ខេត្តសៀមរាប ៖ ប្រជាពលរដ្ឋទៅឃ្វាលគោ ប្រទះឃើញបុរសម្នាក់ចងកសម្លាប់ខ្លួនទៅនឹងអាវយឺតដៃវែង ជាប់ទៅលើដើមកកោះនៅកណ្តាលវាលស្រែខាងលិចភូមិតាទ ចម្ងាយ៨គីឡូម៉ែត្រ ខាងលិចភូមិតាទ ឃុំគោកធ្លកក្រោម ស្រុកជីក្រែង ខេត្តសៀមរាប កាលពីវេលាម៉ោង១០ និង៤៥នាទី ថ្ងៃសុក្រ ១រោច ខែផល្គុន ឆ្នាំរកា នព្វស័ក ព.ស២៥៦១ ត្រូវថ្ងៃទី០២ ខែមីនា ឆ្នាំ២០១៨ រួចមករាយការណ៍ដល់ កម្លាំងសមត្ថកិច្ចនគរបាលមូលដ្ឋាន បង្កឱ្យមានការភ្ញាក់ផ្អើលពេញភូមិ។
លោកវរសេនីយ៍ឯក សុខ សុទ្ធាវុធ អធិការនគរបាលស្រុកជីក្រែង បានប្រាប់នៅរសៀលថ្ងៃទី២ ខែមីនា ឆ្នាំ២០១៨នេះថា ក្រោយពីទទួលបានព័ត៌មាននេះភ្លាម លោកបានបញ្ជាកម្លាំងនគរបាលជំនាញ ស្រុក ចុះទៅពិនិត្យ និងធ្វើការស្រាវជ្រាវបានឱ្យដឹងថា សាកសពជនរងគ្រោះមាន ឈ្មោះ ឈឿង ម៉ៅ ភេទប្រុស អាយុ៣៩ឆ្នាំ នៅភូមិតាទ ឃុំគោកធ្លកក្រោម ស្រុកជីក្រែងខេត្តសៀមរាប។
លោកបានបញ្ជាក់បន្ថែមទៀតថា តាមការសាកសួរ និងការបំភ្លឺពីក្រុមគ្រួសារសពបានឱ្យដឹថា៖ កាលពីថ្ងៃទី០១ ខែមីនា ឆ្នាំ២០១៨ វេលាម៉ោង៥និង៣០នាទីល្ងាច ប្រពន្ធគាត់បានឌុបម៉ូតូប្តីទៅស្រោចទឹក នៅភូមិដូនរាជ ដល់ពាក់កណ្តាលផ្លូវប្តីគាត់លោតចុះពីលើម៉ូតូរត់កាត់វាលស្រែពេលនោះប្រពន្ធ និងប្រជាពលរដ្ឋ បានជួយតាមរកតែរកមិនឃើញលុះព្រឹកម៉ោង៨ និង៣០នាទី ទើបប្រទះឃើញសាកសពចងកនៅលើ ដើមកកោះ នៅទីវាលស្រែខាងលិចភូមិតាទចម្ងាយ៨គីឡូម៉ែត្រ ការចងកនោះ គឺចងក ទៅនឹងអាវយឺតដៃវែង។
ហើយក្រុមគ្រួសារបានបំភ្លឺបន្ថែមទៀតថា រូបគាត់មានជំងឺសរសៃប្រសាទ សភាពវិកលចរឹតដោយសាគាត់បរិភោគស្រាសជាប្រចាំ តាមការពិនិត្យរបស់នគរបាលជំនាញ ឃើញថា គ្មានការពាក់ព័ន្ធទៅនឹងបទល្មើសព្រហ្មទណ្ឌឡើយ។ បច្ចុប្បន្ន សពជនរងគ្រោះ ត្រូវបានសមត្ថកិច្ច ជំនាញ ប្រគល់ឲ្យក្រុមគ្រួសារយកទៅធ្វើបុណ្យទៅតាមប្រពៃណីនៅភូមិឃុំខាងលើ៕
ចែករំលែកព័តមាននេះ