រាជធានីភ្នំពេញ ៖ អ្នកប្រដាល់ខ្មែរ២រូប និងថៃ២រូបនឹងត្រូវប្រជែងគ្នាដណ្ដើមតំណែង
ជាម្ចាស់ជើងឯកប្រាក់លានប្រដាល់ម៉ារ៉ាតុងក្នុងប្រភេទទម្ងន់៦៩គីឡូក្រាមនៅលើសង្វៀនទូរទស្សន៍ CNC នាយប់ថ្ងៃទី៣ ខែមីនា សប្ដាហ៍នេះ ។ ការប្រកួតដែលមាន២គូនេះអ្នកឈ្នះក្នុងការប្រកួតជុំទី១ដែលមានតែ៣ទឹកនោះនឹងត្រូវជួបគ្នារវាងអ្នកឈ្នះនិងអ្នកឈ្នះដូចគ្នានៅជុំផ្ដាច់ព្រ័ត្រដែលការប្រកួតនេះមាន៥ទឹកក្នុងមួយទឹកមាន២នាទីសម្រាក៣នាទី ។
ចំណែកអ្នកឈ្នះនៅវគ្គនេះនឹងទទួលបានប្រាក់រង្វាន់៤លានរៀល រីឯអ្នកចាញ់ទទួលបាន២លានរៀល ។ ចំពោះកីឡាករដែលជាសមាសភាពត្រូវប្រកួតនៅក្នុងសប្ដាហ៍នេះមាន រឿង សោភ័ណ្ឌ មកពីក្លិបមកុដរាជសីហ៍ត្រូវជួបប្រកួតជាមួយអ្នកប្រដាល់ជើងខ្លាំងថៃឈ្មោះម៉ាណាវថង ណេតណាំឆ័យ ។
រឿង សោភ័ណ្ឌ មានប្រវត្តិប្រកួត១៤៤ដង ឈ្នះ១២៦ដង ចាញ់១៦ដង ស្មើពិន្ទុ២ដង និងវាយគូប្រកួតឲ្យសន្លប់៣៧ដង។ ចំពោះម៉ាណាវថង ណេតណាំឆ័យ វិញមានប្រវត្តិប្រកួត៩៧ដង ឈ្នះ៧៩ដង ចាញ់១៣ដង ស្មើពិន្ទុ៥ដង និងវាយគូប្រកួតឲ្យសន្លប់២១ដង ។ ចាំមើលអ្នកប្រដាល់ទាំង២រូបនេះនរណាជាអ្នកខ្ទាតចេញនៅជុំទី១?
មួយគូទៀតគឺ ឡុង សុវណ្ណឌឿន មកពីក្លិបសាលវ័ន្តកីឡា ត្រូវជួបជាមួយអ្នកប្រដាល់
ជើងខ្លាំងថៃឈ្មោះសុផាក់ឆ័យ ប្រានយីស៊ីបហុក ។ ឡុង សុវណ្ណឌឿន មានប្រវត្តិប្រកួត១៣៦ដង ឈ្នះ១១០ដង ចាញ់១៨ដង ស្មើពិន្ទុ៨ដង និងវាយគូប្រកួតឲ្យសន្លប់៤០ដង ។ ចំពោះ សុផាក់ឆ័យ ប្រានយីស៊ីបហុក វិញមានប្រវត្តិប្រកួត១១២ដង ឈ្នះ៨១ដង ចាញ់២៥ដង ស្មើពិន្ទុ៦ដង និងវាយគូប្រកួតឲ្យសន្លប់១០ដង ។ រវាងអ្នកប្រដាល់ទាំង២រូបនេះមិនដឹងថានរណាអាចឆ្លងផុតជុំទី១នោះឡើយដោយសារពួកគេសុទ្ធតែជាជើងខ្លាំងដូចគ្នានៅក្នុងពិភពប្រដាល់ ។
ចាំមើលមើល៍ ម្ចាស់ជើងឯកប្រាក់លានប្រដាល់ម៉ារ៉ាតុងសប្ដាហ៍នេះបានទៅលើកីឡាករខ្មែរឬកីឡាករថៃ ៕
ចែករំលែកព័តមាននេះ