រាជធានីភ្នំពេញ ៖ កម្ពុជាមិនបានព្រួយបារម្ភ ចំពោះការព្រមានដាក់ទណ្ឌកម្មផ្នែកសេដ្ឋកិច្ច ពីប្រទេសមហាអំណាចមួយចំនួននោះទេទោះបីជាមានការព្រមានយ៉ាងណាក្តី ។ នេះបើតាមការអះអាងរបស់មន្ត្រីជាន់ខ្ពស់គណបក្សប្រជាជនកម្ពុជា ។ ទោះបីជាបែបណា សម្រាប់សារធារណមតិជាតិ…
រាជធានីភ្នំពេញ ៖ កម្ពុជាមិនបានព្រួយបារម្ភ ចំពោះការព្រមានដាក់ទណ្ឌកម្មផ្នែកសេដ្ឋកិច្ច ពីប្រទេសមហាអំណាចមួយចំនួននោះទេទោះបីជាមានការព្រមានយ៉ាងណាក្តី ។ នេះបើតាមការអះអាងរបស់មន្ត្រីជាន់ខ្ពស់គណបក្សប្រជាជនកម្ពុជា ។ ទោះបីជាបែបណា សម្រាប់សារធារណមតិជាតិ មិនចង់ឃើញស្ថានភាពពីអតីតកាលដ៏លំបាកត្រឡប់មកវិញនោះទេ ខណៈដែលជីវភាពសង្គមបច្ចុប្បន្នមិនដូចស្ថានភាពក្រោយឆ្នាំ១៩៧៩ ដែលទើបងើបពីរបបខ្មែរក្រហមនោះឡើយ ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា នៅថ្ងៃទី១ ខែមីនា បានបញ្ជាក់យ៉ាងដូច្នេះថា «សូមទាញអារម្មណ៍ថា បច្ចុប្បន្ន នៅលើពិភពលោកនេះ មិនមែនមានតែប៉ូលមួយផ្តាច់មុខនោះទេ មិនមែនដូចនៅក្នុងទសវត្សរ៍ឆ្នាំ១៩៧៩ទេ ។ ប្រជាជនកម្ពុជា ក៏ធ្លាប់ភ្លក្សរសជាតិការហ៊ុមព័ទ្ធសេដ្ឋកិច្ច និងការគាបសង្កត់សេដ្ឋកិច្ចដ៏ជូរចត់ពីមហាអំណាចលោកខាងលិចរួចហើយ ដោយសារតែកាន់ជេីងពួកខ្មែរក្រហមប៉ុល ពត តែកម្ពុជានៅតែអាចរស់បានរហូតដល់សព្វថ្ងៃ មានការអភិវឌ្ឍលេីគ្រប់វិស័យ កម្ពុជាមិនញញើតចំពោះការគាបសង្កត់ដោយអយុត្តិធ៌មណាមួយជាដាច់ខាត» ។
លោកបន្តថា កម្ពុជានៅតែប្តេជ្ញាដើរតាមគន្លងលទ្ធិប្រជាធិបតេយ្យនិងនីតិរដ្ឋជានិច្ច ដែល ជាស្មារតីនៃកិច្ចព្រមព្រៀងទីក្រុងប៉ារីសថ្ងៃ២៣ តុលា ១៩៩១ ។ ដូច្នេះ ក្តីសង្ឃឹមថាយកការគាបសង្កត់ និងវិធានការដាក់ទណ្ឌកម្មសេដ្ឋកិច្ចបែបណា មកអនុវត្តលើរាជរដ្ឋាភិបាលកម្ពុជា ដើម្បីចាប់បង្ខំឲ្យមានការចរចាជាមួយពួកល្មើសច្បាប់និងពួកឧទ្ទាមក្រៅច្បាប់នោះ មិនអាចទទួលយកបាន និងក៏មិនអាចក្លាយជាការពិតដែរ។ ហេតុនេះ ក្តីសង្ឃឹមរបស់ពួកជនក្រៅច្បាប់នោះ មិនអាចចេញជារូបរាងបានជាដាច់ខាត ។
ការលើកឡើងរបស់មន្ត្រីជាន់ខ្ពស់គណបក្សប្រជាជនកម្ពុជានេះ ដោយសារតែកម្ពុជាមានបង្អែកដ៏ធំនិងរឹងមាំគឺប្រទេសចិន ដែលជាមហាមិត្តរបស់កម្ពុជា និងប្រទេសមួយចំនួនទៀត ដែលគាំទ្រជំហររបស់កម្ពុជា ។
ការប្រឈមមុខក្នុងស្ថានភាពបច្ចុប្បន្ននេះ គឺបានកើតឡើងក្រោយពីតុលាការកំពូលកាត់សេចក្តីរំលាយចោលគណបក្សសង្គ្រោះជាតិ និងផ្អាកសកម្មភាពនយោបាយរបស់មន្ត្រីជាន់ខ្ពស់គណបក្សនេះរយៈពេល៥ឆ្នាំ ។ ប៉ុន្តែសម្រាប់ក្រុមគណបក្សប្រឆាំងដែលត្រូវបានរំលាយនោះ បានចោទថា ភាគីរាជរដ្ឋាភិបាលរំលោភកិច្ចព្រំព្រៀងទីក្រុងប៉ារីសទៅវិញ ។
លោក សុខ ឥសាន បន្តថា ដើម្បីឲ្យបានរស់ឡើងវិញ ពួកអាយ៉ងធ្វេីបដិវត្តន៍ពណ៌ដែលត្រូវបរាជ័យ បានខិតខំកៀរគរចៅហ្វាយនាយរបស់ខ្លួន ឲ្យដាក់ទណ្ឌកម្មលើរាជរដ្ឋាភិបាលកម្ពុជា ក្នុងគោលបំណងគាបសង្កត់ឲ្យមានការចរចាជាមួយពួកគេបានរស់ឡេីងវិញ និងបានចូលរួមក្នុងការបោះឆ្នោតជ្រេីសតាំងតំណាងរាស្ត្រនាថ្ងៃទី២៩ ខែកក្កដា ឆ្នាំ២០១៨ នេះ ។ ទោះជាយ៉ាងណាក្តី លោក សុខ ឥសាន បានគូសបញ្ជាក់ថា ការដើរកៀរគរបស់ក្រុមអតីតគណបក្សប្រឆាំងនេះ ជាការយល់ច្រឡំយ៉ាងធំ និងមិនអាចទៅរួចទេ ដែលចង់យកការគាបសង្កត់ ការដាក់ទណ្ឌកម្មមកធ្វេីជាមធ្យោបាយសម្រាប់ឲ្យខ្លួនបានរស់ឡេីងវិញនោះ ។
ការលើកឡើងរបស់លោក សុខ ឥសាន នេះ គឺបន្ទាប់ពីស្ថានការណ៍នៅក្រៅប្រទេស ដែលប្រទេសមហាអំណាចដូចសហភាពអឺរ៉ុប និងសហរដ្ឋអាមេរិកជាដើម បានព្រមានផ្តាច់ជំនួយនិងបិទទីផ្សារនាំចូលពីកម្ពុជា ៕
ចែករំលែកព័តមាននេះ