ខេត្តក្រចេះ ៖ បុរសម្នាក់បានពុលត្រីក្រពតប្រកាច់បែកពពុះមាត់ស្លាប់ ចំណែកប្រពន្ធនិងកូនព្រមទាំងអ្នកភូមិផ្សេងទៀត ក៏មានអាការដូចគ្នា និងកំពុងជួយសង្គ្រោះ ។ ការពុលត្រីក្រពតរហូតបង្កឲ្យមានមនុស្សស្លាប់នេះបានកើតឡើងដល់អ្នកភូមិប្រម៉ា ឃុំកំពង់ដំរី ស្រុកឆ្លូង…
ខេត្តក្រចេះ ៖ បុរសម្នាក់បានពុលត្រីក្រពតប្រកាច់បែកពពុះមាត់ស្លាប់ ចំណែកប្រពន្ធនិងកូនព្រមទាំងអ្នកភូមិផ្សេងទៀត ក៏មានអាការដូចគ្នា និងកំពុងជួយសង្គ្រោះ ។ ការពុលត្រីក្រពតរហូតបង្កឲ្យមានមនុស្សស្លាប់នេះបានកើតឡើងដល់អ្នកភូមិប្រម៉ា ឃុំកំពង់ដំរី ស្រុកឆ្លូង កាលពីរសៀលថ្ងៃទី២៧ កុម្ភៈ និងបានបង្កឲ្យមានការភ្ញាក់ផ្អើល នៅពេលដែលសពរបស់បុរសរងគ្រោះត្រូវបានបញ្ជូនពីមន្ទីរពេទ្យស្រុកមេមត់ មកដល់លំនៅឋានវិញ ។ នេះមិនមែនជាលើកដំបូងទេ ដែលមានអ្នកពុលត្រីក្រពតស្លាប់ និងរបួសបែបនេះ ។
បុរសរងគ្រោះឈ្មោះ ខាត់ ខាន់ អាយុ៥៧ឆ្នាំ បានប្រកាច់បែកពពុះមាត់ស្លាប់ដោយសារគាត់ពិសាត្រីក្រពតច្រើនជាងគេ ។ ចំណែកឯស្ត្រីជាប្រពន្ធអាយុ៥៧ឆ្នាំ និងកូនស្រីអាយុ១៨ឆ្នាំ ក៏ដូចជាអ្នកភូមិមួយចំនួនទៀត បានកើតអាការពុលដូចគ្នាដែរ តែមិនប៉ះពាល់ដល់អាយុជីវិតទេ និងកំពុងជួយសង្គ្រោះនៅមន្ទីរពេទ្យស្រុកមេមត់ ។
បើតាមការឲ្យដឹងពីលោក ឆុង តូរ៉ាន់ អធិការនគរបាលស្រុកឆ្លូងបានប្រាប់ថា ការពុលរបស់អ្នកភូមិនេះគឺផ្តើមចេញពីការបរិភោគត្រីក្រពត ។ ត្រីក្រពតដែលពួកគាត់យកមកចែកគ្នាអាំងហូបនេះ គឺបានមកពីការនេសាទនៅព្រែកខាងក្រោយភូមិ ។ ចំណែកឯបុរសរងគ្រោះបានពុលរហូតដល់ស្លាប់ក៏ដោយសារតែគាត់បានហូបត្រីក្រពតដែលពុលនោះច្រើន ។ លោកអធិការបញ្ជាក់ទៀតថា នគរបាលបានចុះទៅធ្វើការពិសោធ និងបានយកសាច់ត្រីក្រពតនៅសេសសល់ ដែលសង្ស័យថាពុលនោះទៅដាក់ឲ្យមាន់និងឆ្កែស៊ី បន្ទាប់ពីស៊ីរួចក៏ប្រកាច់ងាប់ភ្លាមៗ ។
មានការកត់សម្គាល់ថា ជារៀងរាល់ឆ្នាំករណីពុលត្រីក្រពតបណ្តាលឲ្យមានមនុស្សស្លាប់និងរងគ្រោះ គឺតែងតែកើតមានជាបន្តបន្ទាប់ និងគួរឲ្យព្រួយបារម្ភទៅលើការយល់ដឹងរបស់ប្រជានេសាទនៅតាមតំបន់ជនបទនានាក្នុងខេត្ត។ តាមពិតទៅការពុលបែបនេះក៏ដោយសារតែពួកគាត់មិនបានយល់ដឹងច្បាស់លើប្រភេទត្រីក្រពតថា ត្រីប្រភេទណាដែលពុល ឬមិនពុលមុននឹងយកមកទទួលទាន ។
ជុំវិញការបរិភោគត្រីក្រពតបណ្តាលឲ្យពុលរហូតមានអ្នកស្លាប់ និងអ្នករងគ្រោះច្រើន បែបនេះ មន្ត្រីជំនាញជលផលខេត្តបានប្រាប់ថា ត្រីក្រពតដែលជនរងគ្រោះយកមកអាំងហូបនោះជាអម្បូរត្រីក្រពតស្ថិតក្នុងប្រភេទត្រីពុលទាំង៥ប្រភេទ ។ ក្រុមមន្ត្រីជំនាញខណ្ឌ រដ្ឋបាលជលផលក៏ធ្លាប់បានអះអាងថា កន្លងមកមន្ត្រីនៃមន្ទីរជំនាញធ្លាប់បានចុះទៅធ្វើការ ផ្សព្វផ្សាយជូនដំណឹងដល់ពលរដ្ឋនៅតាមតំបន់នានា ពិសេសនៅតំបន់នេសាទក្នុងខែទឹកដំឡើងឲ្យពួកគាត់ស្គាល់ងអម្បូរពពួកត្រីពុលដើម្បីមានការប្រុងប្រយ័ត្នមុននឹងយកមកទទួលទាន ៕
ចែករំលែកព័តមាននេះ