តាមប្រភពព័ត៌មាន ESPN បានឲ្យដឹងថា ជើងខ្លាំង PSG ត្រូវបានគេដឹកទៅប្រទេសដើមកំណើតដើម្បីធ្វើការវះកាត់ស្នាមបាក់នៅឆ្អឹងបាតជើងដែលទាមទាររយៈពេលប្រហែល៣ខែទើបអាចចូលលេងវិញបាន ។ នេះជាការលើកឡើងរបស់វេជ្ជបណ្ឌិតក្រុមជម្រើសជាតិប្រេស៊ីល ។
កាលពីថ្ងៃពុធ PSG បានប្រកាសជាផ្លូវការថា Neymar នឹងត្រូវទៅទទួលការវះកាត់នៅប្រេស៊ីលក្នុងសប្តាហ៍នេះបន្ទាប់ពីរងរបួសថ្លោះកជើង និងបាក់ឆ្អឹងបាតជើងខាងស្តាំក្នុងការប្រកួតជាមួយនឹង Marseille កាលពីថ្ងៃអាទិត្យ ។
ការវះកាត់នឹងត្រូវធ្វើឡើងនៅពេលព្រឹកថ្ងៃសៅរ៍ចុងសប្តាហ៍នេះនៅមន្ទីរពេទ្យ Mater Dei នៅក្នុងទីក្រុង Belo Horizonte ប្រទេសប្រេស៊ីល ។ លោកវេជ្ជបណ្ឌិត Rodrigo Lasmar បានថ្លែងកាលពីថ្ងៃព្រហស្បត្តិ៍ថា Neymar មិនអាចចូលប្រកួតបានទេរហូតទាល់តែដល់ដើមខែមិថុនា ដែលនៅមុនពេលប្រកួត World Cup ២សប្តាហ៍ ។
គួរបញ្ជាក់ផងដែរថា ស្នាមបាក់ឆ្អឹងរបស់ Neymar ដំបូងឡើយស្មានតែតូចហើយស្រាលធម្មតាទេ ។ តែវាមិនដូចជាការគិតឡើយ ។ គ្រូពេទ្យប្រាប់ថា វាអាចនឹងរីកធំហើយបាក់កាន់តែធ្ងន់ជាងនេះប្រសិនបើមិនធ្វើការវះកាត់ ។ ដូចនេះការវះកាត់គឺជាជម្រើសតែមួយគត់សម្រាប់ Neymar ទោះបីជាវាធ្វើឲ្យគេមិនអាចចូលប្រកួតជាច្រើនខែក៏ដោយ ៕
ចែករំលែកព័តមាននេះ