រាជធានីភ្នំពេញ ៖ នៅល្ងាចថ្ងៃសៅរ៍ ទី៣ ខែមីនា ស្អែកនេះ ការប្រកួតប្រដាល់អន្តរជាតិនៅលើសង្វៀនទូរទស្សន៍ប៉ុស្ដិ៍លេខ៥ ព្រែកកំពិស ម្ដុំព្រែកហូរជាយរាជធានីភ្នំពេញនឹងកាន់តែមានការចាប់អារម្មណ៍ថែមទៀតហើយបន្ទាប់ពីសង្វៀនមួយនេះបានប្រកាសឱ្យដឹងពីសមាសភាពកីឡាករកម្ពុជា និងថៃ២រូប អមដោយសមាសភាពកីឡាករកម្ពុជា៤រូប
ដែលមានឈ្មោះប្រកួតគ្នាចាញ់ធ្លាក់ៗឆ្ពោះទៅដណ្ដើមជើងឯក ។
កីឡាករកម្ពុជា គឺថុល មករា បានក្លាយជាសមាសភាពរបស់កម្ពុជាតែមួយរូបគត់ ស្វាគមន៍ការប្រកួតអន្តរជាតិជាមួយកីឡាករថៃហ្វានិមិតនៅសប្ដាហ៍នេះ ខណៈដែលការប្រកួតទាំងមូលក៏មានការប្រកួតជម្រុះជើងឯកវគ្គថ្មីរវាងកីឡាករខ្លាំងៗ៤រូប សម្រាប់ការជម្រុះរដូវកាលទី២ក្នុងសប្ដាហ៍ទី៦ផងដែរ ដើម្បីបន្តស្វែងរកជើងខ្លាំងឱ្យគ្រប់១៦នាក់ ក្នុងចំណោម៣២នាក់ ដើម្បីបញ្ចប់ការប្រកួតជុំទី១។
ការប្រកួតដែលនឹងចាប់ផ្ដើមឡើងពីម៉ោង៥ល្ងាចនៅព្រែកកំពិសនេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលល្ងាចថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនិយមមកទស្សនាកកកុញ ស្របគ្នាដែលនៅតំបន់ប៉ុស្ដិ៍លេខ៥ក៏មានកំណើនអ្នករស់នៅច្រើនឡើង ក្រោយមានវត្តមានសំណង់បុរីព្រោងព្រាតប្រដេញគ្នា។
កីឡាករកម្ពុជា និងថៃ២រូប គឺថុល មករា និងជើងខ្លាំងមកពីប្រទេសថៃឈ្មោះ ហ្វានិមិត នឹងក្លាយជាគូប្រកួតស៊ីសាច់ហុតឈាមជាមួយគ្នានៅក្នុងថ្ងៃនោះ ។ អ្នករៀបចំការប្រកួតបានអះអាងថា នៅក្នុងថ្ងៃនោះកីឡាករកម្ពុជាចំនួន៤រូបក៏ត្រូវប៉ះគ្នាក្នុងលក្ខណៈជម្រុះចាញ់ធ្លាក់ៗ ដើម្បីបន្តការជម្រុះសម្រាប់សប្ដាហ៍ទី៦ផងដែរ ទើបមានអ្នកទស្សនាភាគច្រើនយល់ថា វត្តមានរបស់កីឡាករកម្ពុជា និងថៃ មិនថាការប្រកួតជាលក្ខណៈអន្តរជាតិ ឬការប្រកួតជាលក្ខណៈជម្រុះយកអ្នកខ្លាំងទៅប្រកួតយកជើងឯកទេ ពិតជាធ្វើឱ្យអ្នកស្នេហាវិស័យប្រដាល់ចាប់អារម្មណ៍។
លោកអះអាងថា បើទោះជាការប្រកួតជ្រើសរើសជើងឯកមានការចាប់អារម្មណ៍រួចជាស្រេច ក៏ប៉ុស្តិ៍លេខ៥នៅតែបញ្ចូលការប្រកួតជាលក្ខណៈអន្តរជាតិមួយគូៗនៅក្នុងការប្រកួតនោះ ដើម្បីឱ្យរឹតតែទាក់ទាញ ។ វត្តមានរបស់សមាសភាពគូអន្តរជាតិ ក៏ត្រូវបានសម្រាំងយ៉ាងពិសេសផងដែរ ដើម្បីឱ្យអ្នកទស្សនាកាន់តែកន្ត្រាក់អារម្មណ៍ នៅពេលកីឡាករប្រកួតគ្នា។
លោក សេង កដិកា ដែលជាអ្នករៀបចំកម្មវិធីប្រកួតប្រចាំសង្វៀននេះបញ្ជាក់ថា សមាសភាពខាងកម្ពុជាសម្រាប់ការប្រកួតជាមួយថៃ លោកជឿជាក់ខ្លាំងលើកីឡាករ ថុល មករា ដោយសារតែកីឡាកររូបនេះធ្លាប់បានឡើងប្រកួតនៅលើសង្វៀនអន្តរជាតិរបស់ប៉ុស្តិ៍លេខ៥ច្រើនលើកមកហើយ តែងតែធ្វើឱ្យរញ្ជួយ និងទាក់ទាញដល់អ្នកទស្សនា ។
លោកប្រកាសថា វត្តមានចុះមករបស់កីឡាករថៃ ហ្វានិមិត មានតែថុល មករា ម្នាក់ប៉ុណ្ណោះ ដែលលោកសម្លឹងឃើញថាមានបទពិសោធន៍ និងមានសមត្ថភាពគ្រប់គ្រាន់អាចឱ្យប្រកួតជាមួយបាន ។ លោកក៏បានកំណត់ឱ្យកីឡាករកម្ពុជារូបនេះ ហ្វឹកហាត់ជាប់លាប់មិនតិចជាង១សប្ដាហ៍ផងដែរមុនពេលផ្គូផ្គង ទើបលោកយល់ថាសមាសភាពរបស់កីឡាករកម្ពុជាមួយនេះគ្រប់គ្រាន់សម្រាប់ឱ្យប៉ុស្តិ៍លេខ៥ដាក់ប្រកួតជាលក្ខណៈអន្តរជាតិ នៅថ្ងៃសៅរ៍នេះបាន។
លោកថា កីឡាករកម្ពុជា និងថៃ សុទ្ធតែត្រូវបានអះអាងថា មានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា ។ មួយគូនេះ មានការចាប់អារម្មណ៍ភាគច្រើនថានឹងមានអ្នកស្នេហាវិស័យប្រដាល់ជក់ចិត្ត ដោយសារជាបទពិសោធន៍ កីឡាករ ថុល មករា មិនសូវមានទម្លាប់ឡើងវ៉ៃលាក់ដៃស្រាប់ទៅហើយ ។
លោក សេង កដិកា បន្តថា ជំនួបអន្តរជាតិដែលបានធ្វើឡើងនៅប៉ុស្តិ៍លេខ៥ មិនមែនសុទ្ធតែរន្ថើនព្រឹត្តិការណ៍ជើងឯកឱ្យអ្នកទស្សនាកាន់តែមានអារម្មណ៍កញ្ជ្រោលនោះទេ ប៉ុន្តែសម្រាប់ជំនួបរវាង ថុល មករា និងកីឡាករថៃ ហ្វានិមិត គឺលោកជឿជាក់ ដោយសារកីឡាករថៃលោកស្គាល់ថ្វីដៃច្បាស់ ហើយ កីឡាករកម្ពុជាក៏ល្អស្ថិតក្នុងទំនុកចិត្តលោក តាំងពីមុនផ្គូផ្គង ។ បើទោះជាកីឡាករកម្ពុជាត្រូវប្រឈមនឹងកីឡាករថៃជាគូប្រកួតដែលជាកីឡាករល្អ ក៏លោកនៅតែប្រកាសថា ថុល មករា មានសមត្ថភាពគ្រប់គ្រាន់ក្នុងការតតាំង និងមានសង្ឃឹមឈ្នះច្រើន បើប្រៀបនឹងកីឡាករកម្ពុជាផ្សេងទៀត ។
ជំនួបរវាងពួកគេ លោកនៅតែថាមិនមែនជារឿងចៃដន្យ និងមិនមែនជារឿងធម្មតា ដោយសារមានការព្រាងទុកពីសំណាក់រូបលោកដែលជាអ្នកផ្គូផ្គងនៅប៉ុស្តិ៍លេខ៥ និងការរៀបចំទុកពីសំណាក់អ្នកដឹកនាំកីឡាករថៃមកតែម្ដង ។ លោកថា មួយគូនេះ អ្នកណាឈ្នះក្រៅពីទទួលបានទឹកប្រាក់ច្រើនជាង ក៏ទទួលបានទំនុកចិត្តពីអ្នកគាំទ្រកាន់តែខ្លាំងផងដែរ។ ផ្ទុយទៅវិញ បើចាញ់ការប្រកួតហើយជាកីឡាករកម្ពុជាទៅទៀត គឺមិនត្រឹមតែអាម៉ាស់ប៉ុណ្ណោះទេ ក៏នឹងមានការរិះគន់ធ្ងន់ធ្ងរនៅក្នុងស្រទាប់អ្នកចូលចិត្តកីឡាដូចជាថាប្រកួតលែងកើត ឬធ្លាក់ដៃជាដើម ។
យ៉ាងណាមិញ លោកថា កីឡាករកម្ពុជា ដ្បិតថារូបលោក និងអ្នកគាំទ្រទុកចិត្តពីសមត្ថភាពយ៉ាងហ្នឹង តែបើគេប្រកួតមិនល្អ ឬមិនអស់ពីសមត្ថភាព ក៏ពិតជារងការរិះគន់មិនតិចដែរ ។ លោកថា ជំនួបរបស់ពួកគេត្រូវបានដាក់យ៉ាងពិសេសសម្រាប់ថ្ងៃសៅរ៍សប្ដាហ៍នេះ តែក៏ទាមទារឱ្យប្រឹងប្រែងណាស់ដែរ គឺមិនអាចសំអាងត្រឹមថាជាកីឡាករល្បីស្រាប់ មានការគាំទ្រស្រាប់ ហើយក៏ខ្វះការប្រឹងប្រឹងនោះទេ ។ លោកនៅតែចាត់ទុកថា ថុល មករា នៅល្អ និងមានការគាំទ្រនៅលើសង្វៀនប្រដាល់អន្តរជាតិ ទើបលោកជឿលើសមត្ថភាពខាងពូកែគេច និងពូកែវាយសន្ធាប់របស់គេហើយឈានដល់ការផ្គូផ្គងឱ្យប៉ះ ហ្វានិមិត ក្នុងសប្ដាហ៍នេះ។
សម្រាប់ការប្រកួត៤នាក់ជាលក្ខណៈមិត្តភាពដែលជាការជម្រុះជើងឯកវគ្គថ្មីនៅសប្ដាហ៍ទី៦នេះវិញ លោកថានឹងមានវត្តមានសុទ្ធសឹងតែជាកីឡាករល្អៗនៅក្នុងពិភពប្រដាល់តែម្ដងប៉ះគ្នា ដោយសារក្នុងចំណោមសមាសភាពថ្មីទាំង៣២រូប គឺលោកបានដាក់ចម្រុះកីឡាករជើងចាស់ និងកីឡាករល្អៗ ដែលធានាថានឹងទាក់ទាញមិនចាញ់ការប្រកួតអន្តរជាតិដែលបានសម្រិតសម្រាំងឡើយ ។ លោក សេង កដិកាបញ្ជាក់ថា ការប្រកួតលើកនេះ ក៏មិនខុសពីរូបមន្តដែលធ្លាប់បានធ្វើនោះទេ គឺអ្នកឈ្នះបានឡើងវគ្គបន្ត ហើយសម្រាប់អ្នកចាញ់គឺធ្លាក់ហាលអាវ ។
លោកអះអាងថា ការប្រកួតរបស់លោក គឺមិនមានអ្នកឈ្នះក្នុងវគ្គណាមួយមិនឈ្នះដោយការប្រឹងប្រែងនោះទេ ដោយលោកបញ្ជាក់ថា អ្នកបានឡើងអង្គុយកៅអី៤នាក់បើកឆាកក្នុងវគ្គ១៦នាក់កាលពី៥សប្ដាហ៍កន្លងទៅ បានឡើងទាំងវេទនានោះផង ។
លោកថា ការប្រកួតចាញ់ធ្លាក់ៗ សុទ្ធតែទាមទារឱ្យកីឡាករម្នាក់ៗត្រៀមខ្លួនខុសពីការប្រកួតតាមរបៀបសន្សំពិន្ទុ ដោយសារតែអ្នកមិនខំប្រឹងប្រែង គឺដឹងតែធ្លាក់ហើយបាត់ឱកាស ដែលតម្រូវឱ្យអ្នកមានមុខឡើងប្រកួតត្រូវតែប្រកួតប្ដូរមិនខ្វល់ពីគ្រោះថ្នាក់ និងលាក់ថ្វីដៃ ពោលគឺធ្វើយ៉ាងម៉េចឱ្យតែឈ្នះ៕
ចែករំលែកព័តមាននេះ