រាជធានីភ្នំពេញ ៖ ទោះបីជាតុលាការដំបូងរាជធានីភ្នំពេញបានចេញសាលដីកាស្ថាពរ រឹបអូសទីស្នាក់ការអតីតគណបក្សសង្គ្រោះជាតិ និងបង្គាប់ឲ្យសងជំងឺចិត្តយ៉ាងណាក្តី លោក សម រង្ស៊ីដែលនៅក្រៅប្រទេសបានប្រកាសមិនខ្វល់ពីករណីនេះឡើយ ។
លោក សម រង្ស៊ី បានសរសេលើបណ្តាញសង្គមហ្វេសប៊ុកលោកថា «សាលាដំបូងរាជធានីភ្នំពេញ ទើបតែបានបង្គាប់ឲ្យរឹបអូសទ្រព្យសម្បត្តិរបស់ខ្ញុំ ជាសំណងឲ្យទៅ លោក ហ៊ុន សែន និងលោក ហេង សំរិន ដែលជាមេដឹកនាំកំពូលរបស់គណបក្សប្រជាជនកម្ពុជា ។
ខ្ញុំមិនមានការភ្ញាក់ផ្អើលអ្វីទេ ចំពោះសេចក្តីសម្រេចបែបនេះរបស់តុលាការ ពីព្រោះនេះគ្រាន់តែជាផ្នែកមួយទៀត នៃសំណុំរឿងនយោបាយ ដែលគេបានកសាងដើម្បីធ្វើទុក្ខបុកម្នេញរូបខ្ញុំ ដែលបានចេញមុខខ្លាំងជាងគេ ប្រឆាំងអំណាចផ្តាច់ការ និងពុករលួយសព្វថ្ងៃ ប្រមាណ២៥ឆ្នាំមកហើយ» ។
លោកក៏បានគូសបញ្ជាក់ថា ៖ «ខ្ញុំក៏មិនមានការតក់ស្លុតអ្វីឡើយក្នុងរឿងនេះ ពីព្រោះខ្ញំុមិនដែលមានចិត្តសម្ភារនិយម ហើយទ្រព្យសម្បត្តិ លុយកាក់ និងបុណ្យសក្តិ មិនមែនជាអ្វីដែលខ្ញុំស្វែងរកទេ ក្នុងការតស៊ូរបស់ខ្ញុំ រយៈពេល២៥ឆ្នាំកន្លងមកនេះ ។ ពេលដែលខ្ញុំសម្រេចវិលត្រលប់ពីប្រទេសបារាំងមករស់នៅប្រទេសកម្ពុជាវិញ នៅឆ្នាំ១៩៩២ ខ្ញុំបានសម្រេចចិត្តរួចទៅហើយ តាំងពីពេលនោះមកថា ខ្ញុំមកតស៊ូដើម្បីស្រោចស្រង់មាតុភូមិរបស់ខ្ញុំ ដោយគ្មានបំណងចង់បានអ្វីពីប្រទេសកម្ពុជា សម្រាប់ខ្លួនខ្ញុំឡើយ ។ តែអ្វីៗដែលខ្ញុំមានទាំងអស់ តាំងពីយូរយារមកហើយ គឺខ្ញុំរីករាយយកមកផ្តល់ជូនមាតុភូមិរបស់ខ្ញុំ» ។
លោកក៏បានលើកឡើងទៀតថា កាលពីលោកធ្វើជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងឆ្នាំ ១៩៩៣-១៩៩៤ លោកមិនបានទាមទារចង់បានអ្វីសម្រាប់ខ្លួនខ្ញុំ ឬគ្រួសារខ្ញុំឡើយ ។ សូម្បីតែផ្ទះសម្បែង ដែលឪពុកម្តាយខ្ញុំបានកសាងនៅប្រទេសកម្ពុជាមុនឆ្នាំ១៩៧៥ ក៏លោកមិនដែលអើពើឡើយ ។
លោកសង្កត់ធ្ងន់ថា «ផ្ទះសម្បែងរបស់ខ្ញុំសព្វថ្ងៃ នៅទីក្រុងភ្នំពេញ ដែលជាទីស្នាក់ការរបស់គណបក្សសង្គ្រោះជាតិផងដែរ គឺបានមកពីញើសឈាមរបស់ខ្ញុំ និងញើសឈាមអ្នកគាំទ្រគណបក្សសង្គ្រោះជាតិ (មុននោះទៀត គឺគណបក្ស សម រង្ស៊ី) ។ ខ្ញុំមិនដែលពាក់ព័ន្ធក្នុងអំពើពុករលួយ គឺទង្វើលួចជាតិ ប្លន់ជាតិ និងបំផ្លាញជាតិ ឬក៏ទង្វើធ្វើបាប ជំរិត ឬកេងប្រវ័ញ្ចប្រជារាស្ត្រម្ដងណាឡើយ» ។
សូមរំឭកថា កាលពីថ្ងៃទី២៧ ខែកុម្ភៈ តុលាការដំបូងរាជធានីភ្នំពេញបានសម្រេចចេញដីការឹបអូសទីស្នាក់ការរបស់អតីតគណបក្សសង្គ្រោះជាតិ (CNRP) ដែលមានដី និងអគារ ស្ថិតក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ និងជាកម្មសិទ្ធិរបស់ លោក សម រង្ស៊ី ជាបណ្ដោះអាសន្ន ដើម្បីយកទៅសងបំណុលជំងឺចិត្តដល់ម្ចាស់បំណុលក្នុងសំណុំរឿងប្តឹងដោយ សម្តេចតេជោ ហ៊ុន សែន និង សម្តេចចក្រី ហេង សំរិន ។
ការសម្រេចរឹបអូសទ្រព្យសម្បត្តិរបស់កូនបំណុល សម រង្ស៊ី នេះ ធ្វើឡើងតាមសំណើសុំដីកាការពារ ចុះថ្ងៃទី២៣ ខែកុម្ភៈ ឆ្នាំ២០១៨ របស់លោក គី តិច មេធាវីតំណាងដោយអាណត្តិរបស់ម្ចាស់បំណុល ។ ដោយសំអាងលើពាក្យសុំដីកាការពាររបស់តំណាងម្ចាស់បំណុល លើសំណុំរឿងប្ដឹងដោយ សម្ដេចតេជោ ហ៊ុន សែន នាយករដ្ឋមន្ត្រី និង សម្ដេចចក្រី ហេង សំរិន ប្រធានរដ្ឋសភាកម្ពុជា សរុបចំនួន៨ចំណុច លោក រស់ ពិសិដ្ឋ ចៅក្រមសាលាដំបូងរាជធានីភ្នំពេញ បានសម្រេចចេញដីការឹបអូសបណ្ដោះអាសន្ន ចុះថ្ងៃទី២៦ ខែកុម្ភៈ ឆ្នាំ២០១៨ រឹបអូសដី និងអគារ ដែលមានប័ណ្ណកម្មសិទ្ធិកាន់កាប់ដោយ លោក សម រង្ស៊ី ។
យោងខ្លឹមសារដីកាសម្រេច លោក រស់ ពិសិដ្ឋ បានសម្រេចឲ្យរឹបអូស ៖ ១.រឹបអូសបណ្ដោះអាសន្ននូវទ្រព្យសម្បត្តិរបស់កូនបំណុលឈ្មោះ សម រង្ស៊ី ជាចលនវត្ថុ (ដី និងអគារ) ដែលមានប័ណ្ណសម្គាល់សិទ្ធិកាន់កាប់ចលនវត្ថុលេខ ភព ០៩៧២៥ ចុះថ្ងៃទិ១៥ ខែសីហា ឆ្នាំ២០០៧ មានទីតាំងស្ថិតនៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ រង់ចាំតុលាការសម្រេចដល់សំណុំរឿងអង្គសេចក្ដីចប់ជាស្ថាពរ ។
២.ដើម្បីទទួលបាននូវការលុបចោលការអនុវត្តន៍ការរឹបអូសជាបណ្ដោះអាសន្ននេះ កូនបំណុលឈ្មោះ សម រង្ស៊ី ត្រូវផ្ញើប្រាក់តម្កល់នៅសាលាដំបូងរាជធានីភ្នំពេញចំនួន៤,២៥០,០០០,០០០ (បួនពាន់ពីររយហាសិបលាន) រៀល ជាប្រាក់រំដោះ ។
និង៣.ប្រាក់ប្រដាប់ក្ដីជាបន្ទុករបស់កូនបំណុល ។ គួរជម្រាបថា បច្ចុប្បន្ន លោក សម រង្ស៊ី អតីតប្រធាន CNRP កំពុងមានបណ្ដឹងនៅក្នុងដៃតុលាការកម្ពុជាជាច្រើន ក្នុងនោះមានបណ្ដឹងចំនួនពីរពាក់ព័ន្ធជាមួយ សម្ដេចតេជោ ហ៊ុន សែន និងសម្ដេចចក្រី ហេង សំរិន ។ លើសំណុំរឿងទាំងពីរនេះ តុលាការបានសម្រេចឲ្យ លោក សម រង្ស៊ី សងជំងឺចិត្តដល់ សម្ដេចតេជោ ហ៊ុន សែន ចំនួន ៤,០០០,០០០,០០០ (បួនពាន់លាន) រៀល ស្មើនឹង១លានដុល្លារ និងសម្ដេចចក្រី ហេង សំរិន ចំនួន ២៥០,០០០,០០០ (ពីររយហាសិបលាន) រៀល សរុបទាំងអស់ ចំនួន ៤,២៥០,០០០,០០០ (បួនពាន់ពីររយហាសិបលាន) រៀល ៕
ចែករំលែកព័តមាននេះ