ខេត្តព្រះសីហនុ ៖ ព្រឹកថ្ងៃទី១ មីនា ២០១៨ នៅសាលប្រជុំសាលាខេត្តព្រះសីហនុ មានរៀបចំពិធីប្រកាសផ្ទេរភារកិច្ចចូលកាន់មុខតំណែង ប្រធាន-អនុប្រធានមន្ទីររៀបចំដែនដីនគរូបនីយកម្ម សំណង់និងសុរិយោដីខេត្ត និងប្រធាន-អនុប្រធានការិយាល័យ តាមដីកាសម្រេចលេខ០០២/១៨ ចុះថ្ងៃទី២០ ខែកុម្ភ: ឆ្នាំ២០១៨ ។ គឺយោងតាមការសម្រេចរបស់ក្រសួងរៀបចំដែនដី នគរូបនីយកម្ម បានសម្រេចផ្ទេរភារកិច្ចលោក នួន ប៉ុកពីប្រធានមន្ទីររៀបចំដែនដី នគរូបនីយកម្មសំណង់ និងសុរិយោដីខេត្តព្រះសីហនុ ទៅទទួលមុខតំណែងជាអនុប្រធាននាយកដ្ឋានបទប្បញ្ញតិ្តផែនការ និងទំនាក់ទំនងសហប្រតិបត្តិការ ការងារលំនៅឋានចំណុះអគ្គនាយកដ្ឋានលំនៅឋាននៃក្រសួង និងបានតែងតាំងលោក ចេង ស្រុង ពីមុនជាប្រធាននាយកដ្ឋានអធិការកិច្ចនៃក្រសួងរៀបចំដែនដី នគរូបនីយកម្មសំណង់ និងសុរិយោដីមកជាប្រធានមន្ទីររៀបចំដែនដី នគរូបនីយកម្មសំណង់និងសុរិយោដីខេត្តព្រះសីហនុវិញ ។ និងបានផ្ទេរភារកិច្ចតែងតាំងប្រធាន-អនុប្រធានការិយាល័យនៃមន្ទីរខាងលើសរុបចំនួន៦រូបផងដែរ គឺរះមួយខ្សែតែម្តង ។
នៅក្នុងពិធីខាងលើបានប្រព្រឹត្តទៅ ក្រោមអធិបតីភាពលោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្មសំណង់និងសុរិយោដី, លោកនាយឧត្តមសេនីយ៍ គន់ គីម អគ្គមេបញ្ជាការង និងជានាយសេនាធិការចម្រុះនៃកងយោធពលខេមរភូមិន្ទ, លោក យន្ត មីន អភិបាលខេត្តព្រះសីហនុ ដោយមានការចូលរួមពីសំណាក់លោក លោកស្រីជាអភិបាលរងខេត្ត អភិបាល អភិបាលរងក្រុង-ស្រុក ប្រធាន-អនុប្រធានមន្ទីរ អង្គភាពជុំវិញខេត្ត តំណាងកងកម្លាំងប្រដាប់អាវុធទាំងបីប្រភេទបានមកចូលរួមយ៉ាងកុះករ ។ នៅក្នុងរបាយការណ៍ស្វាគមន៍របស់លោក យន្ត មីន បានបញ្ជាក់ឲ្យដឹងពីការខិតខំប្រឹងប្រែងរបស់ថ្នាក់ដឹកនាំ និងមន្ត្រីនៃមន្ទីររៀបចំដែនដី នគរូបនីយកម្មសំណង់ និងសុរិយោដីខេត្តព្រះសីហនុ នាពេលកន្លងមកក្នុងការបម្រើសេវាសាធារណៈលើមុខជំនាញ ជូនប្រជាពលរដ្ឋទទួលលទ្ធផលបានល្អប្រសើរគួរជាទីមោទនៈ ។
លោកអភិបាលខេត្តក៏បានបញ្ជាក់បន្ថែមទៀតថា ទន្ទឹមនិងគុណសម្បត្តិខាងលើក៏នៅមានចំណុចខ្វះខាតខ្លះៗ ដូចជាការគ្រប់គ្រងអចលនវត្ថុរបស់រដ្ឋ ការទប់ស្កាត់ការទន្ទ្រានចូលកាន់កាប់អចលនវត្ថុរបស់រដ្ឋដោយខុសច្បាប់ មិនទាន់មានប្រសិទ្ធភាព ។ បន្ទាប់មកលោកទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគររូបនីយកម្មសំណង់ និងសុរិយោដី បានប្រគល់លិខិតសម្រេចតែងតាំង និងត្រាជូនដល់លោក ចេង ស្រុង ដែលទើបទទួលបានមុខតំណែងថ្មីជាប្រធានមន្ទីរខាងលើនេះ ។
លោកទេសរដ្ឋមន្ត្រី ជា សុផារ៉ា បានមានប្រសាសន៍ផ្តាំផ្ញើដល់អស់លោក ដែលទើបទទួលបានការផ្ទេរភារកិច្ច និងតែងតាំងចូលកាន់មុខតំណែងថ្មី នាពេលវេលាខាងលើបានគូសបញ្ជាក់ថា ជាករណីចាំបាច់និងសំខាន់ណាស់ ជាពិសេសលោកប្រធានមន្ទីរ និងប្រធានការិយាល័យ ត្រូវតែខិតខំបំពេញកាតព្វកិច្ចជំនាញរបស់ខ្លួនក្នុងការបម្រើសេវាសារធារណៈ ជូនដល់ប្រជាពលរដ្ឋឲ្យបានទាន់ពេលវេលា ចៀសវាងការបង្កកឯកសារពាក់ព័ន្ធដីធ្លីរបស់ប្រជាពលរដ្ឋដែលត្រូវឆ្លងកាត់បញ្ជាក់ពីជំនាញបច្ចេកទេស ។ ដែលជាការឆ្លើយតបទៅនឹងការផ្តល់ទំនុកចិត្តរបស់ក្រសួង និងប្រមុខរាជរដ្ឋាភិបាលបានប្រគល់ជូននាពេលនេះ ។
ជាចុងក្រោយលោកទេសរដ្ឋមន្ត្រីក៏បានសំណូមពរសុំឲ្យអស់លោក ដែលទើបទទួលបានតំណែង និងមុខងារថ្មី នាពេលនេះត្រូវបង្កើនការសាមគ្គីភាពនៅក្នុងមន្ទីរអង្គភាព របស់ខ្លួនក៏ដូចជាការរឹតចំណងសាមគ្គីភាពជាមួយបងប្អូនប្រជាពលរដ្ឋ ដោយមិនរើសអើងប្រកាន់ពណ៌សប្បុរ ពូជសាសន៍ និងនិន្នាការនយោបាយអ្វីឡើយ និងចៀសឲ្យឆ្ងាយពីការប្រព្រឹត្តអំពើរពុករលួយ ដែលអាចប្រឈមទៅនឹងផ្លូវច្បាប់ និងចងចាំនូវអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាពេលកន្លងមក (មន្ត្រីរាជការគ្រប់រូបត្រូវតែមុជទឹក ដុសក្អែល ឆ្លុះកញ្ចក់ និងព្យាបាល ។
ប្រជាពលរដ្ឋនិងមន្ត្រីរាជការនៅខេត្តព្រះសីហនុបានសម្តែងនូវការគាំទ្រចំពោះចំណាត់ការក្នុងកំណែទម្រង់សុីជម្រៅរបស់លោកទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្មសំណង់ និងសុរិយោដី ជា សុផារ៉ា ក្នុងការផ្លាស់ប្តូរផ្ទេរភារកិច្ចក្បាលម៉ាសុីនដឹកនាំនៃមន្ទីររៀបចំដែនដី នគរូបនីយកម្មសំណង់ និងសុរិយោដីខេត្តព្រះសីហនុ ក្នុងពេលវេលាខាងលើនេះ ។ ប្រភពខាងលើបានបន្តឲ្យដឹងទៀតថា លោកទេសរដ្ឋមន្ត្រីពិតជាមើលមិនរំលង ហើយបានធ្វើការវះកាត់ភាពមិនប្រក្រតី ដោយហេតុថា ថ្នាក់ដឹកនាំគ្រប់លំដាប់ថ្នាក់នៃមន្ទីរជំនាញខាងលើនាពេលកន្លងមកបានប្រើប្រាស់រូបភាពការងារទៅតាមបែប ការិយា ល័យបក្សពួកនិយម គ្រួសារនិយម មន្ត្រីបម្រើការងារមន្ទីរអង្គភាពខាងលើខ្លះបានក្លាយទៅជាអ្នករត់ការឯកសារពាក់ព័ន្ធទៅនឹងមន្ទីរជំនាញ ។ មួយវិញទៀតផលលំបាករបស់ប្រជាពលរដ្ឋ និងមន្ត្រីរាជការនៅខេត្តព្រះសីហនុ នៅពេលដែលត្រូវធ្វើប័ណ្ណសម្គាល់អចលនវត្ថុ ឬផ្ទេរប័ណ្ណអចលនវត្ថុត្រូវចំណាយប្រាក់រាប់ពាន់ដុល្លារ បើមិនដូច្នេះឯកសារដូចបានរៀបរាប់ខាងលើ និងត្រូវកប់ទុកមិនខ្ចីយកភ្នែកមើលពីមន្ត្រីជំនាញនៅក្នុងមន្ទីរអង្គភាពខាងលើនោះឡើយ ។
ប្រជាពលរដ្ឋបានសំណូមពរដល់លោកប្រធានមន្ទីរខាងលើ ដែលទើបទទួលបានតំណែងថ្មី នាពេលនេះមិនបើកបរលើវិថីចាស់ និងហ៊ានធ្វើការវះកាត់មន្ត្រីជើងដប់ដែលមកបំពេញការងារស្វែងរកតែលាភសក្ការផ្ទាល់ខ្លួនធ្វើឲ្យជះឥទ្ធិពលមិនល្អដល់មន្ទីរអង្គភាពនិងក្រសួងសាមុី ។ ផ្ទេរថ្មីប៉ុណ្ណឹងហើយ បើនៅតែស្ពឹកទៀតមិនដឹងត្រូវមានវាចា នឹងថ្លែងបែបណាទៀតឡើយ ៕
ចែករំលែកព័តមាននេះ