្រាថ្នាទៅថ្ងៃអនាគតពិតប្រាកដគឺចង់បើកក្លិបប្រដាល់មួយបង្ហាត់ដល់កីឡាករក្មេងៗសម្រាប់បន្តវេនទៅថ្ងៃក្រោយ ។
លោកមិនចង់ឱ្យភាពល្បីល្បាញ និងកេរ្ដិ៍ឈ្មោះដែលលោកធ្លាប់ទទួលបានពីអាជីពប្រដាល់បាត់បង់នោះទេ យ៉ាងហោចណាស់ក៏បន្សល់ទុកឈ្មោះនៅលើស្លាកយីហោប្រដាល់គុនខ្មែរនេះដែរ ។ លោកថ្លែងថា សព្វថ្ងៃប្រសិនបើមានអ្នកជួយឱ្យលោកបើកក្លិបប្រដាល់បានមែននោះមិនដឹងជាសប្បាយចិត្តយ៉ាងណានោះទេ ព្រោះវាជាបំណងប្រាថ្នា និងក្ដីស្រមៃតែមួយគត់ក្នុងឆាកជីវិត ។ ជាមួយគ្នានេះដែរលោក អេ ភូថង ប្រាប់ថា លោកចង់ជួយប្អូនប្រុសបានចូលធ្វើជាចៅក្រមនិងអាជ្ញាកណ្ដាលប្រដាល់តាមសង្វៀនប៉ុស្តិ៍ទូរទស្សន៍នានាដូចអ្នកប្រដាល់ជើងចាស់ដទៃទៀតដែរ គ្រាន់តែអូត ភូថង មិនសូវចេះអក្សរខ្មែរទើបពិបាកបន្តិចដោយត្រូវចំណាយពេលវេលាបង្ហាត់ជាច្រើនខែទើបបាន។
គួរបញ្ជាក់ថា លោក អូត ភូថង សព្វថ្ងៃនេះមានអាយុ៣៧ឆ្នាំហើយ ជាអ្នកខេត្តកោះកុងបានចូលហ្វឹកហាត់ប្រដាល់នៅក្នុងឆ្នាំ១៩៩៦។
លោកមានបងប្អូន៣នាក់ប្រុស២នាក់និងស្រីម្នាក់ ។ រូបលោក និងបងប្រុសអេ ភូថង
គឺជាអ្នកប្រដាល់ល្បីឈ្មោះលំដាប់ជួរមុខប្រចាំប្រទេសកម្ពុជា ចំណែកប្អូនស្រីពៅម្នាក់ទៀតមិនមែនជាអ្នកប្រដាល់នោះទេ ។ ឪពុក-ម្ដាយលោកនៅរស់ទាំង២នាក់គ្រាន់តែពួកគាត់ចែកផ្លូវគ្នា ។ ឪពុកឈ្មោះយាន លីង អាយុជាង៦០ឆ្នាំដែលពីមុនគឺជាអ្នកប្រដាល់ល្បីឈ្មោះប្រចាំខេត្តកោះកុងធ្លាប់ឆ្លងដែនទៅប្រកួតនៅស្រុកថៃជាច្រើនលើកទៀតផង ឯម្ដាយឈ្មោះអាត អន់ អាយុជាង៥០ឆ្នាំ ។
អូត ភូថង បានរៀបការប្រពន្ធនៅក្នុងឆ្នាំ២០០៥ ។ ប្រពន្ធរបស់លោកឈ្មោះអេ ដារីយ៉ា មានអាយុជាង៣០ឆ្នាំ ហើយសព្វថ្ងៃមានកូន២នាក់ ។ កូនស្រីឈ្មោះជីង អាយុជាង១០ឆ្នាំនិងកូនប្រុសឈ្មោះប៊េនអាយុមិនទាន់ដល់១០ឆ្នាំទេ។សម្រាប់ថ្ងៃខាងមុខកូនប្រុសរបស់លោកនៅមិនទាន់ដឹងថាត្រូវឱ្យចូលហាត់ប្រដាល់ស្នងតំណែងលោកឬយ៉ាងណានោះទេ ដោយលោកប្រាប់ថា អាស្រ័យទៅលើចំណង់ចំណូលចិត្តរបស់គេតែប៉ុណ្ណោះ៕
ចែករំលែកព័តមាននេះ